12нче гыйнвар көнне тәрбия эшләре буенча директор урынбасары тарафыннан оештырылган Гимназия Үзидарәсенең җыелышы булып узды. Үткән чиреккә, узган эшләргә йомгак ясалды, нәтиҗәләр чыгарылды.

Быел укучыларның кышкы каникуллары 28 декабрьдән башланып, 10 гыйнварга кадәр дәвам итте. Гимназиядә каникул вакытында түгәрәкләр һәм консультацияләр эшчәнлеге дәвам итте.

Күңелле бәйрәм яллары һәм озын каникуллардан соң мәктәптә укуның иң озын чиреге - III чирек башланды. Сагындырып кына яуган ап-ак карга күмелеп кышкы каникуллар да үтеп китте.
Чыршы бәйрәмнәре дә тыныч һәм куркынычсыз узды. Ә бүгеннән инде - укырга! Хәерле сәгатьтә!

Гомуми урта белем бирүче уку йортларында Яңа ел алды тамашалары башланып китте. 25нче декабрь көнне 1нче санлы татар гимназиясе укучылары да яңа ел тамашасында катнашып, үз иҗатларын тамаша кылды.

Кыш – әкияткә тиң могҗизалар вакыты. Бу бигрәк тә балаларга яхшы таныш. Нәкъ менә могҗизага тиң табигатьнең серле бер фасылы, яңа елның якынлашуы 1нче санлы гимназия укучыларын да битараф калдыра алмады. Һәр укучы “ Кышкы могҗиза” дигән темага рәсем һәм кул эшләнмәләре ясады. Иң матур рәсемнәрдән күргәзмә оештырылды. Ә кул эшләнмәләре арасында нидиләре генә юк! Кул астында гына булган җисемнәргә яңача “җан өргән” алар! Афәрин!

22нче декабрь көнне гимназиянең спорт залында 5-7 сыйныфлар арасында физик тәрбия укытучылары тарафыннан оештырылган спортка кагылышлы күрсәтмә чыгышлар чарасы булып узды.

15нче декабрь көнне гимназиягә йогышлы чирләрне кисәтү һәм СПИДка каршы көрәш турында сөйләшү өчен ТР Сәламәтлек саклау Министрлыгына караган махсус үзәк хезмәткәре чакырылып, өлкән сыйныф укучыларын замана чиреннән кисәтеп, лекцияләр үткәрелде.

12нче декабрь көнне гимназиядә “Күңелле старт” күңел ачу уеннары оештырылды. Уенда үзара 4нче сыйныфлар ярышты.

11 нче декабрь көнне 5 А һәм 6 Б сыйныфы укучылары Габдулла Тукайның әдәби музеена бардылар. Укучылар музейда бөек шагыйребезнең тормыш юлы һәм иҗаты турында күп өстәмә мәгълүмат алдылар.

9-12 декабрь көннәрендә «Идел» яшьләр үзәгендә Татарстан Республикасы һәм Россиянең берничә төбәгендә урнашкан «Сәләт» клубларының II гамәли семинары узды. Бу семинарда гимназиябезнең 8нче сыйныф укучылары да катнашты.