Бу көннәрдә гимназиядә хәйрия ярминкәләре гөрләп узды. Әлеге чара укучыларның сәүдә эшенә сәләтләрен, логик фикерләүләрен, җитезлекләрен генә сынап калмады, ә аларның никадәр гадел, мәрхәмәтле булуларын күрсәтте. Ярминкәдән җыелган акчага ятим балаларга, инвалидларга ярдәм оештыру карала. Халыкта: " Изгелек эшлә дә суга сал, кеше күрмәсә, балык күрер ",- дигән мәкаль бар. Әлеге чарада катнашкан укучылар, укытучылар, зур йөрәкле, кешелекле булулары белән матур, чөнки алар яныбыздагы ярдәмгә мохтаҗ кешеләргә битараф тугелләр.

Гимназиянең баскетбол кызлар командасы Шәһәр Мэры кубогына оештырылган ярышларда 3 урын алды . Остазлары физкультура укытучысы Хайруллин Нәзфәт Ашрафулла улы кызлар командасын системалы рәвештә бишенче сыйныфтан бирле тәрбияли. Әйдәгез, спортсмен кызларны котлыйк! Алар: 9-10 нчы сыйныф укучылары Азалия Камалова, Рания Давләтшина, Айсылу Шаехова, Гүзәл Галимова, Әминә Халилова, Зәринә Салахова, Зилә Зәйнуллина, Зәринә Сәхәбетдинова. Афәрин, кызлар, сез булдырасыз!
 

Тиздән Әниләр көне җитә. Әлеге бәйрәм уңаеннан гимназиядә матур чаралар уза. "Гаилә- бәхет ачкычы" дигән концерт программасы белән "Энергетик" мәдәният йорты артистлары югары сыйныф укучыларына, укытучыларга концерт куйдылар. Чараның төп тематикасына туры китереп, ата-ана хакы, гаилә бәхете, туган нигез турында җырлар сайланган иде. Яшь тамашачылар концертны яратып кабул итте.

Әниләр көне уңаеннан кулдан ясалган открыткалардан күргәзмә ясау матур традициягә керде. Никадәр иҗади , сәләтле, матурлык тудыра белүче укучылар икән бездә! Ул открыткаларга салынган әниләрне ярату хисе искиткеч нәфис чәчәкләргә күчкән! Ул открыткаларда күзләрне иркәли, җаннарны дәвалый торган көч бар! Безнең күргәзмәгә рәхим итегез!

Чаллы филармониясе һәм “Мизгел” театр студиясе яшь артистлары катнашында С. Хафизованың "Сак-Сок канатларының сере" балалар мюзиклын гимназия укучылары яратып карадылар. Мюзикл мәдәният һәм сәнгать өлкәсендә милли эчтәлектәге иҗади проектларны тормышка ашыру өчен каралган Россия Президенты гранты ярдәме белән оештырылган. Бу мюзикл — балаларның иҗади сәләтләрен үстерү белән бергә милли татар традицияләрен саклауга юнәлтелгән проект. «Мюзиклның нигезенә «Сак-Сок» бәете салынган, ләкин ул тәрбияви аспектны яхшылык җиңүе белән тәмамлана торган өметле йомгак белән алыштырган, гаиләдәге иминлекнең һәркемгә тигез бүленеп бирелгәнлеген ассызыклый торган итеп үзгәртелгән. Моннан тыш та мюзикл эчтәлегендә әдәби ачышлар күп яшеренгән, барысын да ачып салсаң, карауның тәме бетәр дип,бар нечкәлекләргә тукталмыйбыз. Мюзиклның режиссеры – Леонид Скороходов - гаҗәеп матур сәхнә әсәре тудырган. Текст, куелыш, сюжет, киемнәр – барысы да энәсеннән җебенә кадәр уйланган, яшь тамашачы зәвыгына туры килерлек итеп сайланган. Композиторлар Ильяс Камалов һәм Лилия Тарханова язган көй милли калоритларга бай, матур яңгырашлы. Мюзикл Бронислав Семичов җитәкчелегендәге халык уен кораллары оркестры башкаруында яңгыраган музыка астында бара. Филармония артистлары Нурислам Яхин, Рэм Кәримов, Гөлназ Каюмова, Миләүшә Фазылҗанова башкарган җыр партияләре тамашачыны хис-кичереш дулкынында йөздерә, вакыйганың чынбарлыгына ышандыра. Әлеге остазлар янында ”Мизгел” театр студиясендә тәрбияләнүче яшь артистлар Илназ Кадыров, Әмирхан Йосыпов, Артур Тукранов сәхнәдә үзләрен иркен тоталар, рольләрен искиткеч оста башкаралар. Яр Чаллы филармония директоры Нәфисә Әхмәтшина җитәкләгән иҗади коллективка, 4 санлы музыка мәктәбенең өстәмә белем бирү педагогы Раилә Тулуповага үсеп килүче буында милли зәвык тәрбияләү өчен куйган тырышлыклары өчен рәхмәт белдерәбез. Әлеге проект бик күп иҗади шәхесләрнең хыял-теләкләрен тормышка ашырып, татар милли сәнгатен заманча пропогандалауга юл ача. Сак-Сок канатларының сере менә шунда! (Энҗе Нурисламова, тәрбия эшләре буенча директор урынбасары).

