Бүген, 14 нче май көнне, 1 нче сыйныфларда, игелек ае кысаларында Игелек дәресләре узды. Әлеге чара укучыларны төрле игелекле эшләргә тарту, күңелләренә изгелек орлыклары салу өчен оештырыла. Укучылар кешеләргә яхшылык эшләү, бер-береңә мәрхәмәтле булу, өлкәннәрне хөрмәт итү турында фикер алыштылар. Шулай ук презентациядәге рәсемнәргә карап, үз фикерләрен җиткерделәр. Үзләре эшләгән яхшы эшләрне, гамәлләрне искә төшерделәр. Дәрес ахырында “Каково это быть вежливым?” мультфильмын карадылар. Нәни укучыларга игелек дәресе бик ошады. 

Бүген, 9 нчы май көнне, гимназия укучылары, әти-әниләр һәм укытучылар үлемсез полк акциясендә катнаштылар. Бу акция сугышта батырларча хәлак булганнарны искә алып, аларны мәңгеләштерү максатыннан оештырыла. Чарада Бөек Ватан сугышында катнашкан кешеләрнең туганнары, якыннары катнаша. Алар әби-бабаларының фотосурәтләрен күтәреп урамнар аша горур узалар. Әлеге акция Россиядә генә түгел хәтта чит илләрдә дә уздырыла. 

Тиздән май аеның иң зур бәйрәмен – Җиңү көнен билгеләп үтәчәкбез. Укучылар бу бәйрәмгә әзерлекне инде күптән башладылар. Менә бүген дә 4 нче В сыйныфы укучылары, Бөек Ватан сугышына багышланган, стена газеталарыннан күргәзмә эшләгәннәр иде. Газеталарда шул дәһшәтле елларның иң хәл иткеч вакыйгалары, күренекле шәхесләре урын алган. 

9 нчы май – Җиңү көне уңаеннан оештырылган чаралар дәвам итә. Укытучыларыбыз Бөек Ватан сугышы ветераннарына, сугыш чоры балаларына, республика һәм шәһәр башлыклары исеменнән, бүләкләр, открыткалар тапшырдылар.
Хөрмәтле ветераннар! Аяз күк йөзе, тыныч тормыш өчен зур рәхмәт сезгә! Сезнең батырлыгыгыз алдында баш иябез!

Май аен без 9 нчы май - Җиңү көне булган өчен аеруча яратабыз. Бәйрәм алдыннан республикабызда, шәһәребездә, гимназиядә төрле чаралар уза. Укучыларыбыз бик яратып бу чараларда катнашалар.
2 нче май көнне 8 нче сыйныф укучылары мәңгелек ут янына сакта торырга бардылар. Алар әлеге чараның мөһимлеген, мәңгелек утның чын мәгънәсендә нәрсә аңлатканын тоеп, аңлап кайттылар. 8 нче сыйныф укучыларына, бу җитди эшне уңышлы башкарганнары өчен, рәхмәт белдерәбез!

Башлангыч сыйныф укучылары да өлкән абый-апаларыннан калышмыйлар. Төрле бәйгеләрдә бик теләп катнашалар.
Шундый талантлы укучыларыбызның берсе 3 нче сыйныфта белем ала. Фаррахов Ә. “Культурный дневник школьника” бәйгесенең район этабында җиңү яулады. Укучыбызны уңышы белән тәбрик итәбез!

Бүген, 27 нче апрель көнне, “Алиш эзләреннән” V фәнни-гамәли регион ара конференция узды. Чара Совет районының А. Алиш исемендәге 20 нче гимназиясендә узды. Конференциядә безнең гимназиянең 5 нче сыйныф укучылары Ибушева Л. һәм Әхәтова А. катнаштылар. Ибушева Л. 1 нче урынга, ә Әхәтова А. лауреат исеменә лаек булды.
Кызларны уңышлары белән котлыйбыз! Аларга киләчәктә дә уңышлар телибез!

Бүген – бөек шагыйребез Габдулла Тукайның туган көне. Бүген бөтен татар дөньясы шагыйребезнең туган көнен, Туган тел бәйәмен билгеләп үтә. Татар шигъриятендә Габдулла Тукай – иң якты йолдыз. Ул үзеннән соң 400дән артык шигырь, 9 поэма һәм 50 якын проза әсәрләре язып калдырган. Татар халкында бөек шагыйребезнең әсәрләрен белмәгән кеше юктыр.
Безнең гимназиябездә дә бүген чын мәгънәсендә бәйрәм. Мәктәп радиосы дулкыннарында Г. Тукай турында сөйләнә, аның шигырьләре укыла, җырлары җырлана. Шулай ук укучыларыбыз актлар залына җыелып Г. Тукай турында кызыклы мәгълүматлар тыңладылар, аның шигырьләрен укыдылар. Ни өчен гимназиябезнең Г. Тукай исемен йөртүен хәтерләрендә яңарттылар. Ә чараның иң кульминацион ноктасы: барыбыз бергә “Туган тел” җырын башкару булды. 

Бүген, 26 нчы апрель көнне, республикабыз бөек шагыйребез Г. Тукайның туган көнен билгеләп үтә. Шул уңайдан мәркәзебездә бик күп чаралар уздырыла. Шундый чараларның берсе ул, шәһәр үзәгендә урнашкан Г. Тукай һәйкәленә чәчәкләр салу тантанасы. Бу чарада безнең гимназиянең 6 нчы сыйныф укучылары да катнашты, истәлекле вакыйгалар шаһиты булды.

Бүген гимназиябездә Г. Тукайның туган көненә багышланган чаралар дәвам итә. Мәктәп күләм уздырылган чаралардан тыш һәр сыйныф бөек шагыйребезне сыйныф сәгатләрендә, татар теле һәм әдәбияты дәресләрендә искә ала.
1 нче Б сыйныфы укучылары да Г. Тукайга багыланган сыйныф сәгате үткәрделәр. Аның тормыш юлы, иҗаты белән таныштылар. Хәтта рәсем дәресе дә Г. Тукайның әсәрләренә багышланган иде. Укучылар аның әсәрләре геройларын ясадылар, “Туган тел” җырын башкардылар. Бер-берсен бәйрәм белән котладылар.