Укучыларга белем һәм тәрбия бирүдә ирешкән нәтиҗәле хезмәте өчен, башлангыч сыйныфлар укытучысы Исмәгыйлева Марина Анатольевна “Мәгарифтәге казанышлары өчен” күкрәк билгесе белән бүләкләнде. Марина Анатольевнаны чын күңелдән котлыйбыз, алдагы тормышында уңышлар телибез.

Бүген 1 нче татар гимназиясе укытучылары “Мәгариф” журналының баш мөхәррире Миргалимов Илдар Флүс улы, гомуми мәсьәләләр буенча бүлек мөхәррире Нурмөхәммәтов Фәрит Рәшит улы, “Гаилә һәм мәктәп” журналының баш мөхәррир урынбасары Бәдретдинов Хәмзә Фәрхәт улы, бүлек мөдире Нотфуллина Рамилә Рамил кызы белән очрашты.
“Мәгариф” журналы — безнең гимназия укытучыларының өстәл китабы.
Татар мәктәпләре, гимназияләре, лицейлары өчен алдынгы тәҗрибә уртаклашу мәйданы булган әлеге журналны мөгаллимнәребез зур кызыксыну белән укый, басманың яңача чыгарылышын уңай бәяли.
“Гаилә һәм мәктәп” журналы ата-аналар, балалар арасында көннән-көн киңрәк тарала бара. Безнең гимназиядә дә бу яртыеллыкта әлеге журналны укучылар күбрәк булачак.
Әлеге очрашу журнал хезмәткәрләренә дә, укытучыларга да алдагы эшләре өчен яңа юшәлешләр билгеләделәр мөмкинлек тудырды.

7 нче апрельдә – Татарстан Республикасы Мәгариф һәм фән министрлыгы Казан шәһәренең Фатиха Аитова исемендәге татар телендә белем бирүче 12 нче гимназиясе җирлегендә, күренекле драматург, җәмәгать эшлеклесе, Татарстан Дәүләт Советы депутаты, РСФСРның К.С. Станиславский исемендәге һәм ТАССРның Г.Тукай исемендәге Дәүләт бүләге лауреаты, халык язучысы Туфан Габдулла улы Миңнуллинның иҗади мирасын тирәнтен өйрәнү һәм популярлаштыру максатыннан чыгып, укытучыларның һәм укучыларның I республика конференциясен оештырды.
Әлеге конференция олуг әдип, татар мәгърифәтен саклап калу һәм үстерү өчен көч куйган бөек милләтпәрвар Туфан Миңнуллин исемен мәңгеләштерү эшендә күркәм бер чара.
1 нче татар гимназиясенең 10 нчы сыйныф укучысы Фасахов Булат татар теле һәм әдәбияты укытучысы Хөснетдинова Э.Р. җитәкчелегендә “Туфан Миңнуллинның сәхнә әсәрләрендә рус-европа алынмаларын үзгәртү нигезендә туган гади сөйләм лексикасы” исемле фәнни хезмәте өчен 2 нче урынга лаек булды.

31нче март һәм 10нчы апрель көннәрендә инглиз теле укытучылары хезмәттәшләре алдында ачык дәресләр күрсәтә. Бүген югары категорияле укытучы Чулпан Мөбиновна Хәйсәрова 8а сыйныфында сөйләм күнекмәләрен үстерү буенча дәрес-сәяхәт, филология фәннәре кандидаты Альбина Ринатовна Хәйретдинова 4в сыйныфында Лондон темасы буенча уен-дәрес үткәрде. Һәр дәрестә укучыларның инглиз телен бик теләп, кызыксынып өйрәнүләре тагын бер кат расланды, интерактив технологияләр куллану укучылар эшчәнлеген җанлы итүдә бер алым булуы ассызыкланды.

