Язгы каникулны файдалы һәм күңелле итеп уздырабыз.

    21 март көнне мәктәбебездә җырлы-биюле, уенлы, коймаклы-боткалы Нәүрүз бәйрәме үтте. Нәүрүз – борынгыдан килгән язгы бәйрәм. 21 мартта уза торган бу бәйрәм яз килү, язгы кыр эшләре башлануны белдерә. Ул шулай ук табигатьнең яңару чоры да. Бүген без йолаларга яңа сулыш, җан өрәбез. Бәйрәмнең төп кунагы – Нәүрүзбикә һәм Кыш бабай булдылар. Аларны кул чабып һәм “Нәүрүз, мөбарәкбад!” дигән сүзләр белән каршы алдык. Нәүрүзбикә җыелган кунакларны чын күңелдән тәбрикләп, иген уңышы мул булсын, ел әйбәт булсын дигән иң изге теләкләрен теләде. “Әле күңелле итеп җырлап-биеп, уйнап алырга да вакытыгыз бар”, – дип барча халыкны бәйрәмне дәвам итәргә чакырды.Уеннарда укучылар берсен-берсе уздыра-уздыра ярышты. Кемдер биеде, кемдер җырлады, кемдер тизлеккә йөгерде, күмәкләшеп, командаларга бүленеп бау да тартышты... Нинди генә ярышлар үткәрелмәде бу бәйрәмдә! Бәйрәм бүләксез булмый дигәндәй, Нәүрүзбикә җиңүчеләргә күчтәнәчләр дә тапшырырга онытмады. Бәйрәм рухы алга таба да сүнмәсен һәм сүрелмәсен, халкыбызның гореф-гадәтләре онытылмасын иде.

Печмәнтау башлангыч мәктәбе укучыларын бүген "Күңелле стартлар" куандырды. Аз гына бала булса да, аларның шат көлүеннән мәктәп яңгырап торды. Икешәрләп-икешәрләп кенә ярышсалар да, бер-берсе өчен җан атып торды алар.

Каен һәм нарат бөресе җыюда Печмәнтау башлангыч мәктәбе укучылары да катнашты. Укучылар бөреләрнең төрле дарулар ясауда кулланылганын  белделәр. Интернет аша бөреләр турында күп мәгълүмат алдылар. Табигатьне сакларга кирәк икәнлеген дә искә төшерделәр.

   14 март көнне мәктәбебездә Әлифба бәйрәме үткәрелде. Әлифба бәйрәме – кабатланмас балачак иленең иң зур бәйрәмнәренең берсе. Җир йөзендә кем генә булмасын, кайда гына эшләмәсен, ул үзенең юлын Әлифбадан башлаган. Ул зур дулкынлану белән үзенең  кулларына тәүге тапкыр Әлифба алганын искә төшерә. Әлифба бәйрәме - әле кайчан гына 1 сентябрьне  гаилә белән көтеп алган, тәүге мәртәбә мәктәп бусагасына атлап кергән нәни балаларның белем дөньясындагы беренче җиңүләрен бәйрәм итү ул. Кичәдә  укучылар төрле матур җырлар, дәртле биюләр, нәфис сүзләр башкардылар, белемнәрен сынадылар. Бәйрәмгә шулай ук әти-әниләр дә килгән иде.

"Нәүрүз" - фарсы теленнән тәрҗемә иткәндә, ул - "яңа көн" - яңа тормыш башлану һәм кышкы озын йокыдан соң табигатнең уянуы дигәнне аңлата. 2009 елда НӘҮРҮЗ  ЮНЕСКО тарафыннан кешелекнең материаль булмаган мирас исемлегенә кертелә. 2010 елдан БМОның генераль сессиясендә 21 март - язгы көн һәм төн тигезләшүе - "Халыкара Нәүрүз көне" дип игълан ителде. 

Борын үткән заманнан,

Болгар белән Казаннан,

Җаек белән Иделдән

Бу бәйрәм безгә килгән.

Печмәнтау башлангыч мәктәбендә  Нәүрүз бәйрәменә укучыларның әти-әниләре чакырылды. Гаиләләр, әтиләр һәм әниләр ярышы, уеннар балаларның җыр-биюләре, шигырьләре белән үрелеп барды. 

      Мәктәбебездә "Бөек Җиңүнең 70 еллыгына - 70 оя" акциясе дәвам итә. Укучыларыбыз бик теләп сыерчык оялары ясап алып килделәр. Без сезне каршы алырга әзер, кошкайлар!

"Бөек Җиңүнең 70 еллыгына - 70 оя!"  бәйгесенә кушылып, Печмәнтау башлангыч мәктәбе укучылары да язгы кунакларга оя әзерләделәр.

Җырчы кошым килер тиздән,

Йөрмәсен оя эзләп,

Кайчан килеп табар диеп,

Йөримен аны күзләп.

Җил-яңгырлар үтмәсен дип,

Әти белән тырыштык.

Куаныр әле кошчыгым, 

Бушка китмәс тырышлык.

                             М.Шәйхетдиннова

 15 март  – Халыкара дөрес   туклану көне. Кеше яшәешенең мөһим факторларының берсе булганга күрә, туклану мәсьәләсенә дөнья күләмендә җитди игътибар бирелә. Ә сәламәт булу өчен нишләргә кирәк соң? Сәламәт туклану серләренә багышлап үткәрелгән класс сәгатьләрендә укучылар шушы сорауга җавап эзләделәр.

Иске Кенәр башлангыч мәктәбе  укучыларының "70 еллыкка-70 оя!" бәйгесенә  оялары әзер.Барлык укучылар да актив катнашты.

Кил, кошчыгым,кил!

Күз алмыйча күктән,

Көн дә сине көтәм,

Оя дисәң,ояң

Әзерләнгән күптән!