“Башлангыч сыйныф укучысының креатив фикерләү сәләтен үстерү ул – укуда  шәхси, метапредмет һәм предмет нәтиҗәләрен формалаштыру шарты” дип аталган башлангыч сыйныфлар декадасы дәвам итә. 18 нче ноябрь көнне 4 “В” сыйныфында физика законнарын чагылдырган дәрестән тыш чара үтте. Аның максаты булып балаларның электр энергиясе һәм куркынычлыгы турында белемнәрен киңәйтү һәм ныгыту торды. Дәрестән тыш чара конкурс формасында үткәрелде. Укучылар ике командага бүленеп, Билгеле бер маршрут кәгазе буенча бардылар. Алар электр күренешләренә бәйле төрле биремнәр, экспериментлар үткәрделәр, видеофрагментлар карадылар. Чара ахырында электр приборларын ничек кулланырга кирәклеге турында нәтиҗә ясалды.

17 нче ноябрь көнне башлангыч сыйныфлар белән юл йөрү кагыйдәләренә багышланган “Кызыл, сары, яшел” дип исемләнгән чара үтте. Укучылар биредә кагыйдәләрне, тамгаларны кабатладылар, бу юнәлештә үзләренең белемнәрен сынап карадылар. Ә соңыннан балалар юл йөрү кагыйдәләренә бәйле рәсемнәр ясады, ә алар арасыннан иң яхшылары сайланып алынып урыннар да билгеләнде.

Башлангыч сыйныфлар  декадасын беренче сыйныф укучылары ачты.  Бүген, 16 ноябрь көнне, 1 “Б” сыйныфында әйләнә-тирә дөнья буенча «Планетабыз нәрсәгә охшаган? " дигән темага ачык дәрес үткәрелде.  Беренче сыйныф укучылары Җирнең кечерәйтелгән моделе – глобус белән таныштылар, пластилиннан үзләре Җирнең моделен ясадылар. Кешеләрнең нинди гамәлләре планетаның торышын начарайтуга, ә ниндиләре аның чәчәк атуына китергәне турында фикер алыштылар. Дәрес бик кызыклы булды, балалар да  канәгать калдылар.

Бүген пресс-центр бүлекчәсе укучылары нәни укучыларыбызны балалар басма матбугаты белән таныштырып үттеләр. Алар “Сабантуй” һәм “Салават күпере” журналларын карадылар, аларда төрле рубрикалар булуын белделәр. Газета-журналларның төрле төсле, бик күп рәсемле һәм фотосурәтле булуы балаларны җәлеп итте.  Укучылар үзләренә кызыклы басма матбугат белән танышуларына бик шатландылар.

Бүгеннән бездә “Музыкаль тәнәфес” проекты үзгә юнәлеш белән эшли башлады. Алдан озын тәнәфесләрдә билгеле бер композитор турында сөйләнеп,аның әсәрләре тыңланса, хәзер аерым темаларга багышланган көйләр, җырлар тәкъдим ителә. Бүген гимназиядә туган як, туган җир темаларына багышланган җырлар яңгырады. Шулай ук бездә “Музыкаль тәнәфес”нең иң яхшы алып баручысы” конкурсы үткәрелә. Биредә катнашырга теләүче укучыларыбызны көтеп калабыз!

Менә 2020-21 укуелының икенче чиреге дә башланып китте. Укучылар инде ял иткән, яңа көчләр туплап гимназиягә белем алырга килгәннәр. Аларны биредә, әлбәттә, дәресләргә кадәр радио “каршылый”.  Бу чиректә эфирны 6 “Б” сыйныфы башлап җибәрде. Алар башта уку рейтингы белән таныштырып үтте, бу атнада үтәчәк чаралар белән таныштырды. Соңыннан алар истәлекле даталар турында да сөйләп киттеләр. Бүген рус халкының күренекле язучысы И.С.Тургеневның туган көне икәне, аның тормыш юлы, иҗаты турында сөйләнеп үтте. Ахырдан радио алып баручылары барлык укучыларга, укытучыларга яңа чиректә уңышлар теләде.

Безнең лагерь әле дә дәвам итә, һәм бүген укучыларыбыз К.Тинчурин ял паркында булып кайттылар. Балалар саф һавада йөрделәр, төрле уеннар уйнадылар.

Бездә лагерь дәвам итә,шуның белән бергә күңелле сәяхәтләр дә күбәя. Бүген балалар К.Насыйри исемендәге искиткеч музейда булып кайттылар. Күренекле галим, мәгърифәтче, тарихчы-этнограф, язучы һәм тел белгече Каюм Насыйрига багышланган Музей 2002 елның 2 февралендә ачыла. Ул урнашкан йорт XIX гасыр татар агач архитектурасы һәйкәле булып тора. Нәкъ менә биредә галим 1887 елдан 1902 елга кадәр яшәгән. Йорт Казанның Иске Татар бистәсенең тарихи-тыюлык территориясендә урнашкан. Хәзерге вакытта йорт үзенең иске урынында торгызылган, бинаның эчке планировкасы сакланган. Документаль материаллар буенча Каюм Насыйри яшәгән бүлмәләрнең берсе – бер үк вакытта торак бүлмә һәм фәнни лаборатория торгызылган. Музей экспозициясе Каюм Насыйриның тормышы һәм эшчәнлеге турында сөйли.Экспозициянең идеясенә тарихи-биографик һәм мемориаль-көнкүреш темаларын ачу, шулай ук татар мәгърифәтчелеге фикеренең үзенчәлекләрен һәм этапларын тирән аңлау салынган. Экспозициянең нигезе – басма, кулъязма һәм эпистоляр чыганаклар. Алар арасында К.Насыйриның хезмәтләре, шулай ук мәдрәсә дәреслекләре, татар халкының телдән иҗат үрнәкләре; туганнары, шаһитлары истәлекләре һәм шәхси архивлардан фоторәсемнәр бар. Балалар боларның барысы белән дә таныштылар, аларга әдипнең тормышы, иҗаты турында бик җентекләп сөйләделәр. Шуңа да алар барысы да бүген бик күп мәгълүмат, кызыклы яңа фактлар белә алдылар.

Лагерьга йөрүче укучыларыбызның һәр көннәре дә бик күңелле һәм файдалы үтә. Бүген алар кинотеатрга “Дедушка нелегкого поведения” фильмына барып кайттылар. Аннан соң балаларга инглиз теле буенча кызыклы дәресләр дә үткәрелде. Биредә кызыклы уеннан, күнегүләр башкарды алар. Бүгенге көннән дә укучылар үзләренә яңа һәм кызыклы мәгълүмат ала алдылар.

Бүгеннән башлап безнең гимназиядә "Яшь гражданнар шәһәре" көзге лагере башланып китте. Лагерь программасы бик продуктив һәм кызыклы. Беренче көнне үк балалар Болак урамында урнашкан Яшьләр театрында булдылар.Биредә алар кино жанрларын искә төшерделәр, үзләрен актерлар урынына куеп,төрле эмоцияләрен күрсәттеләр , төрле хәрәкәтләр аша башта кино жанрларын, аннан табигать күренешләрен күрсәттеләр. Фотосурәтләре буенча мультфильмнарны һәм аларның геройларын таптылар, "Чик-чирик" мультфильмын карадылар, аңа анализ ясадылар. Мультфильмдагы уңай һәм тискәре геройларны, тема һәм идеяне таптылар. Шуны әйтергә кирәк: боларның барысын да укучылар бик әйбәт башкарды. Бу көннән алар үзләренә кирәкле бик күп мәгълүмат тупладылар, күп яңалык белделәр.