Туган тел көне уңаеннан Печмәнтау башлангыч мәктәбендә "И газиз Туган телем!" дип аталган  викторина  булды. Ребуслар чишү, тел турында халык мәкальләрен җыеп төзү кебек уеннар балаларда тагын да кызыксыну уятты. Тел турында язылган  әсәрләрне, аларның авторларын искә төшереп алганнан соң, "Туган тел" җыры башкарылды.

Бүген Иске Кенәр башлангыч мәктәбенә кунакка  кайчандыр шушы мәктәптә укыган, хәзерге вакытта Ватан алдында үз бурычын үтәп кайткан егет-Биктов Әнис Тәлгать улы   килде.Әнис Мәскәү өлкәсендә Хәрби Космик Көчләре сафында хезмәт иткән.Ул укучыларга солдат тормышы турында сөйләде,сорауларга җавап бирде,фотоларын күрсәтте,укучыларны спорт белән шөгыльләнергә,хезмәт сөяргә,тәртипле,тырыш булырга чакырды.Бүгенге көндә авылдашыбыз Муллагалиев  Илгиз Россия кораллы көчләре  сафында хезмәт итә.Илгиз  Ватан алдындагы изге бурычын Белгород шәһәрендәге  Хәрби Космик Көчләре сафында  үти.Егетләрне Ватанны саклаучылар көне белән котлыйбыз.Аларга нык сәламәтлек, уңышлар телибез.

Батыр һөнәр бар җирдә –

Җирне, илне саклаучы.

Сине, мине- һәркемне

Дошманнардан яклаучы.

Генералмы,майормы,

Капитанмы, я сержант.

Барысының да исеме

Дөньяда бер- ул солдат!

Хөрмәтле ир-егетләребез!

   Сезне чын күңелебездән Ватанны саклаучылар көне белән котлыйбыз.

Сезгә һәм гаиләләрегезгә тыныч күк йөзе, ныклы сәламәтлек, бәхет, муллык ,  эшегездә уңышлар теләп калабыз. Бу тормышта үзегезнең кирәклегегезне тоеп, һәр туган көнгә сөенеп яшәргә язсын!

                                                                                   Сез безнең күңелгә мәңгелек ышаныч!

                                                                                   Сез көчле ,сез батыр,сез—безнең куаныч!

                                                                                   Сез—алтын багана, гаиләдә сез --терәк !

                                                                                   Тынычлык-иминлек сагында сез кирәк!

Иске Ашыт авылында урнашкан ФАП җитәкчесе фельдшер Файзрахманова Гадения авыл халкына хезмәт күрсәтә. Мәктәп укучылары белән дә тыгыз элемтәдә тора. Печмәнтау башлангыч мәктәбе укучылары белән очрашып, аларга гриппка каршы профилактика чаралрын аңлатты.  Дөрес туклану, киенү, саф һавада  хәрәкәтле уеннар уйнау  кирәклеге турында балаларга киңәшләрен бирде.

   Мәктәбебездә  авылның үзешчән шагыйрәсе, кул эшләре остасы Вахитова Гөлзада белән очрашу кичәсе үтте. Гөлзада Альбертовна укучыларны үзенең иҗат җимешләре белән таныштырды, укучыларга теләк - киңәшләрен җиткерде. Укучылар да үз чиратларында аның шигырьләрен укыдылар, кызыксындырган сорауларын бирделәр.

Мәктәбебездә "Хәтер маршы" акциясе дәвам итә.  " Ил батырларын онытмыйк" дигән исем астында үткәрелгән әдәби кичәдә укучылар Бөек Ватан сугышында катнашкан, илгә Җиңү яулап кайткан  авылдашларыбызның  тарихи истәлекләрен   тагын бер кат барладылар. Ил батырларының  каһарманлыкларына сокландылар. Кичә ахырында Герой - шагыйрь Муса Җәлилнең "Моабит дәфтәрләре"ннән шигырьләр сөйләделәр.

21 нче февраль - Халыкара туган тел көне. Шул уңайдан мәктәбебездә чаралар уздырыла башлады.Безнең телебез – матур, күркәм тел. Әгәр милләтнең теле кулланылмый башласа, ул юкка чыга. Моның өчен сугыш та, кан кою да кирәкми. Телен бетерсәң, халыкның әдәбияты да, мәдәнияте дә, гореф – гадәтләре дә бетә. Безнең, киләчәк буынның, төп бурычы – телебезне саклау. Тел өчен көрәш – милләт өчен көрәш ул.  

Аңла, балам...

Илләр, телләр, диннәр алмашына –

Ниләр көтә адәм баласын?

Аңла, балам, сине үзең итеп

Туган телең саклап каласын.

                          Куштым сиңа сайлап матур исем –

                         Җисемеңә туры килсен ул.

                        Милләтеңнең бер мирасы итеп,

                        Әткәң - әнкәң биргән исем ул.

  Вакыт белән бергә үзгәрә бел

 Телләр өйрән, балам, дөнья күр.

  Йөз чөермә ләкин үз телеңнән:

  Бу – Ватанны сату белән бер.

                      Син тугач та, ана сөте белән

                      Иренеңә тамган туган тел.

                      Туган телең җуйсаң, әнкәеңне

                     Онытуың булыр, балам, бел!

 Патриотик айлыкта Печмәнтау башлангыч укучылары да тәрбия сәгатьләрендә, дәрестән тыш вакытта төрле чараларда катнаштылар. Ватанны саклаучылар көне якынлаша. Укучылар бәйрәмгә әзерләнә, әтиләр һәм абыйларга бүләкләр ясадылар. 

  15 февраль - Герой - шагыйрь Муса Җәлилнең туган көне. Шуңа уңайдан  мәктәптә  “Син  һаман  да безнең  арада“ дигән әдәби кичә үткәрелде.Аны татар теле һәм әдәбияты укытучысы Гайнуллина Р.Ә. үткәрде.М.Җәлилнең шигырьләре якты һәм саф тойгылар тәрбияләргә булыша,кешеләрдәге һәм тормыштагы матурлыкны күрергә,шуның өчен көрәшергә чакыра.Җәлилчеләрнең батырлыкларын онытырга һич ярамый.Моның өчен яшь буынга аларның каһарманлыгы  турында сөйләргә тиешбез.

Иске Кенәр башлангыч мәктәбе укучылары герой-шагыйрь Муса Җәлилнең тормыш юлы,иҗатына багышланган презентация карадылар.Соңыннан шигъри юллар буенча төзелгән кроссворд чиштеләр,шигырьләрен сөйләделәр.