“Мәрхәмәтлелек ярминкәсе” дәвамында гимназия укучылары хәйрия товарларын сату белән генә чикләнеп калмады. “Ярминкә булгач, ярминкә булсын...” , дип элеккеге гореф-гадәтләребезне дә истә тотып, “Мәрхәмәтлелек ярминкәсе”нә килгән халыкның күңелен күтәрү максатыннан 30 минутлык концерт программасы да әзерләнде. Концертта милли рух булдыру төп шартларның берсе булса да, программаның тулаем эчтәлеге изгелеккә багышланган иде. Бу исә килгән халык колагына да һәм укучыларыбызны тәрбияләүдә дә үз ролен үтәгәндер, дип ышанасы килә, чөнки “изгелек”, “мәрхәмәтлелек”, “ярдәм” төшенчәләре сүз генә булып калмыйча, һәрдаим безнең гамәлләребездә дә чагылырга тиеш. “Мәрхәмәтлелек ярминкәсе”нә әзерләнгән “Изгелек җирдә ятмас” хәйрия концерты шуны максат итте. Гимназиянең хореография һәм җыр укытучылары белән берлектә әзерләнгән концерт номерларында милли рух та, башка милләтләр белән дустанә мөнәсәбәт тә урын алган иде: 6-7 сыйныф кызлары “Күл буенда” татар лирик биюе, 7 сыйныф малайлары “Шәкертләр” биюе белән чыгыш ясаса, 9-10 сыйныф кызлары кытай биюендә осталыкларын күрсәтте. Кыскасы, ярминкәгә килгән халыкның да, кәеф бүләк иткән укучыларның да кәефләре шәп булды , ә иң мөһиме – бушка!