Язгы каникул дәвам итә. Ял көннәре булса да, мәктәп гөрләп тора. Бүген 9 класста татар теле, математика фәннәреннән консультацияләр узды. 2 команда район мәктәпләренең 8-11 класс укучылары арасында узган флорбол ярышларында катнашты. Шәмәрдән лицеенда узган әлеге ярышларда кызлар командасы 2нче урынга, ә егетләр командасы 3нче урынга лаек булды. Тренерлары- флорбол түгәрәге җитәкчесе Сафин А.К.

31 мартта  һәм 1 апрельдә  узган бадминтон буенча зона ярышларында безнең мәктәп укучылары да катнашты һәм матур нәтиҗәләргә иреште: Давлиев Ильяс (4 класс)-3 урын, Ибатова Ильмира (6 класс) 2 урын , Гыйлметдинов Айдар (8 класс) 4 урын яуладылар. Бу укучыларга алга таба да уңышлар телибез.

Бүген башлангыч класс укучылары өчен Белдеклеләр бәйгесе оештырылды. Класс җитәкчеләре Баһманова Р.Н., Шайхеразиева Ф.В., Гыйлметдинова И.Г., Бикмиева Д.Н. табигать белеме, математика, татар теле һәм рус теле буенча викторина уздырдылар, китапханәче Мубаракзянова К.Ш. укучыларны энциклопедияләр, яңа китаплар белән таныштырды.

Көтеп алынган язгы каникулның беренче көне 8 класс укучылары өчен бик күңелле узды. 26 март көнне  алар класс җитәкчеләре Әнисә Фәнилевна белән "Нарат" боз сараенда булдылар.Тимераякта шуу  балаларга бик матур мизгелләр бүләк итте, озын 3нче чиректән соң ял итү һәм көч җыю өчен менә дигән чара булды.

9, 11 класс укучылары зур сынау алдында. Аларның бердәм дәүләт имтиханнары тапшырасылары бар. Чыгарылыш класс укучылары бу имтиханнарга ел дәвамында әзерләнәләр. 26, 27 март көннәрендә 9 класс укучылары репетицион тестированиедә катнаштылар, ә 11 класс укучылары консультацияләрдә булдылар.

Бүген 7 класс укучысы Камалов Райнур  Яр Чаллы шәһәрендә узган 3нче республикакүләм  "Ломоносов укулары"  фәнни-гамәли конференциясендә катнашты  .  Ул,  "Рус филологиясе" секциясендә чыгыш ясап,   " Лучшая самопрезентация" номинациясендә җиңү яулады. Җитәкчесе-рус теле һәм әдәбияты укытучысы Измайлова Г.М.

24 мартта район күләмендә армрестлинг ярышлары узды. Әлеге спорт төре белән кызыксынучы 7 укучыбыз үзләренең көчләрен сынап карадылар һәм бик яхшы әзерлекле икәнлекләрен күрсәттеләр. Хасанова Гөлназ 1нче урын, Солтанов Инсаф 1нче урын, Ягудина Алинә 2нче урын, Хусаенов Рәзиф 2нче урын, Давлиев Салават 3нче урын, Сабиров Илнар 3нче урын яуладылар. Ә командабыз район күләмендә 1нче урынга лаек булды. Тренер-физик тәрбия укытучысы Мубаракзянов Р.Р.

Мәктәптә эшләүче волонтерлар отряды авылыбыздагы чишмәләрне һәрвакыт чистартып тора. Кыш көнендә дә тәмле чишмә суы эчәргә теләүчеләр байтак була, ә чишмә юлларын кар басып китә. 10 класс укучылары (класс җитәкчеләре-Каримова Л.Р.) "Зөлхиҗә чишмәсе" тирәсен кардан арындырдылар, басмалар ясап куйдылар.Аларга бу изге эшләре өчен авылдашларыбыз зур рәхмәтле.

21 март көнне 1 класста  "Оста куллар" дәрестән тыш эшчәнлегеннән "Песи, песи, пескәем" темасына (укытучы-Газизова Г.Р.), 3 класста татар теленнән "Җөмлә" темасына (укытучы-Гыйлметдинова И.Г.)  ачык дәресләр узды.

22 мартта 3нче чирек нәтиҗәләре буенча гомуми ата-аналар җыелышы узды. Җыелышның көн тәртибе

1.    “Укучыларның хокуклары һәм бурычлары” темасына лекция. (лектор-Исмагилова Ч.Р.)

2.    3нче чирек нәтиҗәләре (укыту эшләре буенча директор урынбасары Габдулхаева Р.Р.чыгышы)

3.    3нче чиректә мәктәптә  уздырылган чаралар  (тәрбия эшләре буенча директор урынбасары Измайлова Г.М. чыгышы

4.     Мәктәптә укыту-тәрбия эшенең торышы (мәктәп директоры Галияхметов Р.Р. чыгышы).

Җыелышта  97%  ата-ана катнашты.