10 декабрь Казанда Jadidfest фестивале ачылды. Ул 15 декабрьгә кадәр барачак. Программада экскурсияләр, лекторий, семинар, перформанслар каралган. Быелгы чарада игътибар үзәгендә – Яңа бистә. Оештыручылар бистәнең 270 еллыгына җәмәгатьчелек игътибарын җәлеп итәргә тели.
Фестиваль Яңа бистәгә багышланган күргәзмә ачудан башланды. Без дә укучылар белән биредә булып кайттык. Балалар бистә тарихына караган фотолар, китаплар, тарихи архитектурага багышланган мәгълүмат такталары, Казанда иҗат итүче яшь рәссам Лена Алексеева картиналары белән таныша алдылар. Рәсемнәрнең бер өлеше фестиваль өчен махсус эшләнгән, алар Яңа бистә тарихына һәм архитектурасына багышланган.
Укучыларга үзләре яшәгән, укыган җир тарихы турында тагын да күбрәк мәгълүмат алу бик файдага булды.

1 декабрьдә Халыкара инвалидлар көненә багышланган Инвалидлар декадасы старт алды. Шул уңайдан безнең гимназиядә дә төрле чаралар, сыйныф сәгатьләре, укучылар белән әңгәмәләр узды.
Укучыларның күбесенә табигать яки берәр очрак саулыгын кыскарткан, гадәттә инвалид дип атаган кешеләрнең ничек яшәвен күз алдына китерүе кыен. Ә бит бүген планетада яшәүче һәр җиденче кеше шундый. Мөмкинлекләре чикләнгән кеше гади кешенең теләкләрен дә, омтылышларын да югалтмый. Кызганычка каршы, аларның тормыш юлында төрле характердагы күп кенә киртәләр торгызыла һәм алар һәрвакытта да объектив сәбәпләргә бәйле түгел. Балалар моны аңларга тиеш, шуңа да мөмкинлекләре чикләнгән кешеләр турында сүз барган әлеге чараларда без бу фикерне җиткерүне,аңлатуны беренче урынга куйдык. 

10 декабрь көнне безнең гимназиядә Халыкара Кеше хокуклары көне кысаларында бердәм дәрес узды. Дәрестә безнең илдә кеше хокукларын саклау мәсьәләләре күтәрелде, РФ Конституциясенең тиешле маддәләре турында әңгәмә алып барылды. Укучылар Халыкара Кеше хокуклары көненең ник нәкъ менә бу көнне билгеләп үтелгәнен дә белделәр. Ул 1948 елның 10 декабрендә Берләшкән Милләтләр оешмасының Кеше хокуклары турында Гомуми декларация кабул итү хөрмәтенә сайлап алынган. Һәр дәүләтнең, кешелекнең киләчәге тигезлек һәм гаделлек принципларын саклауга турыдан-туры бәйле. Шуңа күрә Гомуми декларация кешенең фундаменталь хокукларын беркеткән һәм аларны абсолют байлык дип игълан иткән, дәүләтнең бурычы – һәркемгә тумыштан бирелгән һәм кеше шәхесеннән аерылгысыз булган ул хокукларны һәм ирекне гарантияләү.

10 нчы декабрь Тинчурин театрында 7 нче һәм 8 нче сыйныф укучылары Кәрим Тинчуринның «Сүнгән йолдызлар» спектаклен тамаша кылды. Безгә, ягъни XXI гасырның эре шәһәрләрендә көн итүчеләр өчен, XX йөз башы татар авылы яшәешенә хас булган көндәлек тормыш, гореф-гадәтләр, җыр һәм биюләр күптән инде үткәндә калды. Кичә гадәти булган әйберләр, бүген безгә ят. “Сүнгән йолдызлар” спектакле ярдәмендә укучылар боларның күпмесендер күрә һәм аңлый алдылар.

2007 елдан Россия Президенты Указы нигезендә, 9 декабрь Ватан Геройлары көне буларак билгеләп үтелә. Бу - Советлар Союзы Геройларын, Россия Федерациясе Геройларын, Дан һәм Изге Георгий орденнары кавалерларын хөрмәтләү, мәрхүмнәрен искә алу көне.
Әлеге истәлекле көн уңаеннан гимназиядә сыйныф сәгатьләре үтте. Укучылар бәйрәмнең тарихы, эчтәлеге белән таныштылар.

