ТР Мәгариф һәм фән министрлыгының «2016 -2017 уку елында Татарстан Республикасы гомуми белем бирү оешмаларында укучыларның башлангыч мәктәптән төп мәктәпкә күчеш чорындагы беренчел белемнәрен диагностикалау» боерыгы нигезендә 28 нче сентябрь көнне гимназиянең барлык 5 нче сыйныф укучылары математика фәненнән махсус эш башкарды. Эшне башкару өчен 1 дәрес (45 мин.) вакыт бирелде. Беренчел белемне диагностикалау барлык таләпләргә туры китереп уздырылды. 

Бүген , ягъни 27 сентябрь көнне, Казанның Вахитов районы прокурор ярдәмчесе, 2 нче класслы юрист Р. Ф. Галеев гимназиядә кунакта булды. Укытучылар коллективы һәм укучылар белән очрашып, гимназиянең 9 нчы сыйныф укучыларына «Наркотик (әфьюн һәм кешенең психик халәтенә тискәре йогынты ясаучы) матдәләрнең законсыз әйләнеше өлкәсендәге җинаятьләрне булдырмау» дигән темага чыгыш ясады.

“Милләтләр кроссы” – Россия территориясендә үткәрелә торган спорт төрләре буенча иң масштаблы спорт чарасы. 24нче сентябрь көнне әлеге чарада гимназиядән 30 укучы катнашты. 5 км.га куелган норма буенча 10нчы сыйныф укучылары тулысынча (малайлар+кызлар), ә 8 А сыйныфыннан кызлар командасы ярышта үз көчләрен сынады. Массакүләм йөгереш кояшлы шимбә иртәсендә сәг.10.00 да башланып, Казанның үзәк стадионында старт алды. 

Гимназиядә Татар музыкаль фольклор түгәрәге үз эшен башлап җибәрде. Түгәрәккә бик теләп башлангыч сыйныфлар язылды. Татар музыкаль фольклор сәнгате серләренә төшенергә, җырлы-биюле уеннарга һәм фольклор уен коралларында уйнарга укучыларны М. А.Балакирев исемендәге сәнгать мәктәбе укытучысы Лилия Искәндәровна өйрәтә. Укытучы кубыз, курай, домбра, тальян кебек милли уен кораллары белән үзе ни рәвешле “якыннан аралашса”, балаларны да шуңа өнди. Түгәрәк эшендә уңышлар телибез аңа. 

Гимназиядә гомуми белем бирүче мәктәпләр арасында узачак Бөтенроссия олимпиадасының мәктәп этаплары башланып китте.  Шулай итеп, һәр укучыга үзенең белемен, осталыгын күрсәтергә мөмкинлекләр бар.  Мәктәп турында иң күп балл җыеп, җиңүгә ирешкән укучылар олимпиадаларның муниципаль этабында көч сынашачак. Барлык катнашучыларга да уңышлар телибез!

Гимназия идарәсе һәм сайлау комиссиясендәге кайбер укытучылар 18нче сентябрь - ял көне булуына да карамастан, якшәмбе иртәсен көндәлек эш режимында каршы алды. Бу көнне үзенең гражданлык бурычын үтәргә ашыккан меңәрләгән кешегә берүк вакытта ике сайлау участогы ( №51 һәм №52 сайлау участоклары ) ролен үтәде гимназия. Югарыда атап үтелгән сайлау участокларын үзенә берләштергән гимназиядә Казанның Девятаев, Д.Али, Зайцев,К.Якуб, Кызыл Татарстан, Меховщиков, М.Гафури, Эш Урамы, Казан автовокзалы, Порт урамнарында урнашкан йортларда яшәгән халыкка иртәнге 8сәг.тән алып, кичке 20сәг.кә кадәр хезмәт күрсәтелде. Шулай ук, төрле сәбәпләр аркасында, үзләренең беркетелгән торак-территориаль яшәү урынында тавыш бирә алмаган студентлар да “беркетелү таныклыгы” документы белән сайлау участокларына кабул ителде. Ассызыклап үтәргә кирәк: тавыш бирүчеләр арасында яшьләр күп иде. Сайлаганнан соң тапшырылган “Мин тавыш бирдем” льготалы беләзекләре дә сайлау көненә оригинальлек өстәде.

