Гимназиябездә һәр атна башында радиолинейка уздырыла. Бүгенге эфирны 7 “А” сыйныфы алып барды. Башта уку буенча рейтинг нәтиҗәләре белән таныштырылды, үткән атнада булган һәм яңа уку атнасында планлаштырылган чаралар әйтелеп үтелде. Һәм, әлбәттә инде, бу атнаның иң мөһим даталары – 21 нче һәм 23 нче февраль турында да әйтелде.

 21 нче февральдә Бөтендөнья туган телләр көне билгеләп үтелә. “Безнең илдә 145 миллионнан артык граждан яши, алар –  үз телләрендә сөйләшүче 160 тан артык милләт вәкиле. Һәм һәр тел уникаль”, –  дип сөйләнде радиодан. 23 нче февраль турында да әйтелеп үтелде.  Укучылар әлеге бәйрәмнең тарихы белән  таныштырдылар, аннан бәйрәм белән котладылар. Ә радиолинейка ахыры яңа уку атнасында уңышлар һәм яхшы билгеләр теләү белән тәмамланды.

23 нче февраль көнне Ватанны саклаучылар көне билгеләп үтелә. 23 нче февраль - бөтен ил өчен истәлекле көн, ул хаклы рәвештә батырлык, намус һәм вөҗдан символы булып тора. Бу – үз Ватанына тугрылыклы көчле һәм батыр кешеләр бәйрәме. Әлеге бәйрәм һәр гаиләгә дә кагыла. Бу көнгә карата гимназиядә 5-7 нче сыйныфлар открыткалар, рәсемнәр дә ясадылар. Алар арасыннан иң яхшылары сайланып алынды һәм урыннар да билгеләнде.

18-19 нчы февраль көннәрендә гимназиябездә татар халкы турында проектлар якланды. Әлеге чара Туган телләр һәм халыклар бердәмлеге елына багышланган иде. Биредә башлангычлар да, өлкән сыйныфлар да катнашты. Алар татар халык ашлары, милли киемнәр, бәйрәмнәр турында сөйләп уздылар. Әлеге эчтәлекле чара барысы өчен дә файдалы һәм милли рух белән тулы үтте.

Бүген, 17 нче февраль көнне, гимназиядә Парламент дәресе үткәрелде. Биредә Татарстан Республикасының халык артисты, Габдулла Тукай исемендәге Дәүләт премиясе лауреты, Дәүләт Советы депутаты Рамил Чыңгыз улы Төхвәтуллин да катнашты. Ул укучыларга дәүләт һәм мәдәниятыбыз турында кызыклы һәм файдалы мәгълүмат бирде. Укучыларның да сораулары булды, алар үзләренең кызыклы проектлары белән таныштырып үттеләр. Туган телләр һәм халыклар бердәмлеге елы турында да сөйләшү алып барылды, ә кичәнең ахыры “Туган тел” җыры белән тәмамланды.

Укытучыларыбызга, укучыларыбызга бүгенге көн бик ошады. Мондый  кызыклы, мәгълүмати чаралар күбрәк булсын иде, дигән теләктә калыйк.

И туган тел, и матур тел, әткәм-әнкәмнең теле!

Дөньяда күп нәрсә белдем син туган тел аркылы.

Иң элек бу тел белән әнкәм бишектә көйләгән,

Аннары төннәр буе әбкәм хикәят сөйләгән.

 Әлеге шигырь юллары кечкенәдән үк безгә сеңдерелгән. Без аларны яттан беләбез, яттан сөйлибез һәм җырлыйбыз да.

16 февраль көнне гимназиядә “Туган тел” дип аталган җыр конкурсы үтте. Биредә барлык сыйныфлар да катнашты, алар арасыннан Г.Тукайның “Туган тел” шигыренә язылган җырны иң яхшы башкаручылар сайланып алынды, урыннар билгеләнде.

Бүген, 15 нче февраль көнне, татар халкының күренекле шагыйре, Советлар Союзы герое, Ленин премиясе лауреаты Муса Җәлилнең туган көне. Шул уңайдан гимназиядә төрле чаралар үтте.

 7 “Б” сыйныфында “Муса Җәлил иҗатын беләсеңме?” дип исемләнгән викторина узды. Укучылар 2 төркемгә бүленеп көч сынаштылар. 5 тур барышында һәр команда тулы, матур җаваплар бирделәр. Беренче турда М.Җәлилнең тормыш юлына караган сораулар тәкъдим ителде. 2-4 нче турларда аның иҗаты белән бәйле сораулар бирелде.

Укучылар чара барышында белемнәрен сынадылар, яңа мәгълүматлар да белделәр. Аларга алга таба да актив булырга, чараларда актив катнашырга чакырабыз.

Җырларым, сез шытып йөрәгемдә

Ил кырында чәчәк атыгыз!

Күпме булса сездә көч һәм ялкын,

Шулкадәрле җирдә хакыгыз!

Бүген гимназиябездә Муса Җәлилнең туган көненә багышланган чара – “Мин Җәлилне укыйм” дип исемләнгән сәнгатьле шигырь сөйләү конкурсы үтте. Биредә башлангычлар да, өлкән сыйныфлар да чыгыш ясадылар. Актив укучылар күп булды, алар шагыйрьнең үзләре яраткан шигырьләре белән таныштырып үттеләр. Ә чара ахырында урыннар куелды, бу конкурсның нәтиҗәләре дә ясалды.

Татар шигъриятенең мең елларга сузылган данлы тарихы бар. Аның һәр дәвере үзенчә эчтәлекле, үзенчә моңлы, үзенчә әһәмиятле. Күп укучыларыбыз әлеге юнәлеш белән кызыксыналар да. Шуңа да 13 нче февраль көнне 8 нче сыйныфта “Татар шигърияте” исемле шигырь кичәсе оештырылды. Укучылар яраткан шагыйрьләренең шигырьләрен сөйләделәр, проект эшләре белән чыгыш ясадылар.

Нәни укучыларыбыз тырышлыгы белән гимназиябездә “Хыял дөньясында” дип аталган рәсемнәр күргәзмәсе оештырылды. Бик күп баланың актив булуы сәбәпле, ул зур күләмдә булып чыкты. Мондагы һәр рәсем билгеле бер әсәрне күз алдына китерә, чөнки укучылар татар шагыйрьләренең шигырьләренә иллюстрация ясаганнар. Аларның татар әдәбиятын яратып укулары шуннан күренә.

Туган телләр һәм халыклар бердәмлеге елына  багышланган чаралар дәвам итә. Бүген, 11 февраль көнне, 3 нче сыйныфларда "Туган телем - иркә гөлем" дип исемләнгән квест уены узды.

Уен 5 турдан торды. Әлеге чара барышында нәни укучылар белемнәрен генә ныгытып калмадылар, ә тел белеме, әдәбият, сәнгать, гореф-гадәтләр буенча мәгълүматлар да үзләштерделәр.

Укучылар, карта ярдәмендә хәрәкәт итеп, барлык турларны уңышлы үтеп, призга ия булдылар.

Алар биеделәр дә, җырладылар да, шигырьләр дә сөйләделәр.  Г.Тукай иҗаты, Татарстан Республикасы, татар теленә һәм әдәбиятына караган сорауларга җавап бирделәр. Татар халык киемнәрен барладылар, аш-су өлкәсендә дә сынатмадылар.

Әлеге чара укучыларга бик ошады. Аларга алга таба да үз туган телләрендә аралашып, уңышларга ирешүләрен теләп калабыз!