Бүген бездә 52 ел бөтен көчен, сабырлыгын ,сәламәтлеген балалар укытуга багышлаган бөек укытучы, бик күп укытучыларның укытучысы булган Татарстанның атказанган укытучысы Н.Г.Гыймадиевның тантаналы юбилей кичәсе булып узды. Мәшһүр укытучының олы юбилеен хөрмәтләп, аның шәхесен зурлап тантаналы кичә уздыру идеясен гимназиянең директоры       Г.Г. Шәмсиева җиткерде. Н.Г. Гыймадиевны якыннан белгән, аның белән шактый еллар бергә эшләгән олпат тәҗрибәле укытучы Э. Р. Хөснетдинова юбилей кичәсен оештыруга бик теләп алынды. Матур мәшәкатьле кичәнең барышына барлык укытучылар коллективы үзеннән азмы-күпме өлеш кертеп, бәйрәмгә барчасы үзенчә ямь өстәргә тырышты.     Н.Г. Гыймадиев 36 ел гомерен нәкъ менә 1нче Татар гимназиясенә багышлый.Татар мәктәпләре өчен татар телендә дәреслекләр язып, бик күп методик әсбапларга рецензент буларак тарихка кереп калган, хәзерге вакытта лаеклы ялда булган юбиляр укытучыны котларга гимназияне төрле елларда тәмамлаган укучылары да, күп еллар бергә - бер коллективта эшләп, хәзерге вакытта барчасы лаеклы ялда булган коллегалары да килгәннәр иде.Бүген әлеге  гаҗәеп шәхеснең гомер бәйрәме искиткеч истәлекле ядкарь буларак гимназия тарихына өстәлде.

Бүген бездә алда көтелгән СПАРТАКИАДАга әзерлекнең 1нче этабына старт бирелде! Спартакидада катнашу өчен укытучылар коллективының «ИҢ ШӘП СПОРТСМЕННАРЫ» сайлап алыначак! Ә һәр педагог, үз чиратында, һәр җирдә “иң-иңнәреннән” булырга омтыла. Кышкы СПАРТАКИАДА – 2017 игълан ителгәч тә, гимназиядә “Сәламәт педагог” секциясе эшли башлады. Атнаның һәр чәршәмбесе, дәресләрдән соң, гимназия идарәсе һәм укытучылар коллективы, махсус спорт костюмнарына киенеп, уку йортының спорт залына җыела һәм нигезләмәдә күрсәтелгән уеннар буенча чыныгу ала. Ярышларны дөрес һәм хәрәмләшүләрсез башкаруда физик тәрбия укытучылары булыша.

ТР Мәгариф һәм Фән министрлыгы белән әлеге өлкә профсоюз хезмәткәрләренең республика комитеты быелгы кышкы СПАРТАКИАДА -2017 уеннарының оештырылуы һәм узуы өчен җавап тотачак. Кышкы Спартакиада уеннарының үткәрелү тәртибе, гомуми нигезләмәсе, уеннарның уздырылу урыны һәм вакытлары инде билгеле дә. Гомумән, кышкы Спартакиада 4 этаптан гыйбарәт булачак. 1нче этап ярышлары уку йортларының үз спорт залларында узачак. 

16 гыйнвар көнне гимназиядә Методик киңәшмә утырышы үткәрелде. Утырышта бөтенроссия һәм республика олимпиадаларының муниципаль туры нәтиҗәләре анализланды, татар телендә үткәрелә торган шәһәр олимпиадасына һәм укучыларны фәнни-гамәли конференцияләргә әзерләү мәсьәләләре тикшерелде. Укытучылар Татарстан Республикасы Мәгариф һәм фән министрлыгының “Өлкән укытучы”, “Укытучы-мастер”, “Укытучы-остаз”, “Укытучы-эксперт” номинацияләре буенча үткәрелә торган грант нигезләмәләре белән таныштырылды.

Бердәм дәүләт имтиханнарына нәтиҗәле әзерләнү максатыннан, гимназиядә математика, рус теле һәм укучылар үзләре сайлаган предметлар буенча диагностик эшләр даими үткәрелә. БДИ (ЕГЭ) һәм ТДИ (ОГЭ) әзерләнү буенча “юл картасы” нигезендә 13 нче гыйнвар көнне математикадан имтиханны профиль дәрәҗәсендә тапшырырга гариза язган укучылар кабат сынап карау имтиханы тапшырдылар. Нәтиҗәләр алда үткәрелгән диагностик эшләр белән чагыштырып анализланды, математика укытучылары методик берләшмәсе утырышында тикшерелде.

