26 апрель көнне 8-11 классларда "Чернобыль кайтавазы" дип исемләнгән чара узды. 9 класс укучылары 1986нчы елның 26 апрелендә Чернобыль атом электростанциясендә   булган фаҗига турында сөйләделәр. Әлеге коточкыч авариянең экологик зыяны белән таныштырдылар.   Авария калдыкларын  чистартуда катнашкан ливидатор -якташыбыз Камалов Фәрзетдин абыйның тормышы турында мәгълүмат бирделәр.

Бөтенроссия "Геогргий лентасы" акциясендә безнең мәктәп укучылары да теләп катнаша. Алар  хәрби дан символы булган әлеге лентаны  тараталар, сугыш һәм тыл ветераннары чардуганнарына беркетәләр.

26 апрель көнне мәктәбебездә 1 - 11 класс укучылары катнашында "Без - Тукай оныклары" дип исемләнгән шигырь бәйрәме үткәрелде. Бәйрәм Г. Тукай сүзләренә язылган җырлар белән үрелеп барды. Татар халкының гимнына әйләнгән  " Туган тел" җыры белән тәмамланды. 

Бөек шагыйребез Г.Тукайның 130 еллыгына багышланган чараларда укучыларыбыз актив катнашты. Казан федераль университеты уздырган "Аны халык бик яшьләй үз шагыйре итеп таныды" Бөтенроссия  сәнгатьле сөйләм бәйгесенә Гафиятова Илзия (укытучы Гафиятова Ә.Ф.), Сафина Сөмбелә (укытучы Сафина С.З.), Каримова Рузинә (укытучы Измайлова Г.М.), Шайхеразиева Зөлфинә (укытучы Сайфеева Р.В.) чыгышлары тәкъдим ителде. Шайхеразиева Зөлфинә  әлеге бәйгенең җиңүчесе булып танылды һәм КФУда узган бәйрәм тантанасында катнашты. 

 Мәктәбебезнең тимурчылык отряды  үзенең эшен дәвам итә.Алар ялгыз әби-бабайларга булышалар,чишмәләр чистарталар. "Язгы игелек атнасы" кысаларында  бер төркем  укучылар Төбәк авылында  урнашкан һәйкәл-обелиск янын тәртипкә китерделәр.

Сафина Сиринә З. Габдулла Тукайның 130 еллыгы уңаеннан 5-7  сыйныф укучылары арасында "Безнең уен" дип исемләнгән интеллектуаль уен үткәрде.Уен  "Г.Тукайның тормыш юлы", " Тукай иҗаты","Тукай сәнгатьтә", "Шигырьне таны" кебек бүлекләрне үз эченә алган иде.Уен барышында укучылар барысы да активлык күрсәттеләр,ә җиңүне 6 нчы сыйныф укучылары яулады.

 "Күңелле сәхнә" түгәрәгенә йөрүче укучыларның чыгышы-һәр бәйрәмнең бизәге.  Бүген алар Г.Тукайның "Су анасы" әсәрен курчак театры спектакле буларак тәкъдим итте.

Мәктәбебезнең 9 нчы сыйныф укучысы Юзеева  Нәркизә (укытучысы Гафиятова Әнисә Фәнил кызы)19-22 көннәрендә Казан шәһәрендә үткән татар теле һәм  татар әдәбиятыннан халыкара олимпиадада катнашты.Уңышлы чыгыш ясап,I дәрәҗәдәге Дипломга ия булды. Нәркизәгә планшет һәм истәлекле бүләкләр тапшырылды.Укучыбызны һәм укытучысын   зур җиңүләре белән котлыйбыз! Афәрин! Уңышлар сезгә!

"Оста куллар" түгәрәгенә йөрүче 3нче сыйныф укучысы Харисова Диләрә (укытучысы Шакирова Ләлә) Г."Сәләтле балачак-өметле киләчәк" конкурсында катнашып  декоратив- гамәли сәнгать номинациясендә "Туган ягым" дигән эшен тәкъдим итте һәм призёр булды.Котлыйбыз!

"Оста куллар" түгәрәгенә йөрүче 6нчы сыйныф укучысы Давлиев Сәйдәш (укытучысы Вильданов Наил М.) "Сәләтле балачак-өметле киләчәк" конкурсында катнашып декоратив- гамәли сәнгать номинациясендә " Мультфильмнарның  тылсымлы дөньясы" дигән эшен тәкъдим итте  һәм призер булды.Котлыйбыз!