Куеп бөтен көчемне,

Калдырып бар эшемне,

Рәсем ясыйм! Әллә мин

Ясамаслык кешеме?

Килеп чыкты бит менә!

Вәт, ичмасам, бу-рәсем!

Болай матур ясагач,

Мин рәссамдыр, күрәсең.

1-4 класс укучылары үзләренең иң яраткан әкиятләренә рәсемнәр ясап килделәр. Шул рәсемнәрдән бик күңелле күргәзмә оештырылды.

    Башлангычлар атналыгы дәвам итә. Бүген башлангычларны "Әкиятле балачак" дип исемләнгән кичә үзенә дәште. Кичә ике команданың ярышы формасында алып барылды. Командалар 6 тур үттеләр һәм үзләренең бик күп әкиятләр белүләрен күрсәттеләр.

Бөек Җиңүнең 70 еллыгын каршылау уңаеннан Иске Кенәр башлангыч мәктәбе укучылары арасында авыл китапханәсендә "Җирдә тынычлык хакына" дигән исем астында шигырь уку бәйгесе уздырылды. 1 урынны 4Б сыйныфы укучысы Фәттахова Лилия алды. Ул бик оста итеп А.Алишның "Көтмә инде,көтмә..." шигырен сөйләде. 

Китапханәче Маннаф абыйлары укучыларны  "Утлы еллар кайтавазы" исемле китаплар күргәзмәсе белән таныштырды.

Кайгы китерә сугышлар,

Туктасын иде алар.

Тынычлыкта яшәсеннәр

Җирдә барлык балалар!

Югалткан әйберең түгел, −
Эзләмичә тапмыйсың.

Печмәнтау башлангыч мәктәбе укучылары башлангычлар атналыгын шундый исем  астында башлап җибәрделәр. "Тылсымлы куллар", "Салават күпере" журналларыннан төрле табышмакларга җаваплар таптылар, кроссворд һәм сканвордлар чиштеләр. Төрле кызыклы башваткычларга юлыктылар. Күмәкләшеп эшләгәч, һәр сорауга җавап табыла.

Мәктәбебездә 28 нче гыйнвардан башлангычлар атналыгы старт алды. Атналыкның планы  "Әдәбият елы"на  һәм Бөек Җиңүнең 70 еллыгына багышланган чараларны үз эченә алачак.

           Бүген башлангыч класс укучылары арасында "Тапкырларга - табышмак" дип аталган бәйге уздырылды. Укучылар төрле табышмакларга җаваплар эзләделәр, экран аша ребуслар чиштеләр.Бәйге бик кискен барды. Нәтиҗәдә 4класс укучысы Магсумов Венер I , 4 класс укучысы Хасанов Ильмир II , 3 класс укучысы Мухаммадиев Дилүс III урынны алдылар. Табышмакларны чишүдә актив катнашкан укучыларга истәлекле бүләкләр тапшырылды. Афәрин, укучылар!

   Бүген мәктәп янәшәсендәге шугалак  хоккей сөючеләрне үзенә җыйды. Биредә  укучылар арасында хоккей ярышы узды. Ярыш өченче тапкыр оештырыла Һәм аның популярлыгы көннән - көн үсә бара.  Көч сынауда 2 команда катнашты. Ярыш 8:5 исәбе белән Печмәнтаулыларның җиңүе белән тәмамланды. Иске Ашытлылар икенче урын белән канәгатьләнделәр.

24 нче январьда Иске Кырлайда Татарстан Республикасының көчле чаңгычысы Фәнил Гәрәфиев истәлегенә багышланган чаңгы ярышы үткәрелде. Анда безнең мәктәп командасы( Габдрахманова Гөлнара, Габдрахманов Илназ, Фаттахов Инсаф, Фаттахов Илнар, Биктов Илсаф, Гыйззәтуллина Илүсә, Ахметов Фәнзил, Махмутова Зәринә) 3 урын алды. Спортчыларны зур җиңүләре белән котлыйбыз!

   Бөек Ватан сугышы вакыйгалары торган саен ерагая бара. Тик ул вакыйгалар халык хәтереннән беркайчан да җуелмаячак. Чөнки сугыш илебезнең бер генә почмагына да, бер генә йортына да үзенең кайгылы кулы белән кагылмыйча калмаган. Без барыбыз да  бүгенге тыныч тормышта яшәвебез өчен сугыш кырында һәм тылда үз - үзләрен аямыйча көрәшкәннәр алдында бурычлыбыз. Инде авылыбызда бер генә исән  сугыш ветераны да калмады. Мәктәбебез укучылары тыл ветераннарының өйләрендә булып, алар турында истәлекләр язып алдылар. 22 январь көнне "Җирдә Җиңү хакына" дигән исем астында үткәрелгән шигырь укучылар бәйгесендә дә укучыларыбыз теләп  катнаштылар.

Кышкы салкын көннәрдә кошларга азык табу кыен. Печмәнтау башлангыч мәктәбе укучылары  үзләре ясаган  җимлекләрне мәктәп бакчасындагы агач ботакларына элеп куйдылар. Аны һәркөн карап, ярмалар, орлыклар, ипи валчыклары өстәп торалар.

Кил,кошчыгым, салкыннарда

Йөрмә инде тилмереп.

Килсен башка дусларың да

Биредә сине күреп.

Киләсең дә, ә үзеңне

Күргәнем юк һич кенә.

Тукланасың ахры килеп,

Бары иртә-кич кенә

                М.Шәйхетдиннова