18нче гыйнвар көнне табигый фәннәр декадасы кысаларында 8 нче сыйныфлар арасында “Җир-су хайваннары” дип аталган йомгаклау уен-дәресе үтте. Монда “Бакалар” һәм “Тритоннар” исеме астында 2 команда катнашты. Бу чарада алар үзләренең зиһенлелеген,  тизлеген һәм биология өлкәсендә белемнәрен тикшерделәр. Биредә капитаннар конкурсы, “Бочкадан..”, “Еракка-еракка” конкурслары, ребуслар, сканвордлар, төрле башваткычлар чишү булды. Зур булмаган  аермалык белән “Тритоннар” командасы җиңү яулады.

Гимназиябездә дәресләр күңелле үтә. Мәсәлән, сынлы сәнгать дәресендә 7 “А” сыйныфы бүген проектлар башкарды. Укучылар, берничә төркемгә бүленеп, төрле биналарның макетларын эшләделәр.

Гимназиябездәге “Музыкаль тәнәфес” сәхифәсенең бүгенге чыгарылышы үтә дә үзенчәлекле, бәйрәмчә булды. Чөнки бу айда безнең рухи тормышыбызда зур бер вакыйга булып үтә. 15 гыйнвар көнне композитор, педагог, профессор, СССРның халык артисты, СССР дәүләт премияләре һәм Татарстанның Габдулла Тукай исемендәге дәүләт премиясе лауреаты, Социалистик хезмәт герое Нәҗип Гаяз улы Җиһановның тууына 110 ел тула.

Шушы вакыйга уңаеннан без “Музыкаль тәнәфестә”  “Нәҗип Җиһанов музыкасы айлыгы” игълан иттек. Программабызда аның әсәрләренә урын киң биреләчәк, композиторның иҗатына һәм иҗтимагый эшчәнлегенә багышланган тапшырулар эфирга чыгачак. Ә бүген исә озын тәнәфесләрдә гимназиядә барысы да аның әсәрләре белән танышып үтте.

Укучыларыбыз бер урында гына тормый, ә төрле конкурс-чараларда да катнаша. Гимназия кысаларында үткәрелә торганнары турында гына сүз бармый. Балаларның күбесе район,шәһәр, республика күләмендә үткәрелә торган чараларда катнашып кына калмыйлар, ә җиңү дә яулыйлар. Мәсәлән,  укучыбыз Шамсутов Кәрим Татарстан Республикасы профессиональ тренерлар ассоциациясе оештырган рейтинглы шахмат турнирында катнашып, 2 нче урын яулаган. Котлыйбыз аны!

Ниһаять, озын бәйрәм ялларыннан, кышкы каникуллардан соң 3 нче чирек тә башланып китте. Бу – иң озын уку чиреге. Шуңа да укучыларыбызга тырышлык, түземлек, уңышлар һәм бик күп яңа белемнәргә ия булуларын телибез.

Беренче көн генә булуга карамастан, гимназия инде тулысынча укучыларны үзенең белем дөньясына алып кереп китте. Иртән, әлбәттә, билгеле музыкага иртәнге зарядка ясалды, ә аннан, һәр дүшәмбе була торган радиоэфир үткәрелде. Бүген 8 “А” сыйныфы чыгыш ясады, алар да гимназиядәге барлык кешеләрне яңа уку чиреге башлану һәм Яңа ел белән котладылар.

25 нче декабрь көнне гимназиябездә “Чыршы бәйрәме” үткәрелде. Биредә 1 нче сыйныфтан башлап 5 нче сыйныфка кадәрге укучылар катнашты. Бәйрәм һәр сыйныфка аерым куелды, балалар берничә командага бүленеп төрле кызыклы уеннарда катнашты. Нәтиҗәдә, кайсы команда күбрәк балл җыйган, шул җиңүче булып калды.

Бирегә Яңа елның төп кунаклары – Кыш бабай белән Кар кызы да килделәр, алар укучыларга күчтәнәчләр тараттылар, балалар белән  төрле уеннарда катнаштылар, биеп-җырлап чыршы тирәли әйләнделәр. “Чыршы бәйрәме” балаларның күңеленә хуш килде, алар Яңа ел, кышкы каникуллар алдыннан гимназиядә дә күңелле итеп ял итеп киттеләр.  Ә без укучыларыбызга күңелле каникуллар телибез!

