Мәктәп яны тәҗрибә участогында язгы эшләр дәвам итә. 143 кв.м кызыл чөгендер, 132 кв. м кишер, 6 кв.м укроп чәчелде, 100 кв.м суган утыртылды. Күпьеллык чәчәк түтәлләре тәртипкә китерелде. Бүген 3 га җиргә бәрәңге утыртылды.

8 май көнне Төбәк  һәм Олы Кибәче авылларындагы һәйкәл-обелисклар янында  Бөек Җиңүнең 67 еллыгына багышланган тантаналы  митинглар узды. Олы Кибәче авыл җирлегеннән Бөек Ватан сугышына 379 кеше киткән, шуларның 159ы исән-сау туган якларына әйләнеп кайткан, 220 авылдашыбыз сугыш кырларында башын салган .Бүгенге көндә 4 сугыш ветераны исән-сау. Тантаналы митингта сугыш һәм тыл ветераннарына рәхмәт сүзләре җиткерелде, иң матур теләкләр теләнде. Яу кырында ятып калганнар истәлегенә һәйкәл-обелиск  янына веноклар салынды. Соңыннан митингка килгән авылдашлар, ветераннар хөрмәтенә   Җиңү бәйрәме уңаеннан укучылар көче белән әзерләнгән чыгыш тәкьдим ителде.

5нче  майда Сабада пожарно-прикладной спорт төрләре буенча ДЮП командалар арасында узган ярышларда безнең мәктәп командасы 1нче урын алды һәм күчмә кубокка ия булды. Җитәкчеләре-Сафин А.К.  Булдырдыгыз, егетләр! 

Бүген 9, 11 классларда ата-аналар җыелышлары узды. Көн тәртибендә укучыларның репетицион ЕГЭ, ГИА нәтиҗәләре анализланды, имтиханнарның көннәре белән таныштырылды.

Бүген татар халкының бөек шагыйре Габдулла Тукай туган көн. Шушы бәйрәм уңаеннан мәктәбебездә берничә чара узды. 5-11 класс укучылары катнашында оештырылган Шигырь бәйрәмендә  укучылар Габдулла Тукайның шигырьләрен сәнгатьле итеп сөйләделәр, башлангыч класс укучылары  рәсемнәреннән   Тукай иҗатын чагылдырган күргәзмә оештырылды.  1нче класс укучылары "Күбәләк" ясле-бакчасында  үз осталыкларын күрсәтсәләр, ясле-бакчада тәрбияләнүчеләр аларны үз чыгышлары белән куандырдылар. Гафиятова Илзия, Каримова Рузинә, Галиахметова Зәринә, Губаева Руфинә, Газизова Зилә, Сабирова Гөлназ "Саба дулкыннары" телерадиокомпаниясе уздырган Шигырь  бәйрәмендә катнаштылар.

25 апрельдә Саба мәдәният йортында район яшьләре арасында узган КВН фестивалендә Олы Кибәче авыл җирлегеннән "Кактус" командасы катнашты. Әлеге команда составында мәктәбебезнең 7 укучысы чыгыш ясады.  Безнең команда 3нче урынга лаек булды. Барлык катнашучыларга да алга таба иҗади уңышлар телибез!

20-21 апрель көннәрендә  Мамадышта мөмкинлекләре чикләнгән укучылар арасында Татарстан Республикасы буенча өстәл теннисы ярышлары узды. Әлеге ярышларда безнең мәктәптән 7 класс укучысы Хузиахметов Ирек, 10 класс укучысы Шавалиева Дилбәр катнашты. Дилбәр 2нче урын яулады. Котлыйбыз!

Бүген 9, 11 классларда математика буенча репетицион  имтиханнар уздырылды. Эшләр тикшерелгәннән соң, ике класста да ата-аналар җыелышлары планлаштырыла.

Бу көннәрдә  мәктәптә  барлык укучылар һәм укытучыларның  зур активлыгы белән 1719 кг  макулатура җыелды.  Иң күп макулатура тапшыручылар: Халиуллин Әмир -35,5 кг (1 класс), Гатиатуллина Гөлүсә- 37,5 кг (2 класс), Гатиатуллин Ильяс-40,5 кг (1 класс),  Гайнанов Булат-46 кг (5 класс), Губаева Руфинә -67 кг (8 класс), Бикмиев Илфир -76 кг (8 класс), Хасанов Айдар-204 кг (6 класс). 1-4 класслар арасында 1 урын-1 класс, 5-8 класслар арасында 1 урын- 8 класс, 9-11 класслар арасында 1 урын-11 класс.

Мәктәп- укучылар өчен икенче туган йортлары. Аның тирә-ягы чиста һәм матур булу безнең үзебездән тора. Бүген мәктәбебездә шимбә өмәсе үткәрелде. Барлык укучылар, укытучыларның тырышлыгы белән территориябезне җыештырдык. Күмәк көч күлне күчерә, дип юкка гына әйтмәгәннәр халыкта. Бергәләп эшләгәннән соң мәктәп тирәсе ялт итте.