20 гыйнвар - боз сөңгеләре көне. Тамчылардан җыелган боз сөңгеләре бик матур, ләкин түбәләрдән шуып төшеп, алар бик зур  күңелсезлекләр китереп чыгарырга мөмкин. Шуңа алар мәктәп түбәләреннән һәрчак чистартылып тора. Печмәнтау башлангыч мәктәбендә үткән "Сәламәт булыйк" дигән тәрбия сәгатендә балалар түбә асларында сак йөрергә кирәклеген белеп кенә калмадылар, боз сөңгеләренең пычрак икәнлеген дә ачыкладылар.  Нәни куян малаеның боз сөңгеләрен ялап авырып ятканын белгәч, балаларда  аны кызгану хисе уянды һәм алай эшләргә ярамаганлыгына алар үзләре дә инандылар.. 

  Татар теле –ЮНЕСКО тарафыннан бөтендөнья халыкара аралашу теле дип саналган 14 телнең берсе. Бу – туган телебез белән горурланырлык мөһим фактор.Туган тел.... Һәркем өчен дә газиз сүз бу. Чөнки иң кадерле, бер нәрсә белән дә алыштырылмый торган “әни”, “әти”,”әби”, “бабай” сүзләрен башлап туган телдә әйтәбез. Туган үскән ил-җирнең якынлыгын, Ватанның газизлеген без туган тел ярдәмендә тойганбыз. Шул уңайдан безнең мәктәптә дә “Туган телем язмышы” дәрестән тыш чара үтте.

Федераль дәүләт белем бирү стандарты буенча 1 сыйныф укучылары дәрестән соң эшчәнлек белән дә шөгыльләнә. Печмәнтау башлангыч мәктәбе укучылары кошлар өчен җимлекләр ясадылар. 

Дәрес беткән, укучылар

Шау-гөр килеп кайнаша.

"Ашханә" ясыйбыз, диләр,

Менә сиңа тамаша.

Су савыты, бүләк-тартма,

Сызалар да кисәләр.

Әллә ишек, әллә тәрәз,

Нәни тишек тишәләр.

Ярма,орлык салып куйгач,

Булды менә "ашханә".

Кунак булып, тамак ялгап,

Нәни кошлар шатлана.

 Мәктәбебез укучылары дәрестән соңгы вакытларын файдалы һәм күңелле итеп уздыралар. Кышның матур мизгелләрен кулдан ычкындырмыйча, хоккей уйнап. чана - чаңгы шуып калырга тырышалар. 15 январь көнне 6, 7 класс укучылары арасында үткән хоккей ярышын барыбыз да кызыксынып карадык, көч биреп тордык.

  14 нче январь көнне  мәктәптә ата-аналар җыелышы булды. "Балаларыбызны афәтләрдән саклыйк! " темасына доклад белән   Ахметгалиева Ә.Х. чыгыш ясады. Тәрбия эшләре буенча директор урынбасары Галиева Г.Р. I яртыеллыкның тәрбия эшенә анализ ясады. Укыту эшләре буенча директор урынбасары Гарипова Н.И. I нче  яртыеллык нәтиҗәләре, ОГЭ га әзерлек турында сөйләде. Ахырдан ата-аналарны кызыксындырган сорауларга директор  Мустафина А.В. җавап бирде. Җыелышның икенче өлеше классларда дәвам итте.

Каникулдан килгәч, Печмәнтау башлангыч мәктәбе укучылары үзләренең Әлифбадан өйрәнгән хәрефләрен искә төшереп, яңа сүзләр ясап, белемнәрен ныгыталар. 

Бүген мәктәптә педагогик киңәшмә булды. Киңәшмәдә I яртыеллыкның укыту - тәрбия эшенә анализ ясалды, ОГЭ га әзерлек мәсьәләсе каралды. "Укыту һәм тәрбия эшендә компетентлык, хезмәттәшлекнең роле" дигән темага эшлекле сөйләшү үткәрелде.

  Сәламәт яшәү рәвешен пропагандалау, спортны популярлаштыру, укучыларны һәм авыл яшьләрен  физкультура һәм спортка тарту максатыннан мәктәп катогында һәм спорт залында ярышлар һәрдаим үткәрелеп тора. Мәктәпне тәмамлап, төрле уку йортларында белем алучы яшьләр белән  укучылар арасында узган   хоккей ярышы аеруча дулкынландыргыч рәвештә үтте.

Каникулда ОГЭ га әзерлек эше тукталмады, 9 нчы класс укучылары өчен консультацияләр даими үтте. 10 январь көнне математика укытучысы Гарипова Ф.Ф. математикадан консультация үткәрде. Укучылар белән берлектә экзамен эшләрен эшләп,  җентекле анализ ясап барылды. Бу көнне укучылар өчен бик күп файдалы мәгълүмат бирелде

Республика күләмендә үткәрелә торган "Дулкыннар" конкурсында катнашу  максатыннан рәсем конкурсы үткәрдек.  9 нчы класс укучысы Ахмадуллина Рузиләнең эше иң яхшысы дип табылды һәм республика конкурсына җибәрелде.