Яңа ел бәйрәме якынлаша. Шуның билгесе буларак, инде урамнарда кичләрен гирлянда утлары җемелдәшә, бизәлгән чыршы һәм нарат агачлары күренә башлады. Гимназиядә дә әзерлек бара: урамда төрле төстәге гирляндалар җемелди, бүлмәләр берсеннән-берсе оста бизәлгән. Ә бүген укучылар Яңа ел тамашасы өчен чыршы дә бизәделәр. Шуңа да гимназиябездә хәзер Яңа ел хисе хөкем сөрә. 

Бүген сыйныфларда “21 нче гасыр геройлары. Кемнәр алар?” темасына сыйныф сәгатьләре оештырылды. Яшь буынга патриотик һәм рухи-әхлакый тәрбия бирү - мәктәпнең бурычларының берсе. Гражданлык-патриотик тәрбия бирү буенча чаралар үткәрү үсеп килүче буынга дөньяга караш формалаштыру һәм илнең тулы кыйммәтле гражданнарын тәрбияләү өчен бик мөһим. “21 нче гасыр геройлары. Кемнәр алар?” дигән темага сыйныф сәгате яшүсмерләрдә гражданлык-патриотик хисләр тәрбияләүгә лаеклы өлеш кертергә тиеш. Әлеге сыйныф сәгатенең төп максаты булып укучыларда патриотизм, гражданлык, әхлакый культура тәрбияләү, геройларга иҗтимагый хөрмәт һәм рәхмәт белдерү тора. Бу максат-бурычларны хәл итү аша  укучылар «герой», «батырлык», «героик адым» төшенчәләре белән танышты, бүгенге тормыш мисалында герой образын ачты, батырлык турында күзаллауларын формалаштырды.

4 нче сыйныфлар гимназиядә “Куркынычсыз юллар” дип аталган  бөтенроссия онлайн-олимпиадасында катнаштылар.  Олимпиада “Куркынычсыз һәм  сыйфатлы автомобиль юллары”  дигән милли проект кысаларында үткәрелә. Ул башлангыч сыйныф укучыларының юлларда куркынычсызлык кагыйдәләрен үзләштерүгә исәпләнгән. Олимпиаданың максаты – юл хәрәкәте иминлеге мәсьәләләрендә мәктәп укучыларының һәм аларның ата-аналарының хәбәрдарлыгын арттыру.  Биредәге биремнәрне үтәү юл йөрү кагыйдәләре турында белемнәрне ныгытырга ярдәм итә.

Бу атнада “Музыкаль тәнәфес” проектында Салих Сәйдәшев атналыгы узды. Ул бөек татар композиторының 120 еллыгына багышланган. Бу көннәрдә эфирда мәшһүр татар композиторы турында мәгълүмат, Сәйдәш җырларын, аның музыкаль әсәрләреннән  өзекләр  тыңлап була. Атна дәвамында озын тәнәфесләрдә  Салих Сәйдәшев музыкаль мирасының иң яхшы үрнәкләре тәкъдим ителә.

2020 елның 3 декабрендә кабатланмас якты талант иясе, халкыбызның сөекле композиторы Салих Җамалетдин улы Сәйдәшевнең тууына 120 ел тулды. Ул - татарның җир-табигать биргән мәшһүр Сәйдәше, профессиональ милли музыка сәнгатебезнең классигы. Аның исеме мәдәниятыбыз тарихына алтын хәрефләр белән язылган. Татар музыка культурасы тарихында композиторлык профессиясе Салих Сәйдәшев исеме белән бәйләнгән. Ул - татар музыка культурасына нигез салучы беренче профессиональ композитор. Сәйдәшев моңнарының иҗади нигезе халык жырлары чишмәсеннән башлана. Ул, талантлы композитор булуы белән бергә, халыкчан иҗат итә белү сәләтенә дә ия булган. Шуңа күрә аның иҗаты милли, халыкчан, әсәрләре тирән мәгънәле, кызыклы, тыңлаган саен тыңлыйсы килә торган. Салих Сәйдәшев музыкасы үзенең эчкерсезлеге, матурлыгы, затлылыгы белән дулкынландыра, моңландыра, яктылыкка, яхшылыкка чакыра.