Балаларның интернет челтәрендә куркынычсызлыгын тәэмин итү һәм әлеге эшкә карата ата-аналарның игътибарын арттыру максатыннан, ата-аналар өчен белешмәлекләр әзерләнде һәм таратылды.

Башлангыч сыйныфлар арасында кыш һәм Яңа ел темасына багышланган кул эшләнмәләре бәйгесе үтте. Аларның һәрберсе үзенчәлекле, зәвык белән эшләнгән. Әлеге кул эшләреннән күргәзмә оештырылды.

Яңа ел алдыннан гимназиядә бик күп бәйгеләр үтә. Шуларның берсе - кабинетларны бизәү. Барлык сыйныфлар бу бәйгедә бик актив катнаштылар.

6Б сыйныфы укучылары М. Горький исемендәге мәдәният һәм ял паркында булдылар. Кызыклы сәяхәттән укучылар канәгать калдылар.

         Россия Федерациясе Мәгариф министрлыгы карары нигезендә ел саен педагоглар арасында “Ел укытучысы” бәйгесе уздырыла. Бәйге кысаларында укытучылар дәрес, сыйныф сәгате, педагогик остаханә, мастер класс күрсәтә.

         20 нче декабрьдә “Ел укытучысы – 2022” бәйгесенең  Вахитов һәм Идел буе районы укытучылары арасында үткәрелгән турына йомгак ясалды. Гимназиябез укытучылары, бәйгенең барлык этапларында да уңышлы чыгыш ясап, зур җиңүләргә ирештеләр. Вәлиева Роза Әгъләмовна “Предмет укытучысы” номинациясендә I урынга, Гарипова Илүсә Илдусовна “Педагогик дебют” номинациясендә I урынга, Җәләева Гөлүзә Азатовна “Туган тел һәм әдәбияты” номинациясендә II урынга  лаек булды. Укытучыларыбызны зур җиңүләре белән котлыйбыз, иҗади уңышлар телибез!

Асоциаль күренешләрне кисәтү максаты белән, гимназия психологы җитәкчелегендә, 8-10 нчы сыйныф укучылары арасында «Сәламәт яшәү рәвеше» дигән анкета үткәрелде. Анкетаның максаты – укучыларның сәламәт яшәү рәвеше турында белем дәрәҗәсен һәм сәламәт яшәү рәвешенә карата мөнәсәбәтләрен ачыклау.

Гимназия укучылары әти-әниләре белән Иске Татар бистәсендә Чыршы ачылышы бәйрәмендә булып кайттылар.

Яңа ел – барыбыз өчен дә зарыгып көтеп алынган иң сихри һәм тылсымлы бәйрәм ул. Гимназиядә яңа ел бәйрәменә әзерлек гөрләп бара. Бу атна иртәнге зарядкада үзгәрешләр белән башланып китте. Бүгеннән укучылар өчен иртәнге зарядкада  Яңа ел бәйрәменә багышланган җырлар яңгыраячак.

7 нче сыйныф укучылары хуҗасыз калган этләр приютында булып кайттылар. Алар хуҗасыз этләрнең нинди шартларда яшәве белән таныштылар һәм аларга күчтәнәч итеп ашамлыклар алып бардылар.

Интернет ял итү, дуслар белән аралашу чарасы булып тора. Тик соңгы вакытта интернетта алдау, янау кебек хулиганлык күренешләре бик еш очрый. Өлкәннәргә мондый  күренешләрнең барлыгын истә тотарга һәм Интернетта балаларның куркынычсызлыгын тәэмин итүгә зур игътибар бирергә кирәк. Шул максат белән, укучыларга “Куркынычсыз интернет” дип аталган белешмәлекләр таратылды.