6-11 классларда  Беренче Бөтендөнья  сугышы башлануның 100 еллыгына багышланган  Батырлык дәресләрендә  класс җитәкчеләре дөнья тарихында зур эз калдырган  әлеге вакыйга , аның аянычлы саннары турында сөйләделәр. "Беренче Бөтендөнья сугышы", "Россия Бөек сугышта" дигән видеофильмнар күрсәтелде. Патриотик рухта узган бу дәресләрне Бөек Җиңүнең 70 еллыгы уңаеннан планлаштырылган чараларның бу уку елында иң беренчесе дияргә була.

Бу көннәрдә укытучылар төрле предметлар буенча секция утырышларында катнашып, алдагы уку елына анализ ясыйлар, яңа уку елына бурычлар билгелиләр. 22 августта узган пленар киңәшмәдә  география һәм татар теле укытучысы  Сафина С.З. район хакимияте башлыгы Рәхмәт хатына , тәрбия эшләре буенча директор урынбасары Измайлова Г.М. ТР мәгариф министрлыгы Мактау грамотасына  лаек булды,  "Бадминтон" түгәрәге җитәкчесе Мубаракзянов Р.Р. уңышлы эшчәнлеге өчен премия белән бүләкләнде. Аларны котлыйбыз,барлык укытучыларга да алдагы уку елында саулык, иҗади уңышлар телибез.

Бүгенге көннән мәктәбебезнең 2 укучысы "Кояшкай" лагереның техник иҗат сменасында ял итә башлады. Күңелле яллар аларга.

Бакчабызда  карлыган өлгерде. Кызыл һәм кара карлыган кайнатмасы кышкы табыннарга витамин өстәсен, дип барлык укытучылар күмәкләшеп карлыган җыйды.

Мәктәп яны тәҗрибә участогын бизәүдә һәр класс үзеннән өлеш кертте. Бакчабызның бер почмагы чын әкият дөньясына әйләнде. 

Мәктәбебез тирәсе шау чәчәккә күмелгән. Җәйнең бар яме, матурлыгы шушы чәчәкләрдә чагыла сыман. Үз хезмәтеңнең нәтиҗәсе күпләрнең күзләрен иркәләве бакчада эшләүчеләргә дә күңелле.

Укучыларга хезмәт тәрбиясе бирү,буш вакытларын файдалы итеп уздыру максатларыннан җәйге каникул чорында 14 яше тулган 25 укучы эшкә урнаштырылды. Шуларның 8е июнь аенда хезмәт куйса, бүгенге көндә 14 укучы эшли. 2 укучы Олы  Кибәче һәм  Төбәк авылы клубларында, 1 укучы "Күбәләк" ясле-бакчасында, 2 укучы КФХ "Хадеев М.М.", 9 укучы  ООО "Саба" ның "Сатыш" филиалы "Кибәче" бүлекчәсендә эшли.

Бүген "Дуслык" ял һәм сәламәтләндерү лагереның соңгы көне. Кызыклы бәйгеләр, күңелле очрашулар , экскурсияләр белән 21 көн узып та киткән. Барлык  эшчәнлеккә йомгак ясап, лагерь турында фикерләрне язмаларда һәм рәсемнәрдә чагылдырганнан соң,  ял итүчеләр авыл Сабантуе узучы мәйданга юл тоттылар. Анда авыл җирлеге белән берлектә   балалар Сабантуе узды. Бик күп балаларны һәм авыл халкын җыйган бу бәйрәмдә  Сабантуена хас булган барлык уеннар да уйналды, бүләкләр дә бик мулдан иде. Балалар рәхәтләнеп күңел ачтылар, уйнадылар. Соңгы көн һәркемнең исендә калырлык булып узды. Җәйге ялның калган көннәре дә файдалы һәм кызыклы булсын.

"Яңа танышлар" дип исемләнгән бүгенге көн яңа дуслар табарга, яңа очрашуларга бай булды. "Дуслык" лагеренда ял итүчеләр Олы Арташ төп мәктәбендә эшләүче "Кояшкай" лагере белән очрашты. Күршеләр безне бик матур концерт номерлары белән сәламләгәннән соң, командаларга бүленеп  төрле станцияләр аша уздылар. "Кем күбрәк!", "Пантомимо", "Көйне таны", "Бас , кызым, Әпипә!" станцияләрендә балалар  төрле яктан үзләренең сәләтләрен һәм көчләрен күрсәттеләр. Дискотекада бергәләп бию балаларны тагын да якынайтты. Үзара бүләкләр алышып, кабат очрашырга сүз куешып аерылыштык без "Кояшкай" лагере белән.

Бүген -Хәтер көне. "Дуслык" лагеренда узган барлык чаралар әлеге көнгә багышланды. "Сезнең батырлык- мәңгелек" темасына патриотик сәгатьтә Бөек Ватан сугышында катнашкан авылдашларыбыз, аларның батырлыгы турында сөйләшү булды."Бөек Җиңүгә-70"  дип исемләнгән рәсемнәр бәйгесендә барлык укучылар катнашты. Икенче көндезге аштан соң Олы Кибәче авылында урнашкан һәйкәл-обелиск янына барып, тыл ветераннары, сугыш чоры балалары  катнашында узган митингта катнаштык. Сугышта һәлак булганнарны  бер минутлык тынлык белән искә алып, алар истәлегенә венок салдык. Сугыш чоры баласы, дәһшәтле сугышта әтисен югалткан Мөнәвәрә апа Аглямованың  чыгышын балалар тетрәнеп тыңладылар. Бүгенге көнебез дә  нәтиҗәле булды:  укучылар  тынычлыкның кадерен белергә, сугыш һәм тыл ветераннарын хөрмәт итәргә сүз бирделәр.