Гимназиянең татар теле һәм әдәбияты укытучысы Шәфигуллина Эльвира Илгизовна «Ел укытучысы-2014» бәйгесенең район турында зур җиңү яулады: “Иң яхшы татар теле һәм әдәбияты укытучысы” номинациясендә 1 нче урынга лаек булды. Эльвира Илгисовна, районыбыз данын яклап, шәһәр турында да уңышлы чыгыш ясады. “Укытучы хезмәте – мактаулы, шул ук вакытта авыр һәм күп сабырлык сорый торган һөнәрләрнең берсе. Мәктәптә эшләү өчен, балаларны яратырга, аларның тормышы белән яши белергә кирәк. Бүген укытучы белемле, заман таләпләреннән чыгып эш итә белә торган шәхес булырга, һәрдаим үзенең һөнәри осталыгын камилләштерү өчен, даими эшләргә тиеш. “Ел укытучысы” бәйгесе – иң абруйлы, мөгаллим хезмәтенең асылын ачарга ярдәм итә торган бәйгеләрнең берсе. Әлеге бәйге зур җаваплылык, зирәклек, тырышлык таләп итә. Яныңда үзенең киңәшләрен бирүче, сиңа ярдәм итүче җитәкчең, укытучыларың булганда, эш нәтиҗәле бара. “Ел укытучысы” бәйгесе күңелемдә якты хатирәләр булып мәңге сакланачак”, - ди зур уңышларга ирешкән укытучы Эльвира Илгисовна.

Татарстан Республикасында 2014 нче ел - Мәдәният елы булу уңаеннан Казан шәһәре Мәгариф оешмаларының педагогик коллективлары арасында сәхнәләштерелгән күренешләр бәйгесе игълан ителде. 26 нчы февральдә әлеге бәйгенең район туры узды. 1 нче татар гимназиясенең “Акчарлак” театр коллективы язучы Р.Бахның “Чайка по имени Джонатан Ливингстон“ әсәрен рус, татар, инглиз телләрендә сәхнәләштерде. Әсәрдә сурәтләнгән фәлсәфи фикер тамашачыга 20дән артык мөгаллим тарафыннан музыка, җыр, бию, театр сәнгате аша җиткерелде.

21 нче февральдә – Халыкара туган тел көнендә Татарстан Республикасы мәгариф һәм фән министрлыгы Казан шәһәренең Фатиха Аитова исемендәге татар телендә белем бирүче 12 нче гимназиясе җирлегендә, күренекле драматург, җәмәгать эшлеклесе, Татарстан Дәүләт Советы депутаты, РСФСРның К.С. Станиславский исемендәге һәм ТАССРның Г.Тукай исемендәге Дәүләт бүләге лауреаты, халык язучысы Туфан Габдулла улы Миңнуллинның иҗади мирасын тирәнтен өйрәнү һәм популярлаштыру максатыннан чыгып, укытучыларның һәм укучыларның I республика конференциясен оештырды.
Әлеге конференция олуг әдип, татар мәгърифәтен саклап калу һәм үстерү өчен көч куйган бөек милләтпәрвар Туфан Миңнуллин исемен мәңгеләштерү эшендә күркәм бер чара.
1 нче татар гимназиясенең 10 нчы сыйныф укучылары татар теле һәм әдәбияты укытучысы Хөснетдинова Э.Р. җитәкчелегендә Туфан Миңнуллинның “Әлдермештән Әлмәндәр” моңсу комедиясен сәхнәләштерделәр.
Татар халкының бөек артистлары Нәҗибә Ихсанова, Ирек Баһманов, Әсхәт Хисмәт, Илдус Әхмәтҗәнов безнең гимназия укучыларының чыгышын югары бәяләде. Яшь артистлар уены һәр тамашачы күңеленә хуш килде.

21 нче февраль - Халыкара Туган тел көне. Бу көн 2000 нче елдан башлап ЮНЕСКО карары нигезендә билгеләп үтелә башлады. Әлеге бәйрәм безнең гимназиябездә һәр елны зурлап үткәрелә. Бәйрәмгә әзерлек бер ай алдан башланды. Укучылар туган телгә багышланган сочинениеләр, шигырьләр яздылар, викторина сораулары, ребуслар, башваткычлар төзеделәр, тел галимнәре,туган тел турында кызыклы материаллар тупладылар. Кичәдә балалар шигырь сөйләү, җыр өлкәсендәге осталыкарын күрсәттеләр, аларның чыгышы алкышларга күмелде.

