3 декабрь - тарихи дата буларак «Билгесез солдат көне» - яу кырларында башларын салып, билгесез калган сугышчыларны искә алу көне итеп билгеләп үтелә. Сугышлы тарихыбызны кабат искә алу, "Үлемсез полк"ка рәхмәт әйтеп,  кабат  хәтердән  кичерү  максатыннан , бүген барлык сыйныфларда да бер минутлык   тынлык игълан ителде , искә  алу  рухында  сыйныф сәгатьләре узды. 

Укучылар арасында сәламәтлек, белем һәм җаваплылыкны пропагандалау буенча, балалар һәм яшьләр арасында СПИД һәм башка йогышлы авырулар хакындагы мәгълүматны җәелдерү һәм өстәмә белем формалаштыру максатыннан , 2нче декабрь көнне гимназиянең  актлар залында 10нчы  сыйныфлар  өчен  Бөтенроссия бердәм ачык дәресе узды. Укучылар СПИДка һәм башка йогышлы чирләргә багышланган видеодәрес карады. 

1 декабрь көнне 4 Б сыйныфы укучылары  273 санлы балалар бакчасына юл тотты. Татар язучысы, шагыйрь, журналист, драматург Ләбиб Леронга багышланган кичәгә барды алар. Бакчаның тәрбиячеләре кунакларны ачык йөз белән каршы алдылар. Актлар залы иҗади рухта бизәлгән булуы белән үзенә җәлеп итте. Ләбиб Лерон сүзләренә язылган җыр белән башланып китте кичә. Бакчада тәрбияләнүче балалар “Чәпәләй белән тәпәләй” пьесасын сәхнәләштерделәр. Җыр һәм шигырь үзара чиратлашып барды. Безнең гимназия укучылары да кичәгә “буш кул” белән бармады: бакча балаларын Ләбиб Леронның биографиясе белән таныштырдылар, шигырьләрен яттан сөйләделәр.
Ләбиб Леронга багышланган кичә һәр ике як балалары өчен дә бихисап күңелле узды Мәктәп укучылары бакчага йөргән чакларын исләренә төшерсә, бакча балалары аларга “Укучылар килгән!” дигән ак көнләшү катыш шелтәле караш ташлады... Бүләккә Ләбиб Леронның култамгасы куелган китапларны тапшыру мизгеле якын киләчәктә әдипнең үзен күрү бәхетенә ирешү теләген уятты! 

Туган якның гүзәллеген, аның сихри матурлыгын һәр кеше тоеп үсәдер. Гомәр Бәширов та "Туган ягым — яшел бишек" , "Җидегән чишмә" әсәрләрен балачактан күңелендә калган хатирәләрен яңартып,уйландырган уйларын, табигатьнең пычрануын, чишмәләрнең кибүен күреп, урманнарның кеше, транспорт йөрүеннән тапталып бетүенә ачынып язгандыр... Нәкъ шуңа мөнәсәбәтле рухта бездә дә бүген "ТУГАН ЯГЫМ - ЯШЕЛ БИШЕК" дип аталган, химия һәм биология укытучылары тарафыннан предметара бәйләнешкә багышланган бер бик матур чара узды. Укучылар туган ягыбызның гүзәллегенә, аның табигатенә дан җырлады. Җир шарын пычранудан саклап калу проблемасы күтәрелде. Туган җиребездә үскән һәр үләннең үзенчә файдалы булуына басым ясалды. Чара тәрбияви рухта бик күңелле узды. 

Сары көзнең соңгы көннәре җитеп, салкын кышка аяк баскан бер дәвердә күңелләрне җылытырлык бер бәйрәм бар. Әйе, ул - Әниләр бәйрәме! Мәктәп яшендәге һәр балада үз әнисенә карата тиешенчә хөрмәт хисен уяту , әниләрне зурлау-санлау һәм кадерләү кирәклеген бала аңында яшьтән тәрбияләү максатыннан, 29нчы ноябрь көнне барлык БЕРЕНЧЕЛӘР Әниләр көненә багышланган концерт-тамашада катнаштылар. Тамашачылар, әлбәттә, “бәйрәм хуҗалары” үзләре! Беренчеләр беренче сыйныфка беренче тапкыр килгән сыман, беренчеләрнең әниләре дә , нәкъ менә гимназиядә узган “Әниләр бәйрәме”ндә беренче мәртәбә үз беренчеләрен тамаша кылдылар. Шигырьләр сөйләнде, җырлар җырланды, сәхнәләштерелгән иҗат та читтә калмады, кыскасы, гимназия сәхнәсеннән беренчеләр беренче мәртәбә үз әниләренә мәдхия җырлады.