Кышкы каникуллар тәмамланды. Бүгеннән иң озын  саналган III чирек башланып китте. Укучыларга укуларында уңышлар, ә укытучыларга дәрт-дәрман һәм зур сабырлыклар теләп Яңа елда Яңа чиреккә аяк бастык.  

Яңа  чирек  башлану  белән  бергә  бездә  бүген ТАРИХ  ҺӘМ  ҖӘМГЫЯТЬ БЕЛЕМЕ АТНАЛЫГЫна  да  старт  бирелде! 9.01.17- 14.01.2017  көннәрендә дәвам  итәчәк   атналыкның  планын   тарих  укытучыларыбыз  инде әзерләп тә өлгерткән! Атналык   шактый  кызыклы  һәм  эчтәлекле  булырга охшаган. Дустым,  син дә калышма, атналыкта  катнашырга  ашык :  9.01.17- Кроссвордлар бәйгесе:  "XIX гасырда дөнья" (8 сыйныфлар) Әхмәтшина А.Т. 10.01.17 -  Күргәзмә: «Гыйнварның тарихи вакыйгалары»(6 сыйныфлар)Янурова Ә.Ә.Әхмәтшина А. Т. 11.01.17 - Борынгы Греция мифлары (5сыйныфлар) Янурова Ә.Ә. 12.01.17 - «Гасырлар алмашынганда дөнья» викторинасы (8 сыйныфлар) Әхмәтшина А. Т. 13.01.17-Түгәрәк өстәл : «Яшүсмер һәм канун» 7 сыйныфлар Янурова А.А.Әхмәтшина А. Т. 

Хөрмәтле гимназия идарәсе, укытучылар коллективы, укучылар, гимназиянең ашханә һәм техник хезмәткәрләре! Сезне барыгызны да якынлашып килүче Яңа еллар белән котлыйбыз! Барчагызга ныклы сәламәтлек , бәхетле тормышлар, яңа уңышлар, яңа үрләр теләп калабыз. Яңа еллар барыбызга да ХӘЕРЛЕ ЯҢАЛЫКЛАР гына алып килсен!

"Аҗаган" балалар фәнни-күңел ачу үзәге, Башкарма комитетының Мәгариф идарәсе белән берлектә, 25 декабрьгә кадәр гомумшәһәр күләмендәге «классный» сыйныф марафоны бәйгесе үткәрде.
Конкурсның максаты – Казан мәктәпләре арасындагы иң шәп, дус, сыйныфны ачыклау иде. Әлеге конкурста гимназиянең 6 Б сыйныфы укучылары бик теләп катнашты (сыйныф житәкчелэре Янурова Ә.Ә.) 
6 Б сыйныфы укучылары соңгы айларда әлеге конкурс белән «янып» яшәде. Укучыларның сәләтләрен, дустанә мөнәсәбәтләрен күрсәтергә шушы бәйге сәбәпче булып торды. Гимназия укучыларыбыз барлык этапларны үтәп, яхшы нәтиҗәләргә иреште. 6 Б сыйныфы конкурс ахырында диплом, "Аҗаган" балалар фәнни-күңел ачу үзәгенә чакыру билетлары белән бүләкләнде. Бәйге кысаларында бик куп кызыклы ачышлар, онытылмаслык хис-кичерешләр, уңай эмоцияләр алынды. 

Компетентлык – заман таләбе.Компетентлы педагог нинди күнекмәләргә ия булырга тиеш соң? Педагог даими үзгәрешләргә әзер булырга, алдагы көн өчен хезмәт итәргә, һәр башкарган эш нәтиҗәле булсын өчен тырышлык куярга тиеш. Укытучы тәҗрибәдән «акыл» алырга, белемен системага салырга, мөстәкыйль рәвештә даими үз белемен күтәрергә өйрәнергә тиеш. Компетентлы фән иясе төрле мәгълүмат базасыннан үзенә кирәклесен эзләп таба, информацияне сайлап ала, документлар белән эшләгәндә, аларны классификацияли белә. Яңа информацион һәм коммуникатив технологияләрне кыю куллану, яңалыкларны тиз кабул итәргә күнегү кебек компетенцияләргә ия булу да әһәмиятле. Компетентлы укытучы гына компетентлы укучы шәхесе тәрбияли ала. Компетентлы педагог булу өчен нәрсә үзгәртергә? Укытуда компетентлы якын килү нәрсә бирә? II чирек йомгаклары уңаеннан  ике  сәгать   ярымга сузылган педсоветның төп темасы  әнә шул хакта булды.