16 сентябрь көнне гимназиянең мини-футбол җыелма командасы, алдагы көннәрдә көтелгән сайлауларга багышлап, яңа төзелгән мәктәп яны мини футбол кырында үзенең беренче җитди уенын күрсәтте. Уенның иң кызган мәлендә яңгыр ява башласа да, табигатьнең бу күренеше уенчыларның кәефләрен боза алмады: мини-футболчылар уеннарын гимназиянең спорт залында дәвам итеп, исәп- хисап буенча 7 А сыйныфы өстен чыгып, уен нәтиҗәләре һәр очракта гимназия җыелма командасы файдасына төгәлләнде.

Җыелыш үткәрү – сыйныф җитәкчесенең ата-аналар белән эшләүдәге бер алымы. Мондый җыелышларда балалар һәм ата-аналар коллективы тормышының проблемалары карала. 15 сентябрь көнне гимназиядә яңа уку елының беренче ата-аналар җыелышы узды. Җыелыш тәрбия мәсьәләләре, балаларның холкы, белеме һәм әхлак дәрәҗәсе хакында җентекләп уйлану, киңәшү рәвешендә барды, балаларның җәмәгать эшләрендә катнашуына, әхлак мәсьәләләренә игътибар ителде. 

Узган “Изгелек атнасы”на йомгак ясап, “изгелектән күрелгән игелек”кә дә нәтиҗәләр чыгарыр чак җитте. Шул нисбәттән һәм гимназиянең эчке кагыйдәләрендәге үзгәреш һәм яңалыкларны игълан итү өчен 14 сентябрь көнне гимназиядә җыелыш узды. Гимназиянең директоры Г.Г. Шәмсиева хәйриячелек үсешенә үзләреннән өлеш кертеп, балалар аңында мохтаҗларга ярдәм итү теләге тәрбияләү аркылы шәһәркүләм «Мәрхәмәтлелек ярминкәсе»н оештыруда катнашкан укытучыларга һәм сыйныф җитәкчеләренә, хәйрия концертын оештырган педагогларга гимназия идарәсе исеменнән олы рәхмәт һәм мактау сүзләрен җиткерде. Хәйрия товарларын сатып, ярминкәнең изгелек казнасын мөмкин кадәр тутыру максатыннан тырышлык куйган 10 нчы сыйныф укучыларының күрсәткән хезмәте аерым бәяләнде. Ярминкә балалар өчен дә, олылар өчен дә күңелле һәм файдалы үтте.

“Мәрхәмәтлелек ярминкәсе” дәвамында гимназия укучылары хәйрия товарларын сату белән генә чикләнеп калмады. “Ярминкә булгач, ярминкә булсын...” , дип элеккеге гореф-гадәтләребезне дә истә тотып, “Мәрхәмәтлелек ярминкәсе”нә килгән халыкның күңелен күтәрү максатыннан 30 минутлык концерт программасы да әзерләнде. Концертта милли рух булдыру төп шартларның берсе булса да, программаның тулаем эчтәлеге изгелеккә багышланган иде. Бу исә килгән халык колагына да һәм укучыларыбызны тәрбияләүдә дә үз ролен үтәгәндер, дип ышанасы килә, чөнки “изгелек”, “мәрхәмәтлелек”, “ярдәм” төшенчәләре сүз генә булып калмыйча, һәрдаим безнең гамәлләребездә дә чагылырга тиеш. “Мәрхәмәтлелек ярминкәсе”нә әзерләнгән “Изгелек җирдә ятмас” хәйрия концерты шуны максат итте.