Бүгеннән бездә ХИМИЯ ҺӘМ ФИЗИКА  АТНАЛЫГЫ  башланып китте! Атна дәвамында укучыларыбызны төрледән-төрле кызыклы чаралар, мавыктыргыч озын тәнәфесләр , уен-көлке, җыр-бию, табышмак- такмазалар көтә!  Химия һәм  физика  фәннәренең  уртак  якларын   белергә  теләсәң, атналыкка ашык!

Ике көн дәвамында кабул ителгән макулатура тапшыруда "иң активлар" билгеле булды: 2а сыйныфы (сыйн.җит.Исмагилова М.А.) 130 кг. макулатура тапшырып, 3нче урынга лаек дип табылды! 6а сыйныфы (сыйн.җит.Баһаутдинова Р.Р.) 150 кг. макулатура тапшырып, 2нче урынга ия булды! 4б сыйныфы (сыйн.җит. Фәсләхова А.Р) 180 кг. макулатура тапшырып, 1нче урынга чыкты! Шулай итеп, гимназиядән барлыгы 1тонна 430кг. макулатура җыеп тапшырылды! Афәрин! Тамчыдан күл җыела... дигәндәй, әгәр һәр сыйныф макулатура тапшыруда актив катнашып, аерым-аерым үз өлешен кертмәгән булса, мондый күрсәткечкә ирешеп булмаган булыр иде. Шуңа да, кайбер сыйныфларның макулатура авырлыгы белән түгел, ә һәр укучының хәленнән килгән күләмдә актив катнашуы белән мактанырга хакы бар. Шундыйлардан 2 В сыйныфы (сыйн. җит. Гүзәлия Хәбибулловна) һәм 7 А сыйныфы (сыйн. җит. Эльмира Рөстәмовна) мактауга лаек! 

25 ноябрь көнне 4 б сыйныфы укучылары “Чәчләремнән сыйпа әле, әнкәй, тойдыр кулларыңның җылысын...” дип аталган әдәби-музыкаль кичә куйды. Кунакка гимназия укытучылары, укучылар һәм, әлбәттә, әниләр чакырылган иде. 4 б сыйныфы укучылары бөек шагыйрьләр, үзләре язган шигырьләрен сөйләп үттеләр. Әниләргә багышланган җырлар җырланды, бию осталыгын күрсәткән укучылар да булды, флейтада да уйнап күрсәтүчеләр табылды... Гомумән, бу кичә күңелле атмосферада узды. Әниләр балаларының талантларын, тырышуларын күреп сокланып карап утырдылар. Зөлфия Минһаҗеваның “Әнием” җыры әниләр күңеленә бигрәк   тә  дә хуш килде. Концерт  соңында  әниләргә сүз   бирелде,  алар  оештыручыларга рәхмәтләрен җиткерделәр.

"Агачларны бергәләп коткарыйк" шигаре астында бүген гимназиядә макулатура тапшыру башланды. Гадәттәгечә, бу эшне без ике көнгә планлаштырдык. Иртәнге 7сәг. 30 мин.тан - 9.00 сәг.кә кадәр гимназия ишегалдында макулатура кабул ителде. Макулатураны кабул итү һәм башкарып чыгу җаваплылыгын тәрбия эшләре буенча директор урынбасары Анжелика Евгеньевна, педагог оештыручы һәм гимназия китапханәсе үз карамагына алды. Исәп-хисап эшенә гимназия Үзидарәсе вәкилләре һәм старосталар тартылды. Макулатура тапшыру әле иртәгә дә дәвам итәчәк.

Бүген 4, 6, 8 сыйныфларда инглиз теленнән мониторинг узды. Мониторинг узачак кабинетлар тиешенчә җиһазландырылды. Мониторинг дәвамында тәртип , таләп һәм кагыйдә бозулар күзәтелмәде.