Бүген, 28 октябрь көнне, “Җиңү шигърияте” дип аталган сәнгатьле шигырь сөйләү конкурсы үтте. Биредә башлангыч сыйныфлар Бөек Ватан сугышында катнашкан һәм шул вакытта иҗат иткән шагыйрьләрнең шигырьләрен тәкъдим иттеләр. Шулай ук сугыш темасына багышланган үзләре язган әсәрләрен дә сөйләүчеләр булды. Иң активлары 1 “А”, 1 “В”, 2 “А”, 3 “Б”, 4 “А”, 4 “Б”, 4 “В” сыйныфлары булды. Аеруча нәни укучыларыбызның – 1 нче сыйныфларның искиткеч сәнгатьле итеп шигырьләрен сөйләүләре жюри әгъзаларын шаккаттырды. Катнашучылар күп булу сәбәпле, нәтиҗәләр төрле номинацияләр буенча билгеләнәчәк. Әлеге шигьрият сөюче укучыларга без алга таба уңышлар гына телибез!

24 нче октябрьдән 31 нче октябрьгә кадәр Бөтенроссия финанс грамотлылыгы атналыгы билгеләнгән. Ул онлайн форматта уза. Бүген бездә дә барлык сыйныфлар бу чарада катнаштылар. Кайбер сыйныфлар онлайн-квест, ә кайберләре аерым тест рәвешендә үзләренең белемнәрен сынадылар. Нәтиҗәдә барысы да сертификат, дипломнар белән бүләкләнде.

Сәламәт яшәү рәвеше – кешенең яшәү рәвеше, ул авыруларны җиңәргә һәм сәламәтлекне ныгытуга юнәлдерелгән. Медицина нинди генә камил булмасын, ул барысын да бөтен авырулардан коткара алмый. Кеше – үз сәламәтлеген үзе төзүче, аның өчен көрәшергә кирәк. Шуны истә тотып, спорт секторы белән берлектә бездә “Мин сәламәт яшәү рәвешен сайлыйм!” дип исемләнгән рәсем конкурсы үтте. Биредә 1 сыйныфтан башлап 7 сыйныфка кадәр укучылар катнаштылар. Башлангыч сыйныфлар да, өлкән сыйныф укучылары да актив катнашты бу конкурста.

«Китап-белем чишмәсе», «Күп укыган күп белер», «Китап галим — телсез мөгаллим» һәм башка бик күп мәкальләр бар китап турында халкыбызда. Чыннан да, китапта чиксез белем, мәгълүмат тупланган. Алар аша без үзебезгә кирәкле информацияне ала алабыз, белемне ныгытабыз, күпме яңалык беләбез. Матур киләчәгебезне дә китаплар аша күз алдына китерәбез. Дөрес, бүген компьютер өстенлек итә. Ләкин китап беркайчан да үзенең кыйммәтен югалтмаячак, чөнки ул кеше тормышында юл күрсәтүче төп маяк булып тора. Без аны кадерләргә, саклап тотарга тиеш. Шуңа да гимназиябезнең пресс-центр бүлеге “Китапны сакла” дип аталган иң оригиналь тышлык конкурсын игълан иткән иде. Биредә башлангыч сыйныфлар иң активлары булды. Пресс-центр бүлеге оригиналь эшләрне инде сайлап алды, нәтиҗәләр дә чыгарды. Укучыларның китапның кадерләп һәм саклап тотулары безне шатландыра гына.

Гимназиянең гомуми чаралары-конкурслары гына түгел, ә сыйныфлар эчендә дә бик күп чаралар үтә, аеруча башлангыч сыйныфларда. Алар кабинетларында төрле тематикага багышланган почмаклар, үзләренең күргәзмәләрен дә ясыйлар. Шулай ук традицион чаралары да бар әле аларның, аларның берсе – туган көн белән котлау. Сыйныфташларының туган көне барысы өчен дә бәйрәм, чөнки алар гади генә котлаулар сөйләп кенә калмыйлар. Тәнәфесләрдә алар уеннар-җырлар белән әлеге үзләре өчен “кечкенә генә бәйрәм”не үткәреп җибәрәләр. Бүген дә шундый күңелле көннәрнең берсе иде.

