Инглиз теле – Англиянең рәсми теле, АКШ халкының (31 штатта рәсми тел) туган теле; Ирландия, Канада, Мальта, Австралия, Яңа Зеландия дәүләтләрендә рәсми тел. Шулай ук, Азия дәүләтләрендә рәсми тел булып кулланыла . Википедия материалларына караганда, инглиз теле туган телләре булган кешеләрнең саны якынча 410 млн кеше, инглиз телендә сөйләшкәннәр саны, якынча, 1,8 млрд кеше булып , ул бүген төп халыкара аралашу теле ролен үти. Инглиз теле атналыгы уңаеннан, 7нче сыйныфлар арасында «English-Speaking Countries » темасына викторина булып узды. 

«Китап — бакча, андагы язулар — шул бакчаның гөлләре», — ди К. Насыйри. Кем укымый, шул бернәрсә турында да уйламый. Белем алуның иң яхшы юлы — уку. Тиеннәрдән сумнар җыелгандай, укылган бөртекләрдән белем туплана. Китап битләре, керфекләр кебек, күзне ачалар. Балаларда китапка , китап укуга мәхәббәт уяту, шул хисаптан, гимназия китапханәсе фондын фәнни-популяр, белешмә һәм матур әдәбият белән баету максатыннан, гимназиядә “Китапка гомер бүләк ит” акциясе дәвам итә. Акциядә әлегә 4 сыйныф актив катнаша. Алар арасында 40 китап тапшырып , 6 Б сыйныфы лидерлык итә. Афәрин! Сыйныфлар! Калышмагыз! Акциядә катнашып калырга ашыгыгыз.

11 нче октябрь көнне Вахитов һәм Идел буе районы мәктәпләреннән , мәктәпкәчә тәрбия оешмаларыннан, реабилитация үзәкләреннән һәм өстәмә белем бирүче уку йортларыннан  900ләп  укытучы гимназиядә аттестация тесты узды. Алар арасында фән укытучылары һәм тәрбиячеләр белән беррәттән , укытучы – логопед , укытучы – дефектолог, педагог – психолог, өстәмә белем бирүче педагог, армспорт буенча тренер кебек сирәгрәк һөнәр ияләре дә бар иде. 
 

Киләсе атнадан  гимназиядә   фән атналыклары старт алыр дип көтелә!

7нче октябрь көнне гимназиянең актлар залында тәрбия эшләре буенча директор урынбасары , педагог – оештыручы һәм гимназия президенты җитәкчелегендә Үзидарә җыелышы булып узды. Президент Үзидарә әгъзаларын яңа уку елы башлануы белән котлады, алда эшләнәчәк эшләр турында министрлар һәм старосталар белән фикер алышты. Министрларның эш вазыйфалары яңадан карап чыгылды, 9нчы сыйныфны тәмамлап киткән министрлар урынына  яңа министрлар сайланачагы хакында әйтелде. Старосталарга министрлар белән тыгыз элемтәдә торып эшләргә кирәклеге ассызыкланды.  Президент  тиздән министрлар белән аерым җыелыш булачагы турында җиткерде. 

Бүген белем бирүче барлык уку йортларында укытучыларның һөнәри бәйрәмнәре билгеләп үтелә. 
Гимназиядә бүгенгесе көндә барлыгы 38  укытучы 563 укучыга белем бирә. Укытучылар коллективының төп өлешен олпат тәҗрибәле, югары категорияле  укытучылар тәшкил итә. Хәзерге вакытта лаеклы ялда булган укытучыларыбызга алмашка килгән яшь белгечләр дә аз түгел. Димәк, 21нче гасыр балалары белән эшләү ничек кенә катлаулы булмасын, укытучы һөнәрен үз иткән яшьләр  бар һәм бу, үз  чиратында, заманабызга  күрә  куандыра торган  күренеш. Яшь белгечләр коллективны ел саен яңартып тора. Әлбәттә, һәр уку йорты   өчен  үз  коллективына тәҗрибәле, югары категорияле укытучылар алу отышлы булыр иде. Тик гимназия коллективта эшләргә ниятләп килгән яшь белгечләргә карата булган аерым бер уңай мөнәсәбәте белән аерылып тора. Үз  һөнәрләрендә  җиң сызганып  эшләргә  теләк белдергән яшь белгечләрнең ниятләре категориясез булулары бәрабәренә кире кагылмый, ә киресенчә, аларга зур әһәмият һәм хезмәтләрен күрсәтер өчен мөмкинлекләр  тудырыла. Тора-бара  коллективта  шул яшь белгечләрдән тәҗрибәле һәм категорияле укытучылар "үсә"...Әлбәттә, монда гимназия идарәсе  тарафыннан яшьләргә юл куелу да, гимназиянең яшьләр белән эш алымнары да, атап әйткәндә, яшь белгечләрне тәҗрибәле һәм категорияле укытучыларга "беркетеп" эшләү алымы да , һичшиксез, әһәмиятле роль уйный.

