Балачак иленең иң истәлекле бәйрәмнәренең тагын берсе – 1 июнь - Балаларны Халыкара яклау көне. Бу көн олыларга һәрбер баланың кайгыртуга мохтаҗ икәнен искәртеп тора, чөнки үсеп килүче яшь буын – ул илебезнең киләчәге. Шушы көн уңаеннан, 2 июнь көнне Казанның Киров бакчасында Балаларны яклау көненә багышланган бәйрәм чарасы узды. Аны Вахитов районы Балалар иҗаты үзәге оештырган иде. Гимназия яны җәйге лагерена йөрүче 30 укучы бала шушы бәйрәмдә катнашса, калган 60 бала “Казан ярминкәсе” мәйданында оешкан “Балачак иле”нә юл тотты. 1 июнь – бәйрәм көне, каникуллар һәм гимназиядә җәйге лагерь башланган көн дә әле ул! Балаларыбыз яхшылап ял итсеннәр, көч тупласыннар өчен, бу чорда да өлкәннәрнең кайгыртуы сорала. Ямьле җәй айлары укучыларыбыз өчен файдалы узсын, алар өчен һәр көн бәйрәм булсын дигән теләктә каласы килә. Балаларыбызны кешелекле, игелекле, инсафлы итеп тәрбияләү – бала тәрбияләүдә катнашкан һәр олы кешенең изге бурычы!