Мәктәп яны тәҗрибә участогында җәйге эшләр гөрли. Кура җиләге, карлыган җыябыз. Яшелчәләрнең аралары йомшартыла, чүп үләннәре утала. Укучыларыбызның тырыш хезмәте нәтиҗәсе көз көне мул уңышта күренер.

Җәйнең икенче ае башланып китте. Укучыларыбызның кайберләре мәктәп яны тәҗрибә участогында  җәйге практикаларын уза. 14 яше тулган 9 укучыбыз июнь аенда төрле оешмаларда эшләде. Ә  бүгеннән 18 укучыбыз   эш башлап җибәрә. 

Бүген "Дуслык" лагеренда соңгы көнебез. Күңелле экскурсияләр, төрле бәйгеләр, кызыклы һәм файдалы әңгәмәләр, очрашулар белән 21 көннең узганы сизелмәде дә. Бу көннәрдә мәктәбебез "Юни" һәм "Барс" отрядларына бүленеп үзара ярышучы балаларның шат авазларыннан яңгырап торды. Җәйге каникулның алдагы көннәре дә истә калырлык булып узсын иде.

Бүген 9 укучыбыз кулларына аттестат алды. Мәктәп директоры, укытучылар, әти-әниләр аларга уңышлар теләп, иң изге теләкләрен җиткерделәр. Мәктәптә алган белем һәм тәрбия укучыларыбыз юлында маяк булсын, һәрберсенең хыяллары чынга ашсын иде. Хәерле юл сезгә, укучылар!!!

20нче көнебез "Без-спортсменнар" дип аталды. "Минем яраткан спорт төрем" рәсемнәр конкурсы уздырылды. Һәр бала үз рәсемен яклап, чыгыш ясады. 2011, 2012, 2013нче елларда куелган сәламәтлек театрларының видеоязмаларын карадык. Спортзалда күңелле стартлар вакытында барыбыз да җитезлегебезне сынадык. Лагерь беренчелегенә бадминтон ярышы уздырдык. Кызлар арасынды Юзеева Нәркизә-1 урын, Каримова Руфинә- 2 урын, Шакирова Гөлназ- 3 урын, малайлар арасында Хөсәенов Рәсим -1 урын, Халиуллин Әмир -2 урын, Хөснетдинов Альмир -3 урын яулады. Көнебез бик нәтиҗәле узды.

Бүген бездә "Иң-иңнәр көне".  Барыбызда бер теләк :"Иң-иңнәр "арасында  булу."Иң озын толым"иясе Гатиятуллина Гөлүсә."Иң оста җырчы"-Закирова Энҗе, "Иң оста биюче"- Шафиков Рүзәл,"Иң оста нәфис сүз остасы"-Кәримова Рүзинә,"Иң оста рәссам"-Шакирова Гөлназ,"Иң күп бантиклы"лар арасында- Шәрипова Инзилә җиңүче  булдылар.

"Гиннес рекордлары белән танышканнан соң, Бөек Ватан сугышында һәлак булган авылдашларыбыз истәлегенә куелган һәйкәлгә бардык."Хәтер шәме" акциясе уздырдык.Һәйкәлгә чәчәкләр куйдык. Илебез азатлыгы өчен һәлак булганнарны искә алу максаты куелган бу көнебез дә бик файдалы узды.

Бүгенге көнебез "Сәламәтлек һәм спорт көне" дип аталды."Җәйге кәеф" темасына асфальтта рәсемнәр бәйгесе һәм  "Взвейтесь кострами, синие ночи" җырын өйрәнүдән соң көндезге ашны ашадык та, районыбыз тарихы белән танышу максатыннан Өтернәс шәһәрчегенә юнәлдек. Аннан соң "Саба" бассейнына бардык.Бассейн безнең шат авазлардан яңгырап торды. Кызыклы бәйгеләр, күңелле экскурсияләр белән тагын бер көн артта калды.

"Яхшы кәеф көне" дип исемләнгән бу көн чынлап та барыбызның да күңелне күтәрерлек булды. Нысы елгасы буендагы сәяхәт тә, елга буенда уйнаган хәрәкәтле уеннар да ошады. Аннан соң "Сәламәтлегең үз кулыңда" темасына сөйләштек. "Кызлар-малайлар, малайлар-кызлар"  бәйгесе бик җанлы узды. "Иң матур кыз" бәйгесе җиңүчеләре: Гарипов Фәнзил, Гарипов Фәннур, Хөснетдинов Альмир, Шафиков Рүзәл, Халиуллин Әмир. Малайларыбызны кызлардан аерырлык та түгел иде. Бу көнебез дә бик күңелле узды.

"Куркынычсыз тәгәрмәч" исеме астында узган көнебез аеруча истә кала торган булды. Иртәнге гимнастика ясап, иртәнге ашны ашаганнан соң "Юлда йөрсәң,бул өлгер, юл кагыйдәсен нык бел!" дигән рольле уен уйнадык. Аннан соң Кече Кибәче спорт-мәдәни комплексына экскурсиягә бардык, анда телевидениегә төштек. Көндезге аштан соң "Шалкан"  әкиятен юл йөрү кагыйдәләре белән сәхнәләштердек. Юл йөрү кагыйдәләрен өйрәнүгә багышланган бу көн барыбыз өчен дә бик файдалы булды.

"Дуслык" лагеренда бүгенге көнебез Казан шәһәрендә узачак Универсиадага багышланды. Иртәнге аштан соң "Универсиада-2013" темасына видеоролик күрсәтелде. Аннан соң шушы ук  темага багышлап асфальтта рәсемнәр бәйгесе узды. Бәйгенең җиңүчеләре: Шавалиева Гөлназ, Мухаметова Алия һәм Альбина, Хөсәенов Рәсим. Төрле спорт уеннары белән узган күңелле эстафетада да балалар актив катнашты. Көндезге аштан соң "Иң акрын йөрүче велосипедчы" ярышында Шарафиева Тәслимә, Хөсәенов Рәсим, Хамидуллина Ләйлә  җиңүче булып танылды. Тизлектә һәм җитезлектә сыналган бу көн дә истә калырлык булып узды.