2013 елда Казанда Универсиада үтәчәк. Шул уңайдан төрле чаралар , конкурслар үткәрелә. "Команда -2013"  проекты нигезләмәсе буенча безнең мәктәп укучылары  һәм укытучылар тарафыннан стенд эшләнде. БИҮ дән, ДООЦ тан килгән методистлар каршында 9 сыйныф укучылары Гарифуллина Илсинә, Фазылова Зәринә һәм 6 сыйныф укучылары чыгыш ясадылар. 

Бүген мәктәптә "Укытучылар көне" билгеләп үтелде. 10 сыйныф укучылары Энҗе Әнәсовна җитәкчелегендә  чара күрсәттеләр. Бәйрәм һәр кешедә матур хисләр калдырды. 

4 октябрь көнне мәктәбебездә "Өлкәннәр көне" билгеләп үтелде. Беренче өлештә кунакларга  укучылар көче белән әзерләнгән концерт күрсәтелде. Ә аннары бәйрәм      тантанасы ашханәдә дәвам итте.

27 сентябрь көнне мәктәбебездә "Чисталык дәресләре" булып узды. Сыйныф сәгатьләрендә, дәресләрдә чисталык турында даими сөйләшенә, мәктәп янында, чишмә тирәләрендә  өмәләр үткәрелә. Биология укытучысы Энҗе Әнәсовна башлангыч сыйныфларда экология буенча презентация күрсәтте. Табигатебезгә карата мәрхәмәтле булырга, пычратмаска тиешлегебез турында әйтелде.

2012-2013 нче уку елы башланып китте. Быел безнең мәктәптә 118 укучыга 24 укытучы белем һәм тәрбия бирәчәк. Яңа укытучыларыбыз да бар: физкультура укытучысы - Шакиров Рафил Шамилевич, өстәмә белем бирү педагогы - Фазылҗанов Илназ Рәисович. Яңа уку елында барыгызга да уңышлар, иминлек һәм сәламәтлек телибез!
 

Бүген лагерьның соңгы көне. Көн кызыклы һәм мавыктыргыч булды. Иртәнге аштан соң укучылар “Үлгәннәрнең каберен бел, исәннәрнең кадерен бел”дип исемләнгән чарада катнаштылар. Аны тарих укытучысы Хаҗиев А.Х. үткәрде. Икенче аштан соң кече Сабантуй уздырылды. Укучылар уеннарда бик актив катнаштылар.Обед ашаганнан соң лагерь ябылышына карата концерт  куелды , флаг төшерелде. Укучылар лагерьга бик теләп йөрделәр. Хәзер инде аларны алда җәйге каникул көтә. Каникуллар күңелле үтсен!

Хәрби- патриотик атналык дәвам итә. Бүген татар теле  укытучысы Нуруллина З.Ф. “Солдатта булган диләр” дип исемләнгән чара үткәрде. Ул анда яңа гына армия сафларыннан кайткан Гыйләҗиев Илназны чакырган иде. Шулай ук презентация күрсәтелде, анда армиядән кайтмый калган, Әфганстанда хезмәт иткән солдатлар турында  мәгълүматлар  яктыртылды. Һәлак булганнарны 1 минут тынлык белән искә алдылар.Икенче аштан соң укучылар кабат бассейнга юл тоттылар.

Бүген укучылар сугыш һәм тыл ветераннары хөрмәтенә открыткалар ясадылар. Алар бу бүләкләрен бабаларына һәм әтиләренә бүләк итәчәкләр.Икенче аштан соң укучылар Саба музеенда һәм китапханәсендә экскурсиядә булдылар, үзләренә күп мәгълүмат алдылар. Обедтан соң саф һавада уеннар уйнадылар.