Габдулла Тукай – татар әдәбиятының  классигы, иң якты йолдызы. Ул калдырган иҗат мирасы һәм рухи яктылык – безнең горурлыгыбыз. Аның исеме татар мәдәниятенең үткәне, бүгенгесе һәм киләчәге белән мәңгегә бәйле. Без Тукайның үз милләтенең киләчәге, теле , мәгърифәте, сәяси үсеше өчен җан атып яшәгән татар баласы булуын һәм татар әдәбиятын дөнья киңлекләренә алып чыккан милли шагыйрь икәнлеген һәрдаим истә тотабыз. Үлемсез Тукай шигърияте, халык вөҗданы байрагыдай, гасырлардан гасырларга узган. Аның иҗатын онытырга безнең хакыбыз юк. Укучыларга да моның мөһимлеген без гел искәртеп торабыз, әледән-әле төрле чаралар уздырабыз. Бу атнада да Г.Тукайга багышланган презентацияләр конкурсы үтте. Укучылар үзләре башкарган әдипнең язмышы, иҗаты турында белешмә бирелгән презентацияләрен тапшырдылар.

Бүген 1 “А” сыйныфы укучылары беренче тапкыр гимназия китапханәсе белән таныштылар. Алар китап күргәзмәләре,аннан тыш төрле конкурс күргәзмәләре белән таныштылар. Китапханәчебез нәни укучыларыбызга китапханәдә нинди һәм күпме китаплар барлыгы турында, китапны ничек тоту, алу һәм кире тапшыру, формуляр тутыру турында сөйләде. Шуннан алар балалар өчен булган бүлекләр белән дә таныштылар. Ә  ахырдан кайбер укучылар биредә китаплар алып, укып та алдылар.

Күптән түгел ТАССРның 100 еллыгы билгеләп үтелде. Әле хәзер дә республикабызда моңа карата төрле чаралар үткәрелеп килә. Без дә ТАССРның 100 еллыгына карата “Минем яраткан урамым” дип исемләнгән фотосурәтләр конкурсын үткәрдек. Биредә 7 “Б” сыйныфы актив катнашты. Укучылар башкалабызның көзге бизәкләргә төренгән урамнарының фотосурәтләрен әзерләгәннәр иде. Урамнар гына түгел, туган ягыбыз да көз көне аеруча матур, “алтын” төскә керә. Укучыларыбыз нәкъ тә шул мизгелләрне фотосурәтләрендә күрсәткәннәр.

Белгәнебезчә, ничә еллар дәвамында бездә “Иртәнге зарядка”  проекты уңышлы эшләп килә. Дәресләр алдыннан иртәнге зарядка баланың уку көненең күңелле башланып китүенә ярдәм итә. Һәр көн беренче дәрес алдыннан үткәрелә торган гимнастика тәрбия һәм сәламәтләндерү бурычларын хәл итә. Көн саен күнегүләр организмга уңай тәэсир итә, дөрес гәүдә тотышын, сулыш актларын формалаштыруга ярдәм итә, даими рәвештә иртәнге гимнастика, спорт белән шөгыльләнү гадәтен тәрбияли, уңай эмоциональ кәеф һәм сыйныфта «күмәк рух» ны стимуллаштыра. Физик күнегүләрне күмәк башкару дәресләр башланганчы ук укучыларны дисциплинага өйрәтә, оештыра, берләштерә, аларның эшкә сәләтлелеген арттыра.

Ә укучыларның күнегүләрне дөрес башкаруын, активлыгын бездә гимназиянең спорт секторы тикшерә. Көн саен иртән билгеле бер сыйныфтан спорт буенча җаваплы укучылар иртәнге зарядка буенча рейд үткәрә. Тикшерү барышында һәр сыйныфка тиешле билге куела.Мәсәлән, бу атнада әлеге эшкә 9 “Б” сыйныфы укучылары  җаваплы булды.

Бала кул эшләре ясаганда фикерләү, тактиль сизгерлек, игътибар һәм кулларның вак моторикасы арта — болар барысы да аңа киләчәктә кирәк булачак. Без дә әлеге эшне балалар өчен файдалы дип күрәбез, шуңа да бездә 1-6 сыйныфлар арасында "Янә туган ягымда алтын көз" дип исемләнгән табигый материалдан эшләнмәләр конкурсы үтте. Балалар әлеге чарада бик актив катнаштылар. Конкурс эшләре бик күп булу сәбәпле, урыннар төрле номинацияләр буенча куелды. Әлеге кул эшләреннән бездә зур күргәзмә дә оештырылды. Аны укучылар,укытучылар да бик яратып карыйлар.