Яңа ел-иң тылсымлы, иң могҗизалы бәйрәм. Бу бәйрәмне югары класс  укучылары да көтеп алды. 30 декабрь көнне  7-11 класс укучылары өчен "Чыршы утлары яктысында" дип исемләнгән бәйрәм тамашасы булды.Матур җырлар, күмәк биюләр, яңа ел сюрпризлары Кыш бабай белән Кар кызына да, килгән кунакларга да бик ошады. 

  Яңа ел барыбызга да иң матур теләкләребезне тормышка ашыру өчен саулык-сәламәтлек бирсен, борчу-мәшәкатьләр безне читләтеп узсын, һәр туган көнгә сөенеп, уңышларга күмелеп яшәргә насыйп булсын иде.

1-6 класс укучыларының  бәйрәме  чыршы тирәсендә әйлән-бәйлән уйнау белән башланып китте. Бәйрәм карарга барырга җыенучы куяннар һәм тиеннәр дә, аларның юлын бүлергә теләүче Убырлы белән Шүрәле  дә бар иде анда.Кыш бабай белән Кар кызына балалар иң матур җыр-биюләрен бүләк иттеләр. Лотерея билетларына бүләкләр оту бәйрәмгә тагын да ямь өстәде. 

3-11 классларда  "Президент ярышлары" узды. Әлеге ярышларда укучылар берничә спорт төре буенча үз көчләрен сынап карадылар. Бәйгенең район этабына бару хокукын 5 класс командасы яулады.

Һәркем көтеп алган, могҗизаларга бай Яңа ел бәйрәме якынлаша. Мәктәптә -бәйрәм рухы. Укучылар Чыршы бәйрәмнәренә әзерләнәләр. Мәктәбебез тирәсенә ясалган кар сыннары  барыбызны да бәйрәм белән котлый сыман. Сыннарны ясауга  барлык укучылар , укытучылар, техник хезмәткәрләр  үз өлешен кертте. Шуңадырмы, алар бик матур килеп чыктылар. Төрле җәнлек фигуралары белән әйләндереп алынган чыршы үзенең утлары белән тирә-якка ямь биреп тора. Кыш бабай белән Кар кызы  да хәрәкәткә килерләр дә, безне бәйрәм белән котларлар сыман. Яңа елда барыбызның да матур хыяллары, изге теләкләре чынга ашсын иде!

22 декабрь көнне 1-3 классларда әти-әниләр өчен Ачык ишекләр көне узды. Һәр класста  федераль дәүләт гомуми белем бирү стандарты   буенча дәрестән тыш шөгыльләр күрсәтелде. 1 класста "Җир-безнең йортыбыз"  проект эшчәнлеге буенча "Озын колаклы куян" (укытучы-Шайхеразиева Ф.В.), "Кызыклы математика" түгәрәгеннән "Математик уеннар" (укытучы-Бикмиева Д.Н.), 2 класста "Нәрсә? Кайда? Кайчан?" түгәрәгеннән  "Яңа ел чыршысы" проект эше (укытучы-Шакирова Л.Г.),  "Грамматика иленә сәяхәт" түгәрәгеннән "Умники и умницы" бәйгесе (укытучы-Баһманова Р.Н.), 3 класста  "Яшь математик" түгәрәгеннән "Математик КВН" (укытучы-Шайхеразиева Ф.В.) , "Дөньяны танып беләбез" түгәрәгеннән "Әкияттә кунакта" кичәсе (укытучы-Давлиева В.Н.) узды. Һәр чарада укытучылар яңа технологияләр кулланып, укучыларның танып-белү активлыгын, логик фикерләү сәләтен  үстерү максатыннан төрле эш алымнары кулландылар. Дәресләр укучыларның активлыгы белән , уен элементлары  чиратлаштырылып, методик яктан дөрес оештырылды.

12,13 декабрь көннәрендә 9 класс укучылары рус теле һәм математика буенча үзләренең белемнәрен сынап карадылар, репетицион тестированиедә (ГИА) катнаштылар.

Бүген Саба кадет мәктәбендә мөмкинлекләре чикләнгән балалар арасында узган шашка ярышларында безнең мәктәптән 3 укучы катнашты һәм  яхшы нәтиҗәләргә иреште: 10  класс укучысы Маннанова Гөлчәчәк 6-11 класс кызлары арасында 1нче урын, 8 класс укучысы Хуҗиәхмәтов Ирек 6-11 класс егетләре арасында 2нче урын яулады. Котлыйбыз!!!

Ноябрь аенда узган "Начар гадәтләр урынына спортны сайлыйк" акциясенә район комиссиясенә тәкъдим ителгән папкабыз "Иң яхшы сәламәтләндерү технологиясе" номинациясендә район күләмендә 1нче урын алды.

Үз белемнәрен сынап карау максатыннан, 4,5 декабрь көннәрендә 11 класс укучылары рус теле һәм математика буенча репетицион  тестированиедә катнаштылар.

Бөтенроссия предмет олимпиадаларының район этабы дәвам итә. Бүгенге көнгә безнең мәктәпнең  уңышлары:

1. Сабиров Булат, 8 класс, математика-3 урын (укытучы Габдулхаева Р.Р.)

2. Гилазов Булат, 10 класс, ОБЖ-1 урын (укытучы Сафин А.К.)

3.Юзеева Сиринә, 10 класс, технология-3 урын (укытучы-Галиахметова И.М.)

4.Юзеева Сиринә, 10 класс, биология-2 урын (укытучы-Ибушева Ф.Н.)

5.Сабирова Гөлназ, 9 класс, экология-3 урын (укытучы-Ибушева Ф.Н.)

6.Сабиров Булат, 8 класс, география-1 урын (укытучы-Сафина С.З.)

7. Газизова Илүзә, 7 класс, география-2 урын (укытучы-Сафина С.З.)

8. Сабирова Гөлназ, 9 класс, география-3 урын (укытучы-Сафина С.З.)