Патриотик тәрбия айлыгы кысаларында "Яшелләр" һәм "Зәңгәрләр" командалары арасында бадминтон ярышы булып узды. Һәр катнашучы бик тырышып уйнады. 8 сыйныфтан Фазылова Зәринә - 1 урын, 7 сыйныфтан Харисова Ләйсән -2 урын, 5 сыйныфтан Закарова Илнара 3 урынга лаек булды. Егетләр арасында урыннар түбәндәгечә билгеләнде: 1 урын- Фатыйхов Фәннур (11 сыйныф), 2 урын- Мөхәммәдиев Булат (7 сыйныф), 3 урын- Сафин Айнур (8 сыйныф). Гомуми нәтиҗә ясап әйткәндә, бу ярышта "Зәңгәрләр " командасы җиңү яулады.

"Ялкын" бию төркеменең шөгыльләре Тимершык мәдәният йортында уза. "Талантның бер өлеше тумыштан, тугыз өлеше тырышлыктан" ди халык мәкале. Бу чыннан да шулай. Матур биюләрне сәхнәгә чыгарганчы бик күп шөгыльләнергә кирәк. Балалар Фазылҗанов Илназ Рәисович җитәкчелегендә төрле бию күнегүләре эшлиләр,конкурсларга әзерләнәләр, түгәрәккә бик теләп йөриләр. 4 февраль көнне булып узган иҗат- отчет концертында да биючеләребез үзләренең чыгышлары белән матур тәэссир калдырдылар. 

Һәр елны февраль ае хәрби-патриотик тәрбия айлыгы буларак үткәрелә. Быел да бу айлык кысаларында  "Аҗаган" уены, биатлон, Әфганстанда хезмәт иткән якташларыбыз катнашында волейбол ярышлары, стройда җырлап узу бәйгеләре һ.б. чаралар планлаштырылды. Бүген  мәктәп спортзалында югары сыйныф укучылары арасында баскетбол ярышлары булып үтте. Ярышта егетләр арасында "Яшелләр" командасы, кызлар арасында "Зәңгәрләр" командасы җиңү яулады. Иң яхшы уенчылар: Харисова Ләйсән (7 класс), Гарифуллина Илсинә (8 класс), Валиева Гөльяз (9 класс), Якупов Ильназ (9 класс), Фатыйхов Фәннүр (11 класс) булды.

6 февраль көнне китапханәче Гөлсинә Касыймовна тарафыннан  Ватанны саклаучылар көненә багышланган китап күргәзмәсе оештырылды. Укучыларыбыз татар һәм рус телләрендә чыгарылган китаплар аша сугыш елларының авырлыгын күзаллый алдылар.

Бүген мәктәп янындагы хоккей коробкасында авыл җирлекләре командалары арасында хоккей ярышлары булып узды. Исәп түбәндәгечә:

Тимершык - Шәмәрдән: 2:1

Тимершык - Юлбат : 5:4 (буллитта)

Явлаштау - Юлбат: 1:4

Явлаштау - Шәмәрдән: 4:1

Тимершык командасы составында 8 нчы сыйныф укучысы Сафин Айнур, 9 нчы сыйныф укучысы Гарифуллин Айзат та катнашты. Җиңүләрегез белән котлыйбыз, молодцы!

Һәр елны январь аенда мәктәптә студентлар белән очрашу кичәсе үткәрелә. Быел ул 27 нче январь көнне булды. Узган уку елында 11 нче сыйныфны тәмамлаган укучыларның укытучылар адресына әйтелгән рәхмәт сүзләре, кызыклы фикерләр, уеннар, биюләр матур хәтирәләр калдырды, мәктәпне тәмамлау алдында торган югары сыйныф укучылары өчен файдалы булды. Очрашу кичәсен оештырган тәрбия эшләре буенча директор урынбасары Гүзәл Рәшитовнага рәхмәтебезне белдерәбез.

Бүген 6 нчы сыйныфта техник хезмәт буенча ачык дәрес үткәрелде. Укытучы Илнур Габделбәрович укучыларга "Кара һәм төсле металларның үзлекләре" дигән теманы аңлатты. Укытучы күрсәтмә материаллардан уңышлы файдаланды, теманы тормышчан мисаллар белән ныгытты. Дәрес уңай бәяләнде.

Бүген икенче сыйныф укучылары җитәкчеләре Миңсылу Фәнәвиевна белән "Кояшкай" балалар бакчасына кереп, "Сәяхәтче әтәч " әсәрен сәхнәләштерделәр. Бу спектакль "Курчак театры" дип аталган дәрестән тыш эшчәнлек вакытында  өйрәнелде. Укучыларның чыгышыннан балалар да , тәрбиячеләр дә бик канәгать калды.

Тимераякта шуу- кышкы спорт төрләренең иң күңеллеседер , мөгаен. Мәктәп янында каток  булу укучылар өчен бик зур файда һәм сөенеч. Дәрестә һәм дәрестән тыш вакытларда укучылар бик теләп  тимераякта йөрү серләренә төшенәләр.

Бүген кышкы лагерьның соңгы көне.Башта балалар өчен бадминтон ярышы оештырылды.Аннан соң лагерь ябылышына карата укучылар үзләре әзерләгән концерт номерларын күрсәттеләр.Алар барысы да актив катнашты һәм бүләкләнде. Төшке аштан соң балалар "Саба" бассейнына юл алдылар.Менә шундый күңелле чара белән 7 нче көн дә тәмамланды.

Әле алда -  тагын берничә көн  каникуллар. Хәерле яллар!