"Тылсым" театр студиясе өчен ноябрь ае башы уңышлы яңгырларны коеп кына торды . Ун көн эчендә зур өч бәйгедә катнашып, өчесендә дә җиңүчеләр булдылар! "Бөркетләр очарга өйрәнә!" рәсәйкүләм патриотик конкурста беренче урын алдылар! Без тылсымчыларыбызны, остазларын котлыйбыз!!!Афәрин!

Гимназиянең "Тылсым" театр студиясе яшь артистлары К.Тинчурин исемендәгө драма һәм комедия театры оештырган " Яшь чикләре булмаган театр" республикакүләм бөйге- фестиваленең сайлау турында катнашуы турында хәбәр иткән идек. Бүген алар әлеге бәйгенең гала-фестивалендә икенче урын яулап кайттылар! Р.Батулланың "Ана каргышы" драмасын тамашачылар бик яратып кабул иттеләр. Сәхнәгә чыккан яшь артистларның - Наилә Валеева, Кәрим Насифуллин, Дамир Вәлиевның - җаннарны тетрәндерерлек итеп уйнаулары , костюм- декорацияләрнең, ут-тавышның куелышы - болар театр сәнгатенә чын гашыйк остазлар Татарстанның атказанган артистлары Шиһапова Энҗе һәм Әскарова Чулпанның һәм алар җитәкләгән театр студиясе укучыларының бердәм зур казанышы. Афәрин, тылсымчылар!

Гимназия "Татарча диктант" акциясендә катнашу өчен, 230 кешелек мәйданчык булып теркәлде. Әлеге чараны уздыру гимназия традициясенә әйләнде. Бәйрәмчә кәеф, күтәренке күңелле ата-аналар һәм туган телен кадерләүче укучылар, диктант яздырырга килгән иҗади шәхесләр - болар әлеге чараның матур бизәкләре . Татарча диктант яздырырга җырчылардан Сәрия Набиуллина һәм Айгөл Шәйхетдинова, журналистлардан Резидә Ганиева белән Сәрия Гарипованың килүе акциягә зыялык, зәвыклык өстәде. Чарага килгән ата-аналар игьтибарына татарча белүнең әһәмияте турында видеосюжет, әлеге акция тарихы белән бәйле гимназия архивында булган фотосурәтләрдән торган презентация күрсәтелде. Акциядә катнашучыларны Сәрия Нәбиуллина, Айгөл Шәйхетдинова, Резидә Ганиева үзләренең моңлы, дәртле, гамьле җырлары белән сәламләделәр. Бәйрәм төсен алган чара, кабинетларга таралып, диктант язу белән дәвам итте. Татарча диктант акциясендә катнашкан ата- аналар чарадан туган тәэсирләре белән уртаклаштылар. "Без бүген шундый матур чарада - татарча диктант язуда катнаштык. Минем беренче генә килүем түгел, бер барган кеше гел бара. Башта шундый матур очрашу, кечкенә концерт була. Ул туган телдә аралашу, танылган кешелэр белән танышу аша оештырыла. Аннан, мәктәп елларын искә төшереп, диктант язу . Быел да чара югары дәрәҗәдә оештырылган иде. Гимназия директоры Лиза Набиулллина белән тәрбия эшләре буенча директор урынбасары Энҗе Нурисламова, татар теле укытучылары Суфия Валеева, Нәзлия Фатиха - сез милләт сагында торучы бердәм команда, рәхмәт, шундый матур итеп чара оештыргансыз, бик куңелле , файдалы чара булды. Әти-әниләр, киләсе елларда сезне акциядә катнашырга чакырам, килегез, куңел байлыгы алып кайтыгыз", - дип язды акциядә катнашкан Эльмира Нуретдинова. Мондый кайтавазлардан соң хактан да Татарча диктант акциясенең әһәмиятен аңлыйсың. Бу- үзеңне, туган телеңне хөрмәтләү, аны киң массаларга пропагандалауның бер юлы.

Халыклар бердәмлеге көне алдыннан «Зур этнографик диктант» мәгърифәтчелек акциясе старт алды. Гимназия укучылары Россиядә яшәүче халыкларның тарихын, гореф-гадәтләрен һәм мәдәниятен ни дәрәҗәдә белүләрен тикшереп карый алдылар. Зур этнографик диктантта 23 укытучы һәм 137 укучы катнашты. 16 яшькә кадәрге катнашучылар 20 гомумфедераль сорауга җавап бирсә, 16 яшьтән өлкәнрәкләр 20 гомуми сорау һәм Россиянең һәр субъекты буенча уникаль 10 сорауга җавап бирделәр. Әлеге чара файдалы да, мәгълүматлы да, кызык та булды.

«Экспрессия» бию ансамбле “- Петербургта узган " Күңел тартуың - Артист булу" (« Призвание - Артист») халыкара бәйгедә икенче урын яулады! Гатина Лилия Вафир кызы җитәкләгән ансамбль төньяк кала тамашачысына татар халкының "Шәл бәйләдем" һәм "Яңгыр астында" заманча биюләрен тәкъдим итте. Афәрин! Татар халкының бию сәнгатен пропагандалауда күрсәткән тырышлыгыгыз, иҗади дәртегез һәм җиңүегез мактауга лаек!