Бакчабызда йомгаклау  чаралары, каникулларда төрле чаралар, конкурслар даими үткәрелә. Соңгы атнаның лидерлары- зурлар төркеме балалары (тәрбиячеләре- Алсу Хамитовна, Ләйсән Альфакаровна) һәм икенче кечкенәләр төркеме балалары (тәрбиячеләре- Фәния Фаттаховна, Ләйсән Равилевна) булды. Алар "Татарстанда яшәүче җәнлекләр" рәсем конкурсында актив катнашып, балалар бакчасының грамотасы белән бүләкләнделәр. Аларны уңышлары белән котлыйбыз, алга таба да зур уңышлар телибез.

  Безнең балалар бакчасыннан музыка җитәкчесе Галимуллина Алсу Ринатовна әзерләгән "Энҗе бөртекләре" ансамбле Саба мәдәният йортында балалар җырлары һәм татар халык җырларын башкаручы балалар арасында үткән "Җырлы балачак" бәйгесенең йомгаклау өлеше- финалда  катнаштылар. Ансамбльнең  “Хәерле көн” җыры белән чыгышын жюри югары бәяләде. Алар II призлы урынга лаек булдылар.  “Энҗе бөртекләре” ансамбле  Саба муниципаль районы Башкарма комитетының мәдәният бүлегенең  дипломы белән һәм балалар акчалата бүләк белән тәбрикләнделәр. Нәни артистларыбызны уңышлары белән котлыйбыз, аларга алга таба да талантларын үстерергә язсын дигән теләктә калабыз.Чыгышны  "Саба дулкыннары" ТВ эфирында күрә аласыз.

Атна буе балалар белән бик матур әңгәмәләр үткәрелде, чөнки һәрбеосе үзенең яраткан эте, песие, авылдагы әбиләренең хайваннары турында апаларына, иптәшләренә бик яратып, сөенеп сөйләделәр. Аларны тасфирлап ясадылар, кисеп- ябыштырдылар, җырлар, шигырьләр өйрәнделәр, төрле презентацияләр карадылар, күп төрле әкият, хикәяләр тыңладылар, рәсемнәр карап алар буенча матур җөмләләр төзеп сөйләргә өйрәнделәр. Ә йомгаклау чарасы итеп рус теле тәрбиячесе Ләйлә Рафаэловна "Угадай, это кто?" табышмак кичәсе үткәрде. Балалар русча табышмакларга җавапларны бик тиз таптылар. Җавапларның дөреслеге  презентациядә күрсәтелде. Шулай ук тәрбиячеләр балаларга "Сертотмас үрдәк" курчак театры күрсәттеләр. Ахырда балалар  атна дәвамында өйрәнгән шигырьләрне сөйләделәр, җырладылар, әкиятләрне күрсәттеләр.

Бисмиллахир-рахман-иррахим.
Башлыйк әле сүзне, туганнар.
Шул сүз белән эшкә тотынганнар,
Безгә кадәр бирдә булганнар.
Ананы бар һәм бер дип белгән
Бабалардан гыйбрәт аласы.
Кем булсаң да, халкың үткәненнән 

 Йөз чөермә, заман баласы.

Шундый шигъри юллар белән балалар бакчабызда "Корбан” бәйрәме башланып китте. Бәйрәмгә Флюра  абыстай килгән иде. Аңа балалар бәйрәм кичәсе күрсәттеләр, ә Флюра абыстай вәгазьләрен җиткерде. Соңыннан бәйрәм табын артында корбан ашы белән тәмамланды. Балалар өчен Корбан ашы үткәргән районыбыз җитәкчеләренә рәхмәтебезне җиткерәбез.

7 -9 октябрьда Казанда регионара семинар  үткәрелде. Семинар темасы: "Обсуждение проекта ФГОС дошкольного образования и "дорожных  карт" введения ФГОС ДО". Мәктәпкәчә белем бирүдә  ФГОС проекты буенча  фикер алышулар алып барылды. Бу семинарда районның өлкән тәрбиячеләре катнашты. Семинарда методологик мастерскойлар, түгәрәк өстәлләр, Казан балалар бакчаларының эш тәҗрибәләре белән уртаклаштык.

“Ипи ничек өстәлгә килә” – рәсем конкурсы балалар һәм әти- әниләр арасында үткәрелде. Бу конкурста икенче кечкенәләр төркеме әти- әниләре бик актив катнаштылар. 1 урынга Гафурова М,, Шәрәфиева Г., Закиров А., 2 урын-Рафиков З., Галимов И., 3 урын- Давлетшин Ә.,  Фатхрахманов А. лар лаек булды. Конкурста катнашкан әти- әниләр һәм балаларга зур рәхмәт, алга таба да иҗади уңышлар телибез. 

4 октябрь көне, укытучылар көненә багышланган Район конференциясендә безнең "Кыңгырау" балалар бакчасының шәфкать туташы Ильясова Рисәлә Карибулловна Саба муниципаль районының Грамотасы белән бүләкләнде. Аны чын күңелдән котлыйбыз, алдагы тормышта һәм эшендә уңышлар телибез!

Бакчабызда  "Сөмбелә" бәйрәме үткәрелде. Бу бәйрәмне икенче кечкенәләр төркеме балалары "Яфраклар"  җырлы- биюе белән башлап җибәрделәр. Бәйрәмдә һәр төркем балалары көз турында өйрәнгән җыр, бию, шигырьләрне башкардылар. Бәйрәмгә Сөмбелә дә килде. Балаларга ул табышмаклар, уеннар алып килде. Шулай ук Уңыш бабай да килде, әлбәттә буш кул белән түгел, аның да бик матур уеннары, җырлары бар иде, ә тагын балаларга көз күчтәнәчләрен алып килгән. Бәйрәмдә Солтанова М.Р. җитәкләгән  "Әкият илендә" түгәрәгендә йөрүче балалар "Тыңлаусыз кыяр баласы" театрын куйдылар. Театр бәләкәй тамашачыларга бик ошады.