Кадерле укытучылар, укучылар һәм әти-әниләр!

Сезне барчагызны да якынлашып килүче Яңа ел бәйрәме белән тәбрик итәбез! Яңа ел яхшы хәбәрләр, яңа вакыйгалар, яңа сөенечләр алып килсен! Кайгы-хәсрәтләр, борчу-мәшәкатьләр сезне урап узсын! Һәрберегезгә тынычлык, иминлек, сәламәтлек һәм уңышлар телибез! Яңа елда гына түгел, ә ел буе кәефләрегез һәрвакыт күтәренке булсын!

Яңа еллар килсен бәхет алып,

Яңа еллар килсен елмаеп.

Күңелләрдә мәңге шатлык булсын,

Яшәмәгез, дуслар, моңаеп.

Иң изге теләкләр белән гимназия коллективы.

3А сыйныфында бик кызыклы чара үтте. Укучылар Америка Кыш бабае Санта Клауска хат язу буенча проект эше башкардылар. Тик ул гадәти хат түгел, укучылар Кыш бабайга үзләренең теләкләрен инглиз телендә җиткерделәр.

Бүген гимназия янәдән җыр-моңга күмелде, чөнки бездә урта сыйныф укучылары өчен бәйрәм кичәсе үтте. Укучылар берсеннән-берсе кызыклы һәм эчтәлекле номерлар тәкъдим иттеләр. Күңелле җыр-биюләр, уеннар белән бәйрәмнең үткәне сизелми дә калды.

Асоциаль күренешләрне кисәтү максатыннан, 8 нче сыйныфта “Яхшыларга җирдә яшәү күңеллерәк” дип аталган сыйныф сәгате үтте. Сыйныф сәгате барышында  укучылар "яхшылык" төшенчәсенең асылына төшенделәр, кеше тормышында аның ролен һәм әһәмиятен билгеләделәр.

24 декабрьдә  “Татмедиа” бинасында “Сабантуй” журналы редакциясе уздырган “Шәвәли премиясе”ндә җиңү яулаган балаларны котладылар. Хикәя, әкият һәм шигырь номинацияләрендә катнашкан укучыларга акчалата бүләк һәм диплом тапшырдылар. 5 “б” сыйныфы укучысы Муллагалиева Зилә шигырь номинациясендә 3 урынга лаек булды.

Бүген гимназиядә башлангыч сыйныфлар өчен Яңа ел бәйрәме гөрләп узды. Бәйрәм дәртле җыр-биюләр, матур шигырьләр, күңелле уеннар белән үрелеп барды. Кыш бабай белән Кар Кызы укучыларны тәмле бүләкләр белән сөендерделәр. Бәйрәм бик күңелле үтте.

Бүген, югары санлы технологияләр заманында, социаль челтәрләр төп аралашу чарасы булып тора.  Тик виртуаль дуслар белән аралашу вакытында да куркынычлар килеп туарга мөмкин икәнен һәрвакыт истә тотарга кирәк. Бүген урта сыйныфларда “Социаль челтәрләр: виртуаль дуслар белән куркынычсыз аралашу” темасына багышланган сыйныф сәгате үтте. Сыйныф сәгате барышында укучылар дуслар белән реаль һәм виртуаль аралашуның аермалары турында фикер алыштылар. Шулай ук виртуаль аралашуга бәйлелек билгеләр һәм шәхси тормышны социаль челтәрләрдә күрсәтү кирәкме икәнен ачыкладылар.

Бүген гимназиядә ата-аналар җыелышы узды. Чара “Гаиләнең әхлакый  кыйммәтләре” дигән темага һәм уку елының беренче яртыеллыгына нәтиҗә ясауга багышланды.

Урта сыйныф укучылары арасында "Иң яхшы Яңа ел открыткасы" бәйгесе үтте. Барлык сыйныфлар да бәйгедә актив катнаштылар. Матур рәсемнәр төшерелгән котлау открыткалары һәркемнең күңеленә хуш килде.

Матур бәйрәм залында бүген Яңа ел бәйрәменең төп бизәге – яшел чыршы үз урынын алды. Гимназия үзидарәсе әгъзалары бәйрәм залын һәм чыршы бизәүдә актив катнаштылар.