1920 елның 25 июнендә РСФСР составында Татар Автономияле Совет Социалистик Республикасы оештырыла. ТАССР 1990 елга кадәр яши. 1990 елның 30 августында Татарстан Совет Социалистик Республикасы итеп үзгәртелә, 1992 елның 16 маеннан ул Татарстан Республикасы дип атала.
2020 елның 25 июнендә Татарстан АССР төзелүгә 100 ел тулу билгеләп үтеләчәк. Безнең гимназия дә әлеге чарага әзерләнә. Бүген дә ТАССРның 100 еллыгына багышланган сыйныф сәгатьләре үтте. Укучылар Республикабызның тарихын исләренә төшерделәр, ТАССР вакытында нинди үсешләргә ирешкәнебезне сөйләделәр. Укытучылар аларның сүзләрен тулылындырып, яңа мәгълүматлар өстәде. Шулай ук Татарстанның истәлекле урыннары, атаклы шәхесләре, мәдәнияте турында да сүз алып барылды.

Балаларның күбесе спорт белән кызыксына, төрле спорт түгәрәкләренә йөри, ярышларда катнаша. Ә бездә андый ярышлар һәрдаим үткәрелеп тора. Мәсәлән, бүген бездә малайлар командасы арасында пионербол буенча турнир башланды. Әлегә нәтиҗәләр түбәндәгеләр: 5А – 5Б (0:2), 6В – 7А (2:1), 7А – 7Б (2:0), 7В – 6В (2:0), 6А – 5Б (2:0). 

Татар әдәбиятын камил әсәрләр белән баеткан гаҗәеп көчле ихтыярлы күренекле классик язучы, җәмәгать эшлеклесе Фатих Әмирханның иҗаты белән кызыксынучы укучыларыбыз аз түгел. Бүген аның иҗаты буенча фәнни эш алып баручы укучылар Г.Ибраһимов исемендәге Тел, әдәбият һәм сәнгать институты галимнәре белән түгәрәк өстәл оештырды. Биредә Ибраһимов Марсель Илдар улы (Текстология бүлеге мөдире, филология фәннәре кандидаты), Гомәров Илһам Госман улы (Язма һәм музыкаль мирас үзәге мөдире, филология фәннәре кандидаты), Рәмиев Зөфәр Зәйни улы (Язма һәм музыкаль мирас үзәгенең баш фәнни хезмәткәре, филология фәннәре докторы,профессор, Татарстан Республикасының атказанган фәнни эшлеклесе) катнаштылар. Алар балаларны кызыксындырган сорауларга җавап бирделәр һәм истәлекле бүләкләр – китаплар тапшырдылар. Әлеге чарадан укучылар үзләре әзерләнә торган төрле фәнни конференцияләр өчен бик күп кызыклы һәм кирәкле мәгълүмат туплый алды.

Бүген бездә өлкән сыйныфлар арасында татар телендә җырлар конкурсы үтте. Укучыларыбыз бик актив булдылар, сыйныф белән дә,аерым-аерым да чыгыш ясадылар. Кемдер вокал ягына, кемдер күбрәк чыгышның матур булуына өстенлек ясаган. Конкурсның нәтиҗәләре шундый: 1 нче урынны 6 “Б” сыйныфы, 2 нче урынны 8 “А” сыйныфы, 3 нче урынны 7 “Б” сыйныфы яулады.

Җиңүнең 75 еллыгы якынлаша. Бүген без һәлак булган каһарман сугышчыларның якты истәлегенә баш иябез, арабызда яшәүче фронтовикларга һәм тыл хезмәтчәннәренә тиешенчә олылау һәм зурлау күрсәтәбез. Батыр, хезмәт сөючән, зирәк , хөрмәтле ветераннарыбыз елдан-ел арабыздаң китә бара. Киләчәк буынның әлеге сугыш китергән авырлыкларны, безнең якты киләчәк өчен үз-үзләрен аямыйча дошманга каршы сугышкан батырларны онытырга хаклары юк. Шуңа да без укучыларга шул авыр еллар турында исләренә төшереп торабыз.
Бүген дә гимназиядә Бөек Җиңүнең 75 еллыгына карата рәсем конкурсы үткәрелде. Мәктәп үзидарәсенең мәгариф һәм мәдәният бүлекләре рәсемнәрне кабул итте, тикшерде һәм урыннар билгеләде. Балалар бик актив булдылар. Һәр рәсемнең эчтәлегендә үзенчәлекле фикер ята. Димәк,укучылар Бөек Ватан сугышының күпме авырлык китергәнен, безнең бүгенге аяз күк йөзе өчен сугыш ветераннары, сугыш кырында үлеп калган батырлар алдында җаваплы икәнебезне аңлыйлар.