Бүгеннән бездә балалар өчен язгы лагерь үз эшчәнлеген башлады. Биредә укучылар күңелле һәм файдалы итеп вакытларын уздыралар. Бүген алар паркта саф һавада йөрделәр, конкурсларда, викторинада катнаштылар.

Укучыларыбыз “Без наркотиксыз тормыш өчен” дигән плакатлар ясадылар.

Бөек татар шагыйре Габдулла Тукай болай дип язган: “Халык җырлары — халкыбыз күңеленең һич тә тутыкмас вә күгәрмәс саф вә раушан көзгеседер. Бу — бертөрле сихерле көзгедер. Чөнки халыкның бер генә җырын тотып нечкәләсәң, шөбһәсез, аның халәте рухиясен, нәрсә уйлаганын вә ни хакында нинди фикердә икәнен белеп буладыр”. Әйе, татар халкының традицион музыкаль мирасы әйләнә-тирә мөхит турында бетмәс-төкәнмәс мәгълүмат бирә.

Безнең укучыларыбыз да татар халык җырларын яратып башкаралар. Нәкъ тә шуңа күрә аларны бүгенге “Музыкаль тәнәфес”тә укучыларыбыз үзләре башкардылар. Биредә “Умырзая”, “Ай, былбылым”, “Әпипә” һ.б. кебек татар халык җырлары яңгырады. Ә озын тәнәфесләрдә гимназиядәге һәрбер кеше аларны яратып тыңлады.

Сәламәтлек ул – чыныгу, дөрес туклану, көндәлек режим, яхшы эмоцияләр, хезмәт һәм хәрәкәт. Күп кеше хәзерге заманда сәламәт яшәү рәвеше алып бара. Укучыларыбыз арасында да спорт сөючеләр бик күп. Нәкъ тә алар бүген “Сәламәт тәндә – сәламәт акыл” дип аталган проектлар якладылар. Алар үзләренең көн тәртибе, яратып шөгыльләнгән спорт төре, ирешкән нәтиҗәләре белән таныштырдылар.

18 нче мартны Кырымның Россиягә кушылуы көне билгеләп үтелә. Бездә дә гимназиянең тарих һәм җәмгыть белеме укытучылары бүген дәресләрдә биш минутлык чыгышлар әзерләгәннәр иде. Биредә Кырым Республикасының усеше, аның тарихи һәм мәдәни һәйкәлләре, табигый һәм туристик истәлекле урыннары, казанышлары һ.б. турында сөйләнелде.

Гимназиядә 3-4 нче  сыйныфлар өчен “Мин һәм Тимер юл” дип аталган рәсем конкурсы үтте. Балалар тимер юл белән бәйле юл йөрү кагыйдәләрен дә үзләре ясаган рәсемнәрдә искә төшергәннәр, шуңа да күп игътибар кагыйдәләргә бирелгән.

“Сан дәресе” бөтенроссия проектында без бик теләп катнашабыз. Бүген дә укучыларыбызга “Пилотсыз транспорт” дип аталган тема буенча дәрес уздырылды. Балалар үзләренә кызыклы мәгълүмат алдылар, кызыксындырган сорауларына җавап таптылар.

Бүген, 16 нчы март көнне, Казан шәһәренең Үзәк Госавтоинспекциясеннән инспектор Нурмухаметов С.Р. безнең башлангыч сыйныф укучылары өчен юл йөрү кагыйдәләре буенча лекция укыды.

Баскетбол буенча гимназия чемпионатының икенче ярымфиналы төгәлләнде. Соңгы уеннарның нәтиҗәсе булып түбәндәгеләр тора:

1 урын – 10 “А”;

2 урын – 11 “А”;

3 урын – 9 “Б”;

4 урын – 9 “А”.

Бүген, 16 нчы март көнне, “Сәләтле буын” шәһәр бәйгесенең “Сәхнә остасы” номинациясендә катнашкан 4 “Б” сыйныфы укучыбыз Муллагалиева З. бүләкләнде.