29 һәм 30 нчы мартта укучыларның Н.И. Лобачевский исемендәге Идел буе фәнни конференциясе уздырылды. Безнең гимназиянең 11 укучысы төрле секцияләрдә фәнни эшләрен якладылар.
10 А сыйныф укучысы Фасахов Булат “Туфан Миңнуллинның сәхнә әсәрләрендә рус-европа алынмаларын үзгәртү нигезендә туган гади сөйләм лексикасы” исемле фәнни хезмәте өчен I дәрәҗәдәге диплом белән бүләкләнде. 8 А сыйныфы укучысы Йосыпова Гүзәл, “1552 нче елдан соң татар халкынынң язмышы. Яулап алуның нәтиҗәләре” темасына фәнни эш яклап, “Уңышлы чыгышы өчен” дипломына лаек булды. Укучыларны зур җиңүләре белән котлыйбыз. Иҗади уңышлар телибез!

Казан шәһәре Сәләтле балалар белән эшләү үзәге башлангыч сыйныф укучылары өчен “Уку тизлеге” олимпиадасы үткәрде. Безнең гимназия укучылары, әлеге олимпиадада катнашып, яхшы нәтиҗәләргә ирештеләр:
Шәхси беренчелек буенча җиңүче дипломнарына ия булучылар: Максимова Мария(4в), Кыямова Ралинә(4а), Фатыйхова Камилә (4а), Сәләхов Алмаз (4а), Мехоношина Екатерина (4б), Сөләйманова София (2б).
“Артист” номинациясе буенча җиңүче дипломнарына лаек булучылар: Максимова Мария(4в), Кыямова Ралинә(4а), Фатыйхова Камилә (4а), Әхмәтова Камилә (3а), Сөләйманова София (2б).
“Тизлеккә уку” номинациясе буенча җиңүче дипломнары белән бүләкләнүчеләр: Фатыйхова Камилә (4а), Сәләхов Алмаз (4а), Сөләйманова София (2б).
Аларны котлыйбыз! Алга таба да зур уңышларга ирешүләрен телибез!

21 нче март - көн белән төн тигезләшкән көн. Татарларның борынгы бабалары, башка төрки халыклар кебек, бу көнне бәйрәм иткәннәр. Тарихтан билгеле: Казан татарлары 18 нче гасырның азагында да Яңа елны көн белән төн тигезләшкән көнне үткәргәннәр. Бүген 1 нче гимназия укучылары татар, рус, инглиз теле дәресләрендә әлеге бәйрәмнең үзенчәлекләре турында сөйләштеләр.

Бүген, 20 нче мартта 3 нче сыйныф укучылары, укытучылары Исмәгыйлева М. А. һәм Зиһаншина Г.Х. җитәкчелегендә, әниләре һәм дәү әниләре өчен зур бәйрәм оештырдылар. Укучылар сөйләгән күңелгә үтеп керерлек мәгънәле шигырьләр, оста итеп башкарылган биюләр, матур итеп җырланган җырлар залда утыручы бер генә тамашачыны да битараф калдырмады.

2014нче елның 20нче мартында гимназиядә Юл хәрәкәте куркынычсызлыгы көне узды.
Мәктәбебезнең күп кенә укучылары башка районнарда яшиләр, шуңа күрә гимназиягә мәктәп автобусы белән һәм мөстәкыйль рәвештә киләләр. Укучылар юлда дөрес хәрәкәтләнергә, җир асты һәм җир өсте юлларын чыкканда, юнәлешне дөрес таба белергә дәресләрдә дә өйрәнәләр. Юлда йөргәндә, куркынычсызлыкны саклау көне кебек чаралар үткәрүгә дә гимназиядә аерым урын бирелә. Бүген ЮХИДИ хезмәткәрләре укучыларга юлда йөрү кагыйдәләре турында лекция үткәрделәр.

Сәламәтлек- зур байлык. Шул байлыкны саклау өчен, һәрьяктан да хәбәрдар булырга кирәк.
Гимназиядә “Туберкулез һәм аны булдырмау өчен, профилактика чаралары” дигән темага ункөнлек бара. Чара кысаларында сыйныф сәгатьләре, әңгәмәләр үтте, шәфкать туташы чыгышы тыңланды, укучылар тарафыннан рефератлар эшләнде. Бу куркыныч авыруны йоктырмас өчен, ниләр эшләргә кирәклеген һәр укучы аңлагандыр, дип уйлыйбыз.