Бүген 2 А сыйныфында “Без төрлеме? Без тигез!” исемле сыйныфтан тыш чара узды.

Чараның төп максаты - дуслык, үзара ярдәм, җаваплылык, яхшылык, аңлау һәм кабул итү мәсьәләләрен күтәрү. Укучылар аерым ихтыяҗлары булган балалар һәм ни өчен аларга  ярдәмчел  булырга  кирәклеге турында сөйләштеләр.

4 нче апрель көнне гимназиябездә "Илебездә, телебездә, күңелләрдә Г.Тукай мәңгелек" шәһәркүләм шигырь укучылар бәйгесенең йомгаклау этабы узды. 

Менә инде икенче ел ул Г.Тукай исемендәге 1 татар гимназиясендә уза.

Бу чараның Г.Тукай исемендәге гимназия диварларында үтүе чарага аерым бер төсмер бирде.

Чөнки Г.Тукай исемен мәңгеләштерүгә гимназия дә үз өлешен кертә. Укучылар, бөек шагыйребезгә багышлап, төрле проектлар эшлиләр. Проект кысаларында шагыйрьнең 1891 нче елда Казанга килүе, Печән базарында асрамага бирелүе, Яңа бистәгә килү юлы буенча видеофильм төшерелде. Гимназиянең Туган якны өйрәнү музеенда Г.Тукайның шәхси әйберләре дә саклана.
Бәйгедә Казан шәһәренең төрле районнарыннан 99 укучы чыгыш ясады. Катнашучыларны мөхтәрәм жюри әгъзалары бәяләде.
Казан шәһәре мәгариф идарәсе баш белгече - Рәйхана Әмин кызы Баһавиева, Татарстанның атказанган артисты, Татарстанның атказанган сәнгать эшлеклесе - Нурания Мөхәммәтхан кызы Җамалиева, Филология фәннәре кандидаты, Габдулла Тукай әдәби музее мөдире - Гүзәл Фәрдин кызы Төхфәтова, актер - Раил Фәргат улы Мөхетдинов.

Наркотикларга каршы көрәш атналыгы дәвам итә. Гимназиябездә “Без наркотикларга каршы!” исемле мәгълүмати стенд эшләнде.

Әлеге стенд наркоманияне кисәтүгә багышланган. Ул яшүсмерләргә наркотикларның сәламәтлеккә зыяны турында, наркотик матдәләр куллануның ихтимал нәтиҗәләре турында, аларны куллануның төп сәбәпләре белән таныштыра.

1 нче апрель – Халыкара кошлар көне билгеләп үтелә.

1906 елдан башлап дөнья күләмендә Халыкара кошлар көне үткәрелә. 1906 елның 1 апрелендә кошларны саклау буенча Халыкара конвенциягә кул куела, ә Россия моңа 1927 елда кушыла. Шулай итеп, безнең илдә 1927 елның 1 апреленнән башлап кошлар көнен үткәрү традициягә кергән.

Шул уңайдан гимназиябезнең “Чишмә” отряды Кошлар көненә багышланган викторина оештырды. Укучылар кызыклы башваткычлар, табышмаклар чиштеләр.

Бүген 1 нче сыйныфларда, Инклюзив белем бирү атналыгы кысаларында, “Яхшылык җирне коткарыр” исемле чара узды. Укучылар кешеләргә карата яхшы мөнәсәбәт, игелекле гамәлләр турында сөйләштеләр. Агач утыртучы малай белән кызны ясадылар, игелек турында видео карадылар.

Алдынгылар хәрәкәте үз эшен дәвам итә. “Хезмәт, һөнәр һәм үзэшчәнлек” юнәлеше 9 нчы сыйныфлар арасында интеллектуаль уен үткәрде. Укучылар төркемнәргә бүленеп үзара көч сыныштылар. Бирелгән һәнәрләрнең актуальлеге, килеп туган проблемалардан чыгу юллары, һөнәрләрнең уңай һәм тискәре яклары турында фикер алышынды.

«Туберкулезга каршы көрәш” атналыгы башланып китте. Барлык сыйныфларда “Туберкулез – бөтен организм чире” дип исемләнгән сәламәтлек дәресләре узды. Укучылар әлеге чир һәм аның куркынычы, саклану чаралары белән таныштылар.

Бүген 8-9 нчы сыйныфларда “Туберкулезны профилактикалау” темасына викторина узды. Гөлназ Наилевна укучыларны чирнең тарихы, аннан саклану өчен кирәкле чаралар белән таныштырды. Уен вакытында укучылар белемнәрен сынадылар, көндәлек режим, дөрес туклану,  саф һавада йөрү турында сөйләштеләр.

Инклюзив белем бирү атналыгы кысаларында, гимназия психологы Эльмира Фоатовна “Син дус була беләсеңме?” темасына әңгәмә үткәрде. Укучылар яхшы дус булу серләре, бер-береңә терәк булу турында сөйләштеләр.

Бүген, 1 нче апрель көнне, гимназиядә дүшәмбе иртәсе традицион рәвештә РФ һәм ТР Дәүләт флагын күтәрү һәм гимнны башкару белән башланды. Тантанадан соң барлык сыйныфларда "Мөһим әйберләр турында сөйләшүләр" узды. Бүген дәрес сәламәт яшәү рәвеше алып бару темасына багышланган иде һәм «Россия – сәламәт ил» дип аталды.