http://www.tvoya-rossiya.ru/ сайтында һәм «Казанга тавыш бирәбез» электрон порталында Россия Үзәк банкы чыгарачак 200 һәм 2000 сумлык яңа кәгазь акчаларда сурәтләнәчәк символлар өчен тавыш бирүдә гимназия укучылары һәм укытучылары катнашты. Сыйныф җитәкчеләре , тәрбия эшләре буенча директор урынбасары белән берлектә, укучыларда ватанпәрвәрлек хисләрен үстереп, туган җиргә мәхәббәт тәрбияләү, тарихи һәм мәшһүр урыннарга кабат игътибарларын юнәлдерү һәм , шул рәвешле, укучыларның туган як турындагы белемнәрен арттыру максатыннан һәр сыйныф белән әңгәмәләр уздырылды. Соңгы нәтиҗәләрдән күренгәнчә, республика башкаласы символлары өчен барлыгы 384 490 тавыш бирелгән инде. 

1 октябрь - Өлкәннәр көне . Без бүгенге көндә “өлкән яшьтәгеләр” дип атаган кешеләр илебезнең куәтен һәм данын булдырган, аны яклаган. Гимназиядә өлкәннәр көне уңаеннан бүген сыйныф сәгатьләре узды. Беренче катта башлангыч сыйныфлар катнашында рәсем бәйгесе оештырылып, иң эчтәлекле рәсемнәрдән күргәзмә оешты. Урта һәм өлкән сыйныфлар арасында "Олыласаң олыны - олыларлар үзеңне!" дигән темага инша һәм шигырь бәйгесе уздырылды. Хөрмәтле өлкәннәр! Гомер көзегездә моңсуланырга сәбәп булмасын! Ә без исә өлкәннәргә карата ихтирамлы булыйк!

Киләсе уку елында беренче сыйныфка керергә әзерләнүче балалар өчен октябрь аеннан башлап гимназия базасында әзерлек курслары оештырыла. Беренче сыйныфка укырга керү өчен түләүле дәресләрдә шөгыльләнү, әлбәттә, мәҗбүри түгел. Әмма яңа уку елы башлану белән үк, әле нәкъ бер елдан беренче сыйныфка укырга керәчәк балаларының аң-белемгә ихтыяҗларын алдан кайгыртып, балаларның әти-әниләре әлеге курслар хакында актив кызыксына башлый. Ихтыяҗның зурлыгына карап, булачак беренче сыйныфлар өчен гимназиядә шимбә дәресләре оештырыла. Әзерлек курсларының башлануын хәбәр итеп, 1нче октябрь көнне сәг.10да гимназиядә ата-аналар һәм балалар өчен җыелыш узды. 

Бүген 29 сентябрьдә К.Тинчурин исемендәге Татар дәүләт драма һәм комедия театрында Казанның 1нче гимназия укучылары кунак булды. Балалар «Әкият китабы» спектаклен тамаша кылды. Мавыктыргыч маҗараларга, юморга, могҗиза-тылсымнарга бай әлеге әкият аларга бик ошады. Спектакль төгәлләнгәннән соң, балалар әкият геройлары белән фотога төшәргә дә өлгерде ( сылтама: http://tinchurinteatr.ru/?p=8876 )