Кар сыннары бәйгесендә безнең мәктәп, 3нче ел рәттән, 1нче урын яулады. Мәктәп тирәсен ямьләндерүдә катнашкан барлык кешегә зур рәхмәт!

Бүген лагерьның 3 нче көне. Иртәнге линейка һәм гимнастикадан соң отрядлар "Әкияттә кунакта"  интеллектуаль бәйге-уенда көч сынаштылар, "Күңелле стартлар" да үзләренең җитезлек һәм көчләрен сынадылар, "Мин-тылсымчы" чарасында катнаштылар. Көндезге аштан сод  "Хәзинәләр утравы" әдәби квесты узды. Балалар "Тәмле тукталыш", "Җитезләр бүлмәсе", "Биремле сандык", "Куркыныч бүлмә", "Тапкырлар утравы", "Биючеләр аланы" тукталышларында булып, үзләрен төрле яктан күрсәттеләр. Барлык биремнәр үтәлеп беткәч, бергәләп Кыш бабай хатын эзләп таптылар һәм аның бүләгенә лаек булдылар.   Бүгенге көнебез истә калырлык һәм бик күңелле узды.

Кар сыннары ясауда бар коллектив актив катнашты. Эшебезнең матур нәтиҗәсе- мәктәбебез янында Кышкы әкият барлыкка килде. Кыш бабай һәм Кар кызы каршылаган капкадан эчкә үтсәң,  2015нче елның символы Кәҗә белән саубуллашып, Яңа ел хуҗасы Маймыл белән танышырга мөмкин. Алар янында Әдәбият елын чагылдырган китап. Китап битләрен ачуга, әкият дөньясына килеп керәсең. Кемнәр генә юк биредә: Кәҗә белән Сарык та, Тукайның Шүрәлесе һәм Пушкинның галим Мәчесе дә,  Йомры икмәк  һәм Төлке, Сертотмас Үрдәк һәм Керпе, мич башындагы Емеля,  Чуар тавык һ.б. Түргәрәк узсаң, ял паркына килеп җитәсең. Ә биредә гаҗәеп күл.  Күлнең хуҗалары да һәммәбезгә дә таныш: Аккош-патша, Алтын балык, Бака-патшабикә, Су анасы. Алар янында Парклар һәм скверлар елының бар яңалыкларын чагылдыручы зур экран.  Янәшәдә генә бик матур тау.  Олы Кибәче урта мәктәбе янындагы әкият иленә рәхим итегез!

27 декабрь көнне мәктәбебездә 45 укучыга исәпләнгән "Дуслык" ял һәм сәламәтләндерү лагере эшли башлады. Беренче көнне укучылар лагерь программасы белән таныштылар, куркынычсызлык техникасы буенча инструктаж  үттеләр. "Снежный  барс", "Снежинки", "Чыршыкай" отрядларына бүленгән балалар үз отрядларында оештыру эшләре белән мәшгуль булдылар. 1-5 клас укучылары өчен оештырылган Чыршы бәйрәмендә дә лагерьда ял итүчеләребез бик актив катнашты. Беренче көн көндәлек эшкә йомгак ясау белән тәмамланды.

Һәр ел саен республика буенча "Кыш бабайга бүләк" бәйгесе үткәрелә.Бу бәйгедә укучыларыбыз бик теләп катнаша. 1 нче сыйныф укучысы Солтанов Әмирнең,3 нче сыйныф укучысы Сагитова Азалиянең эшләре җибәрелде.1 нче сыйныф укучысы Солтанов Әмирнең эше I урынга лаек булды. 

1-5 класс укучылары өчен оештырылган бәйрәм "Хуш киләсең, Яңа ел!" дип исемләнде. Тамашаны "Быел  кар яумаячак, суыклар да булмаячак. Димәк, Яңа ел да килмәячәк" дигән шомлы хәбәр белән 5 класс укучылары -"Кара каргалар"  башлап җибәрде.  Төрле сөйләшүләр алып баргач, кар яуганлыгы һәм рәхәтләнеп  бәйрәм итәргә мөмкин булуы ачыкланды.  Бәйрәмгә сихерчеләр дә, ялган Кыш бабай һәм Кар кызы да килеп китте. Куяннар һәм калган җәнлекләр дә бәйрәм кичәсен ямьләндерде. Кем генә килмәсен, балалар  ишектән күзләрен дә алмыйча, Кыш бабай һәм Кар кызын көттеләр. Бергәләп аларның бүләкләрен дә эзләп таптылар. Кыш бабай да бик юмарт булды: һәр чыгыш тәмле күчтәнәчләр белән бәяләнде. Балалар рәхәтләнеп күңел ачтылар: биеделәр, җырладылар, әйлән-бәйлән уйнадылар. Яңа ел тамашасы зал тутырып килгән әти-әниләргә дә бик ошады.

26 декабрь көнне мәктәбебездә 6-11 класс укучылары өчен "Чыршы утлары яктысында" дип исемләнгән Яңа ел тамашасы узды. Бәйрәмчә бизәлгән спорт залының түрендә урман гүзәле-Яшел чыршы, ул төрле шарлар, гирляндалар белән искиткеч матур бизәлгән. Чыршы тирәсендә укучыларыбыз тамашачылар игътибарына иң матур концерт номерларын тәкъдим иттеләр. Яңа елга багышланган җырларны шаян һәм күмәк биюләр, аларны кызыклы скетчлар алыштырды. Чыгышлар арасында төрле уеннар узды. Район олимпиадаларында призлы урыннар алган укучылар, аларның әти-әниләре һәм укытучылары да хөрмәтләнде бу бәйрәмдә. Аларга Грамоталар, Рәхмәт хатлары, истәлекле бүләкләр тапшырылды. Бәйрәм бик күңелле узды.