Гимназиябезнең 100 еллык юбилее белән бәйле күңелле вакыйгалар, акцияләр, бәйгеләр башланып китте. Әлеге чараларда укучылар бик теләп катнашалар. Шундый актив укучыларыбызның берсе, 3 А сыйныфы укучысы, Фаррахов Әмир әлеге темага стена газетасы эшләп алып килде.
Әмирнең нәсел агачы турыдан туры гимназия белән бәйле икән. Аның әнисе дә, дәү әнисе дә, дәү әнисенең әнисе дә һәм башка бик күп туганнары да гимназиянең чыгарылыш укучылары булганнар. Әлеге гаиләдә иң өлкән чыгарылыш укучысы, 1952 нче елда туган, Мамяшева Румия Искәндәр кызы.
Гимназиянең тамырлары бик еракларга китә. Шушы тамырларны, элекке буыннарны онытмый, барлап, искә алган укучылар булу безнең өчен аеруча куаныч.

Көзгә керү белән суык тиеп авыручалар саны кискен арта. Грипп авыруы белән ешрак балалар һәм өлкән яшьтәге кешеләр авырый. Шуңа күрә, гимназиядә күпләп авыру очракларын булдырмас өчен, балаларга грипка каршы прививкалар ясау башланды. Әлеге профилактика чарасы ата-аналарның язма формада бирелгән ризалыгы белән алып барыла.
Грипп - бик мәкерле авыру. Аны аяк өсте йөреп уздыру сәламәтлек өчен бик зыянлы. Ә укучының дәрес калдыруы өлгерешенә начар тәэсир итә. Әлеге авыруны җиңел генә уздырып җибәрү өчен, табиблар тарафыннан, прививка ясату чарасы тәкъдим ителә.
Укучыларыбыз, әлеге уку елында ,сау-сәламәт белем алырлар дигән теләктә калабыз.

Бүген, 13 нче сентябрь көнне, 100 еллык юбилейга әзерлек максатыннан, сыйныфларда гимназия гимнын кабатлау өчен репетицияләр алып барылды. Әлеге чарада һәр сыйныф бик теләп катнашты. Чөнки, бик яхшы җырлаучы 100 укучыны гимназия хорына алачаклар. Әлеге хор гимназиянең 100 еллык юбилеенда тантаналы төстә гимн башкарачак. Репетиция вакытында без шуны сиздек: укучылар канатланып, дәтләнеп киттеләр. Алар үзләренең 1 нче гимназия исемле зур гаиләнең бер өлеше икәнлекләрен тойдылар.
Укучыларга әлеге шөгыльләрендә иҗади уңышлар теләп калабыз.

12 нче сентябрь көнне, гимназиядә “100 чәчәк” акциясе башланып китте. Әлеге акция гимназиянең 100 еллык юбилее кысаларында уза. Гимназиябезне тагын да ямьләү, матурлау йөзеннән 100 чәчәк җыю һәм утырту эшләре башланды. Һәр сыйныф үзе булдыра алган кадәр төрле төрдәге чәчәкләр алып килде. Бүгенге көндә, чәчәк җыю буенча лидер булып, башлангыч сыйныфлар арасында 1 нче һәм 4 нче, ә зур сыйныфлар арасында 5-6-8 нче сыйныфларны атарга була.
Әлеге чәчәкләр киләчәктә гимназиябезне балкытып, ямь биреп, әле бик озак гимназиябезгә килгән кунакларны сөендереп торырлар дип уйлыйбыз. Гимназия исеменнән, акциядә актив катнашкан укучыларга һәм әти-әниләргә зур рәхмәтебезне җиткерәбез.

7 нче сентябрь көнне, гимназиядә ата-аналар җыелышы узды. Быелгы уку елында бу - беренче җыелыш. Класс җитәкчеләре әти-әниләрне үзләренең хокуклары һәм бурычлары, 2016-2017 нче елгы өлгереш, 2017-2018 елга мәктәп режимы белән таныштырдылар. Шулай ук, мәктәпкә алып килгән кәрәзле телефоннар, туклану, балалар куркынычсызлыгы, мәктәп милкенә сак караш, мәктәп формасы, автобус турында мәгълүмат бирделәр. Әти-әниләргә балаларның өлгерешен тикшереп бару турында киңәшләр җиткерелде. Көн кадагындагы иң мөһим яңалыкларның берсе, гимназиянең 100 еллык юбилее туында сөйләнде. Юбилейга әзерлек, бәйгеләр, акцияләр һәм аларда катнашу турында кызыклы яңалыклар җиткерелде.

