Иртәнге линейкада көндәлек план белән танышылды, инструктаж үткәрелде. Балалар мәктәп бакчасында эшләделәр, су сибелде.  " Янгын -зур афәт " темасына әңгәмә үткәрелде, саклык чаралары турында кисәтелде. Көндезге аштан соң балалар спорт мәйданчыгында күңелле уеннар уйнадылар ,җиңел атлетика буенча да көч сынаштылар , җиңүчеләр билгеләнде. Сәламәт рух, физик ныклылык гел янәшәдә булсын иде.

Иртәнге линейкада кичәге көнгә отчет тыңланды, яңа хезмәт көненә эш билгеләнде.Иртәнге аштан соң балалар бакчада  тырышып эшләделәр.Сайфеева Р.В.  " Һөнәрләр илендә" темасына ачык чара үткәрде ,һөнәр сайлауның җаваплы икәнлегенә төшендерде. Балалар үзләре яраткан профессия турында фикер алыштылар.Көндезге аштан соң ачык һавада  "  Чиста су " темасына сөйләшү узды. Тырыш хезмәт һәм күңелле ял дәвамлы булсын дигән уйлар белән өйләргә таралыштык.

"Дуслык" лагереның 1 атнасы-экология атналыгы. 2нче көн "Табигать  көне" дип исемләнде. Иртәнге линейка һәм гимнастикадан соң "Күңелле стартлар", "Джунгли чакыра" уеннары оештырылды. Икенче иртәнге аштан соң "Зөлхиҗҗә " чишмәсенә экскурсиягә бардык. "Җирне чәчәкләр белән бизик" аппликацияләр бәйгесендә һәркем теләп катнашты.

1 июнь көнне мәктәбебездә 15 укучыга исәпләнгән хезмәт һәм ял лагере  үз эшчәнлеген башлап җибәрде. Иртәнге линейкадан соң укучылар куркынычсызлык техникасы кагыйдәләре, лагерьның эш планы белән таныштырылды. Иртәнге аштан соң мәктәп яны тәҗрибә участогында эшләдек. Эштән соң хәрәкәтле уеннар уйнау, җиңүчеләрне билгеләү  белән беренче көн дәвам итте.

Бүген  30 балага исәпләнгән ял һәм сәламәтләндерү лагере "Дуслык"  үз эшен башлап җибәрде. 1 июнь-Халыкара балаларны яклау көне уңаеннан "Бәхетле балачак" дип исемләнгән беренче көн бик күңелле узды. Авылдашыбыз-шәхси эшмәкәр Рифкат абый Шафиков чакыруы буенча "Туган авыл" күңел ачу комплексына кунакка бардык. Анда Утар интернат мәктәбендә тәрбияләнүче балалар белән очраштык, бер-беребезгә концерт номерлары күрсәттек. Музейда элекке эш кораллары, йорт кирәк-яраклары белән танышканнан соң, әлеге комплекста эшләүче мини-зоопаркта булып, төрле экзотик кошлар, җәнлекләр тормышы белән кызыксындык. Күл буенда аккошлар, ташбакалар  белән хозурландык. Балаларга шундый матур мизгелләр бүләк иткән Рифкат абыйга чын күңелдән рәхмәт белдерәбез, исәнлек-саулык, уңышлар телибез.

20 майда мәктәптә "Наркотикларсыз тормыш" айлыгы башланып китте. Шушы исемдәге стендка айлыкның планы,  укучылар иҗат иткән плакатлар, рәсемнәр урнаштырылды, 28 май көнне 8-11 класс укучылары  белән  "Татлы тормышның ачы җимешләре" темасына  әңгәмә узды, презентация күрсәтелде. Әңгәмәне тәрбия эшләре буенча директор урынбасары Измайлова Г.М. уздырды.

Бүген мәктәбебездә "Наркотикларсыз тормыш" айлыгы кысаларында гомуми ата-аналар җыелышы узды. Җыелышта Саба районы прокурор ярдәмчесе Фәйзетдинова Энҗе Тәлгатовна, балигъ булмаганнар эшләре буенча өлкән инспектор Романова Алина Георгиевна, авыл җирлеге башлыгы Сафин Айрат Камилович катнашты. Әти-әниләргә  һәм югары класс укучыларына 21 гасыр афәте-наркоманиянең нинди аяныч нәтиҗәләргә китерүе тагын бер кат искәртелде, хокук бозуларны булдырмау юнәлешендә киңәшләр бирелде.

24 май көнне Олы Кибәче урта гомумбелем бирү мәктәбендә 11 классны тәмамлаучы  9 укучы өчен “Соңгы кыңгырау” яңгырады.

 Әти-әниләр, укытучылар һәм укучылар өчен бик истәлекле  булган бу бәйрәмдә Саба муниципаль  районы Аппарат җитәкчесе Якубов Рамис Фәнилович, район мәгариф бүлеге методисты Давлетшина Г.Ф., Олы Кибәче авыл  җирлеге башлыгы Сафин А.К., якташларыбыз- “Болгар” радиосы яңалыклар хезмәте җитәкчесе Шәрәфиева Л.Р., Казан шәһәре 32нче мәктәбе директоры Хасанова Л.Х. катнашты. Алар һәрберсе укучыларны бәйрәм белән котлап,  иң изге теләкләрен җиткерделәр.

"Оста куллар" түгәрәгенә йөрүчеләр уку елы дәвамында төрле кул эшләренә өйрәнделәр. Чигү, бәйләү, тозлы камыр белән эш, күннән эшләнмәләр, квиллинг, оригами кебек төрләрдә кызлар эшләгән эшләр бик матур килеп чыкты. Түгәрәктә йөрүчеләр  төрле бәйгеләрдә дә актив катнаштылар, үзләренең сәләтләрен арттырдылар, кул эшләре белән әти-әниләрен дә сөендерделәр. Бу көннәрдә түгәрәкнең йомгаклау дәресләре уза. Җитәкче-Шакирова Л.Г.

Бу уку елында мәктәбебез укучылары фән олимпиадаларында 13 призлы урын яулады. Район күләмендә олимпиада призерларын бүләкләү тантанасында 8 укучы катнашты. Мәктәп олимпиада нәтиҗәләре буенча район күләмендә 3 урын алды. Барлык призерларга һәм аларны әзерләгән укытучыларга рәхмәт белдерәбез.