Җиңү бәйрәме һәм “ Җиңү язы” акциясе уңаеннан , гимназиянең актлар залында укучыларга Муса Җәлил турындагы «Моабит дәфтәре» фильмы күрсәтелде. Фильмны карарга 7-10 сыйныфлар чакырылган иде. Аклы-каралы булуына да карамастан, үз чорының оригиналь әсәре булып, бүгенге көндә дә актуальлеген югалтмаган фильм укучыларга бик ошады. Әлеге картинаны Леонид Квинихидзе 1968 елда төшергән. Төп рольне Халык артисты Петр Чернов башкара

9нчы май көнне гимназия “Үлемсез полк” акциясендә катнашты. Укучылар, үзләренең сыйныф җитәкчеләре белән берлектә, Ирек мәйданына җыелды. Аларны биредә гимназия җитәкчелеге каршы алды. Билгеләнгән вакыттан бер дә соңга калмыйча, нәкъ 13сәг.00мин.ка 72 укучы бала гимназия өчен алдан каралган урынга килеп җиттеләр. Бик оешкан төстә укучылар бер сафка 18 әр булып басып, 4 рәтне хасил иттеләр. Үзләренең бабалары, якын туганнары портретларын тоткан хәлдә, укучылар тантаналы йөреш башлануын көтте. “Үлемсез полк” нәкъ 15сәг.тә “Казан” милли-мәдәни үзәге яныннан старт алды. Укучылар “үз каһарманнарын” югары күтәреп, аерым бер дулкынлану һәм горурлану хисе белән тантаналы йөрешкә кузгалды. Казанның иң үзәк урамнары, истәлекле һәм тарихи урыннары буенча узган юл халык агымын 1нче Май мәйданына – М. Җәлил һәйкәле янына илтте... 71нче Җиңү бәйрәме көнне “Үлемсез полк” йөрешендә үлемнәре белән үлемсезлек яулаган бабалары, якын туганнары белән “янәшә атлаганда”, эчке бер диалогка керү, хәтер яңарту көне буларак та бу көн укучылар күңелендә истәлекле вакыйга булып уелып калыр, дигән өмет бар.

Җиңү көне якынлашу уңаеннан, гимназиядә сугышка кагылышлы төрле чаралар узды. Укучылар бик теләп “Җиңү - яшьләр күзлегеннән” дип аталган районара бәйгедә катнашты. Берсеннән –берсе уздырып сугыш темасын чагылдырган макетлар ясап килделәр алар. Тарих дәресләре һәм сыйныф сәгатьләре дә Җиңү көне якынлашканда бик үзенчәлеклегә әверелә: тарих дәресләрендә сугыш кайтавазын чагылдырган төрле күрсәтмә әсбаплар, аудио һәм видеоязмалар белән үткәнгә сәяхәт ясалса, сыйныф сәгатьләрендә “тере тарих” әһелләре - Җиңү бәйрәменең төп каһарманнары белән очрашулар оештырыла. “Үлемсез полк”ка да укучылар җитдилек белән әзерләнә. “Ветераннар аллеясы”на сәяхәт кылып, Киров бакчасында Җиңү бәйрәме хөрмәтенә оештырылган митингка барып кайтырга да өлгерә.

Бүген 4нче сыйныфы укучылары француз язучысы Шарль Перроның иң атаклы әсәрләреннән берсе булган “Золушка” (“Көлкәй”) әкиятен инглиз телендә сәхнәләштереп күрсәтте.

Бүген, ягъни 6нчы май көнне 4 “Б” сыйныфы укучылары узган елларда ветераннар истәлегенә яңартылган Киров бакчасына барып, Җиңү бәйрәме уңаеннан оештырылган митингта катнашып кайттылар. Киров бакчасы бик истәлекле урын булып, үзенең тарихы белән Тукай әсәрләрендә еш телгә алынган Печән базарына барып тоташа. Хәзер исә ул танымаслык булып яңартылган хәлдә, күркәм традициягә әверелгән митингка ел саен сугыш ветераннарын һәм яшь буынны үзенә җыя!

Бөек җиңү көне якынлашкан саен аңа әзерлек тә арта. Бүгенге көндә укучылар үзләренең яу кырында ятып калган бабаларының , якыннарының , туганнарының фотоларын зурайтып, заманча җиһазларда “ялтыратылган” портретлар ясау белән мәшгуль. Үлемнәре белән үлемсезлек яулаган каһарманнарның берәм-сәрәм генә сакланып калган фотолары күңелләрдә әйтеп бетергесез горурлык хисләре уята!

Кабатланмас балачак иленең иң зур бәйрәмнәренең берсе - Әлифба бәйрәме. Җир йөзендә кем генә булмасын, кайда гына эшләмәсен, ул зур дулкынлану белән үзенең нәни кулларына тәүге тапкыр Әлифба китабын алганын исенә төшерә, чөнки һәркемнең дә белем дөньясына беренче адымы Әлифбадан башлана... Бүген гимназиядә 1нче сыйныфларның Әлифба бәйрәме булып узды.

“Табигать - тиңсез хәзинә” дигән темага 26нчы апрель көнне гимназиядә 5-7 сыйныфлар арасында - рәсем күргәзмәсе, ә 8-10 сыйныфлар арасында – фотокүргәзмә оештырылды. Табигатьне рәсемгә яисә фотога төшергәндә дә сәнгать күзлегеннән күрә белү сәләте кирәк.

Габдулла Тукайның туган көнендә гимназиянең актлар залына башлангыч сыйныфлар чакырылды. 2 “Б” сыйныфлары катнашында оештырылган ( сыйныф җитәкчесе –Шиһапова З. Н.) әдәби-музыкаль кичә олы бәйрәм хисен залдагы һәркемгә “җитәрлек итеп өләште”.

25 апрель көнне гимназиядә экологик атналык старт алды. 3 “В” сыйныфы ( сыйныф җитәкчесе – А. Е. Харитонова) гимназиянең актлар залында “Җир көне”нә багышланган бәйрәм кичәсе уздырды. Җир - искиткеч гүзәл планета. Тик аның матурлыгына бүген куркыныч яный.Кешеләр океан, урман, елга-күл байлыкларын әрәм итәләр. Тирә-юньне пычраталар.Әгәр дә кешеләр Җирнең иминлеге турындакүбрәк уйласалар, алай ук куркыныч булмас иде. Без Җирне пычранудан сакларга тиешбез