Дәресләрдән соң  мәктәп  тирәсен  чистарту  буенча өмәләр дәвам итте.

Язгы игелек атнасы дәвамында укучылар ялгыз әби-бабайларга, сугыш һәм тыл ветераннарына ярдәм иттеләр. Олы Кибәче һәм Төбәк авылларындагы һәйкәл-обелиск тирәләрен җыештырдылар.

Бүген бөек шагыйрь Габдулла Тукайның туган көне уңаеннан мәктәбебездә "Күңелләрдә син, Тукай!" дип исемләнгән шигырь бәйрәме узды. 2-11 класс укучылары катнашында узган әлеге чарада Тукай шәхесенең бөеклеге, аның иҗатының  чиксез байлыгы тагын бер кат расланды. Укучылар Тукай иҗат иткән шигырьләрне сөйләделәр, сәхнәләштереп күрсәттеләр, аңа багышлап үзләре язган шигырьләре белән таныштырдылар. Чараны татар теле һәм әдәбияты укытучылары Гафиятова Ә.Ф., Сафина С.З. оештырды.

Мәктәп-безнең икенче йортыбыз. Аның тирә-ягы чиста һәм матур булу һәммәбез өчен дә күңелле. "Язгы игелек атнасы" кысаларында бүген узган шимбә өмәсендә мәктәбебез тирәсе тәртипкә китерелде.

24 апрельдә Саба сәләтле балалар мәктәбендә "Яңа караш" фәнни-практик конференциясе  узды. Әлеге чарада мәктәбебездән  3 укучы катнашты. 10 класс  укучысы Сабирова Гөлназ "Әдәби әсәрләрдә иярченле  кушма җөмләләр" темасына чыгыш ясап 1нче урын (җитәкчесе-Гафиятова Ә.Ф.), 9 класс укучысы Камалов Райнур "М.Мәһдиев әсәрләренең русчага тәрҗемәләрендә фразеелогиянең бирелеше" темасына эшләнгән фәнни-эзләнү эше белән 3нче урын (җитәкчесе-Сафина С.З.) яуладылар. Камалов Райнур "Роль деепричастий в художественной и разговорной речи" темасына чыгыш ясап Сертификат белән бүләкләнде. (җитәкчесе-Измайлова Г.М.). Бу укучыларга  алга таба да  фәннәр белән кызыксынуларын киметмәүләрен, уңышларга ирешүләрен телибез.

20-27 апрель көннәрендә мәктәбебездә Европа иммунизация атналыгы кысаларында чаралар уза. 22 апрельдә  "Бердәм Россия Яшь Гвардия" челәре  1- 7 класс укучылары алдында "Прививкалар-ышанычлы саклану чарасы" темасына, 24 апрельдә 8-11 класс укучылары өчен "Үзеңне авырулардан ничек сакларга?" дигән темаларга чыгыш ясадылар. Алар үз чыгышларында дифтерия, столбняк, туберкулез кебек авырулар турында сөйләделәр,  аларны кисәтүдә прививкаларның  ролен чагылдырдылар.

Бүген хореография түгәрәгенә йөрүче укучылар "Сәләтле балачак-өметле киләчәк" фестиваленең хореография номинациясендә чыгыш ясадылар.

17 апрельдә "Сәләтле балачак-өметле киләчәк" фестиваленең  "Театр һәм фольклор"  номинациясе  буенча  бәйге узды. Мәктәбебезнең ""Күңелле сәхнә" түгәрәгенә йөрүче укучылары әлеге бәйгедә "Чишмәләр чакыра" исемле әдәби-музыкаль композиция  белән чыгыш ясадылар. Алар үзләренең  чыгышларында татар халкының чишмәләргә мөнәсәбәтен чагылдырдылар, чишмә буенда уйналган кичке уен, су юлы күрсәтү күренешләрен сәхнәләштерделәр. Җитәкче-өстәмә белем бирү педагогы Газизова Г.Р.

Бүген 11 класста ата-аналар җыелышы узды. Рус теле, математика, сайлап алу фәннәреннән бирелгән репетицион тест нәтиҗәләре анализланды.