Бүген, 7 нче сентябрь көнне, ЮХИДИ хезмәткәре, Сабиров Ленар Рөстәм улы, беренче сыйныф укучыларын юл йөрү кагыйдәләре белән таныштырды. “Елдан ел балалар катнашында юл һәлакәтләре арта бара” – дип башлады ул сүзен. “Әлеге статистиканы киметү өчен балаларның юл йөрү кагыйдәләрен бик яхшы белүе шарт” - ди ул.
Ленар Рөстәм улы балалар белән бик кызыклы, мәгълүматларга бай булган әңгәмә оештырды. Балалар светофорның нинди төсенә чыгарга яраганлыгы, аларның төре, җәяүлеләр юлы, җир асты юлы, зебра турында бик кызыклы җаваплар бирделәр. Инспектор балаларга юл йөрү кагыйдәләрен әти-әниләренең, әби-бабаларының исләренә дә төшерергә, саклану каешларын эләктереп йөрергә кушты. Көннең караңгы вакытында йөрү өчен махсус яктыртылучы тамгалар алырга киңәш итте. Чөнки нәкъ менә зурларның әлеге темага салкын каравы күп һәлакәтләргә китерә икән. Ленар Рөстәм улы балаларга уңышлар, сәламәтлек һәм юл кагыйдәләрен төгәл үтәүләрентеләп саубуллашты.

Бүген, 4 нче сентябрь көнне, 1 нче Б сыйныфында “Без хәзер беренчеләр!” исеме астында сыйныф сәгате узды. Әлеге тема беренче классларны коллектив буларак туплау максатыннан махсус сайлап алынган иде. Нәни укучылар бер-берсе белән якыннан танышып, бергәләп матур җырлар җырладылар, шигырьләр сөйләделәр. Класс җитәкчеләре, Азалия Равис кызы, балаларга төрле уеннар, кызыклы конкурслар ярдәмендә, бик җиңел генә, бүгеннән алар бер йодрык булып тупланып, дус тату булырга тиеш икәнлекләрен аңлатты. Мәктәп бусагасын беренче атлап кергән балалар уку процессында кирәк булачак дәреслек һәм китаплар белән танышты. Шулай ук, сыйныф сәгатендә бердәмлек, дуслык темалары күтәрелде һәм әлеге дуслыкны дәлилләп балалар үз куллары белән ромашка ясадылар.
Ә бәйрәмнең иң кульминацион ноктасы, беренче сыйныларның бер-берсенә теләкләр тапшыруы булды. Сыйныф сәгате укучыларның гимназия данын якларга, сакларга ант бирүе белән тәмамланды.

Бүген, 1 нче сентябрь көнне, гимназиябездә белем бәйрәме гөрләп узды. Бәйрәмдә укучылар, укытучылар, әти-әниләр, килгән кунаклар катнашты. Директорыбыз, Гөлфия Гаязовна, билгеләп үткәнчә, быелгы уку елы гимназия өчен бик истәлекле һәм җаваплы. Яраткан гимназиябез 100 еллык юбилеен билгеләп үтә. Бәйрәм тантанасы 27 нче октябрьгә билгеләнгән.
Бәйрәм белән котлап, укучылар матур шигырьләр, җырлар биюләр башкардылар. Директорыбыз Гөлфия Гаязовна барлык килгән кунакларны, аеруча, беренче тапкыр мәктәп бусагасын атлап керүче – беренче сыйныфларны бәйрәм белән котлап, үзенең изге теләкләрен җиткерде. Ә үз чиратында, беренче сыйныфлар өлкән укучылар, укытучылар, әти-әниләр алдында тырышып укырга сүз бирделәр. Бәйрәм тантанасы нәни укучыларны беренче кыңгырау чыңы һәм алкышлар астында мәктәпкә озату белән тәмамланды.

Иртә яздан көзге суыкларга кадәр гимназиябез бакчасы аллы-гөлле чәчәкләргә күмелеп утыра һәм бик күп еллардан бирле район күләмендә уздырылган бәйгедә призлы урыннарны яулап килә. Ләкин әлеге матурлык аерым өлкәләрдән мактау сүзләре ишетү өчен генә тудырылмый. Гүзәллек барлык кешеләрне дә сокландырырга һәм шатландырырга тиеш.