Һәр ел саен февральнең өченче якшәмбесендә Яшь сайлаучы көне үткәрелә. Быел ул 16 нчы февральгә туры килә. Шушы уңайдан бүген гимназиядә Казан шәһәре Сайлау комиссиясе сәркатибе Павлова Наталия Николаевна югары сыйныф укучыларын Россия Федерациясендә һәм Казан шәһәрендә сайлауларны оештыру һәм үткәрү тәртибе белән таныштырды. Очрашуның максаты - сайлау процессында катнашучыларга мәгълүмат бирү һәм сайлаучыларның хокукый культурасын күтәрү.

Бүген 7б сыйныфында А.Гайдарның юбилеена, ә 8а сыйныфында А.С.Пушкинны искә алуга багышланган дәрес китапханәдә үтте. Аларны рус теле укытучысы Зергирова Лилия Наилевна һәм китапханә мөдире Умарова Венера Миңневаровна әзерләгән иде. Дәреснең максаты - яхшылыкка, күмәкләшеп эшләргә өйрәтү; тимурчылык хәрәкәтенең яңаруына кызыксыну уяту; укучыларның күзаллавын киңәйтү.

“Татарстан Республикасы халыкларының тарихи һәм мәдәни-әхлакый хәзинәләре” дигән фәнни-тикшеренү укучылар конференциясе ел саен Казан шәһәре муниципаль берәмлегенең башкарма комитеты мәгариф идарәсе, югары профессиональ белем бирүче дәүләт мәгариф учреждениесе “Казан (Идел буе) федераль университеты”, Казан (Идел буе) федераль университетының педагогика һәм психология институты, муниципаль методик учреждениесе “Шәһәр методик үзәге”, Казан шәһәре Идел буе районының “40 нчы гимназия” гомуми белем муниципаль бюджет учреждениесе тарафыннан үткәрелә.
Конференциянең максаты: Гуманитар һәм табигый-математик фәннәр өлкәсендәге тикшеренү эшчәнлегенә тарту юлы белән укучыларның интеллектуаль иҗатын үстерүгә стимуллаштыра торган шартлар тудыру.
Гимназиябезнең 8 укучысы әлеге конференциядә уңышлы чыгыш ясадылар һәм катнашучы сертификаты белән бүләкләнделәр.

“Һөнәрле үлмәс, һөнәрсез көн күрмәс”, -диелә татар халык мәкалендә. Шушы сүзләрне истә тотып, гимназиябезнең укучылары төрле түгәрәкләргә, студияләргә йөриләр. Шуларның берсе – “Оста куллар” студиясе. Ниләр генә эшләмиләр алар биредә: әкияти аккошлар, тал чыбыкларыннан ясалган Убырлы карчык өе, пластмасса чәнечке һәм тасмалар ярдәмендә ясалган җилпәзә, мамык һәм тукымадан ясалган кар бабайлар, бәйләү җебеннән ясалган йөрәкләр, чәчәкләр һ.б.
Үзегез дә килеп карый аласыз иҗат җимешләрен. “Оста куллар” студиясенең күргәзмәсе икенче катта эшли. Рәхим итегез!

2014нче елның 13 нче февралендә гимназиядә “Сәламәт гаиләдә - сәламәт балалар” темасына бөтенроссия дәресе узды.
Дәреснең максаты - укучыларны гаилә кыйммәтләренә өйрәтү, балаларның сәламәтлеген саклау һәм ныгыту, аларның гармонияле үсешен тәэмин итү, республикабызда уза торган сәламәтлек саклау буенча программаларны пропагандалау. Интерактив тавыш бирү пультлары, мобиль кабинет, интерактив такта һәм өстәл куллану дәресләрнең нәтиҗәлелеген арттырды. Кулланылган алымнар, ысуллар укучыларның кәефен күтәрде, сәламәт яшәү рәвешен үстерергә ярдәм итте.

11-13 февральдә “Казан шәһәренең иң яхшы укытучысы – 2014” шәһәр бәйгесенең беренче туры үткәрелде. Гимназиябезнең татар теле һәм әдәбияты укытучысы Шәфигуллина Эльвира Илгисовна бәйгенең бу турында уңышлы чыгыш ясады. Бүген ул балалар белән сөйләшүдә, укучыларның яшь үзенчәлекләрен, кызыксынуларын исәпкә алып, алар өчен әһәмиятле мәсәләләрне оста хәл итә алуын раслады.
Эльвира Илгисовна ата-аналар белән әңгәмә вакытында катлаулы педагогик ситуацияләрне чишү мөмкинлекләрен күрсәтте.