Зур җиңүләр җиңелдән генә бирелми. Гимназиянең физкультура укытучысы Нәсфәт Әшрәфуллович 8б,8в кызларыннан көчле "Баскетболистлар" командасы туплауга зур хезмәт куйды. Кызлар белән ярышларга иртәнге, кичке якта hәрдаим әзерләнделәр. Быел  кызлар командасы зур нәтиҗә күрсәтте: шәhәр командалары арасында , 3 урын алып, җиңү яуладылар. Котлыйбыз!
 

Гимназиядә «Холокостка багышланган атналык» акциясе кысасында чаралар узды, тарихи вакыйгага багышланган газеталар чыгарылды, сыйныф сәгатьләре узды. Дөнья тарихында “Холокост” дип, 1941-1945 еллардагы Икенче Бөтендөнья сугышында Өченче рейх тарафыннан төрле милләтләргә карата кылынган геноцид фаҗигасен атыйлар. Холокост – инглизчәдән һәм борынгы грек сүзеннән “ут белән юк итү” дигәнне аңлата. Икенче Бөтендөнья сугышына кадәр үк Германиядә кешенең милләтенә карап эзәрлекләүләр башланудан бигрәк тә яһүдләр зур зыян күрә. Аерым бер милләтләрне юкка чыгару сугыш барышында яулап алынган территорияләрдә дә дәвам итә. Освенцим концлагере ул чордагы меңләгән “үлем лагерьләре”нең берсе була. Менә шул хакта гимназиянең 9 -11 сыйныф укучылары өчен тарих фәне укытучысы Каюмов Ринат Гапдрахман улы дәрестән тыш чара уздырды. Укучылар игътибар белән тыңладылар, тарихи вакыйгалар йөге гаҗәеп авыр булды.

Быел кыш кар-бураннарын төяп килде, берничә көн дәвамында юлларны, өйләрне кар катламына төреп тә куйды. Бу көннәрдә бер көрәк кар атучы табылуга ихлас сөендек, дисәк, бер дэ арттыру булмас. Без кардан ачылган юлларда сөенеп йөрибез, шул буранлы көннәрдә, мәрхәмәтлелек күрсәтеп, ярдәмгә килгән кешеләргә рәхмәтлебез. Гимназия территориясе зур, шуңа өстәп, шугалак та бар, барысын да кардан арындырасы, укырга килүче балалар өчен юллар ачасы бар . Бу көннәрдә hәркем эчке тынычлыгын югалтты. Ләкин ни хикмәт, дүшәмбе көн гимназиягә килгәндә, кар көрәлеп, юллар ачылган иде, гүя әкияттәгәге гыйфритләр төн буе эшләгәннәр диярсең! Ә чынлыкта, бу гимназиянең тынгы белмәс укытучылары Хәйруллин Нәсфәт Әшрәфулла улының, Мөгинов Фаик Фоат улының, хужалык эшләре буенча директор урынбасары Гисмиева Ризидә Мөктәсим кызының үтенече буенча ярдәмгә килгән әти - әниләрнең тырышлыгы нәтиҗәсе икән! Тиз арада әти-әниләр ярдәме оештырган сыйныф җитәкчеләре Хаматова Ләйсәния Бариевна, Нафикова Ландыш Хопбулловна, Абдуллина Гүзәлия Раифовна, Харисова Эльмира Инсафовна, Закирова Сания Маликовна, Сәгыйтова Әнисә Әмировна, Фәйзуллина Флүзә Габдулловналарга зур рәхмәт!

"Первые шаги"-"Беренче адымнар" фестиваль - конкурсы Бүген гимназиябездә эшләп килүче, Татарстанның атказанган сәнгать эшлеклесе Әлфия Тәүфыйковна җитәкләгән 'Әллүки" вокал ансамбле, "Первые шаги" дип аталган ачык республикакүләм фестиваль -конкурста катнашты. Әлеге фестиваль -конкурс шәһәребездәге 1нче санлы балалар һәм яшүсмерләр иҗат йортында уздырылды. Әлеге конкурста тәүге тапкыр чыгыш ясауларына карамастан, "Әллүки"леләр үзләрен бик иркен тоттылар, матур итеп җырладылар. Кечкенәдән үк җыр сәнгате серләренә өйрәтүче педагог -Әлфия Тәүфыйковнага сокланмый мөмкин түгел. Чөнки ул бик таләпчән, үз эшен җиренә җиткереп башкаручы остаз. Чыгышларыгыз белән һәрдаим сөендереп торыгыз, югары үрләр яуларга насыйп булсын!

19 гыйнвар көнне 14 нче балалар һәм яшүсмерләр үзәгендә шәһәркүләм семинар узды. Ул юл хәрәкәтләрендә катнашучыларның иминлеген саклап калуга, профилактик чараларның иң нәтиҗәлеләрен билгеләүгә караган бик актуаль темага багышланды, шулай ук «Имин көпчәк 2024» рәсәйкүләм конкурска әзерлек эше дә ачыкланды. Әлеге семинарда 2 нче гимнзиянең ЮИД отряды белән эш алып баручы Алсу Миннемөхәммәт кызы Фәттахова да үз доклады белән чыгыш ясады. Ул үз эшчәнлегендә эффектив педагогик метод буларак квест-уеннар куллануы турында сөйләде. Нәрсә ул квест-уеннар, аларның максаты, бурычлары нинди? Шул сорауларга җавап бирелде. Һәм, әлбәттә, әлеге квест-уеннар аша укучылар юл йөрү кагыйдәләре белән танышып кына калмыйча, уен вакытында ул кагыйдәләрне куллана, аларга нигезләнеп төрле башваткычларны чишәргә һәм уен дәвамында килеп чыккан авырлыклардан чыгу юлын табарга өйрәтте. Мәктәптән өйгә һәм өйдән мәктәпкә илткән юл - мәктәп баласы өчен үзе бер квест-уен. Әлеге юлны һәр бала исән-имин үтәргә тиеш. Шуны онытмаска кирәк! Әлеге чара бик урынлы hәм файдалы узды.

Яшүсмерләр арасында тәртип бозу очракларын кисәтү, тәртип бозу очраклары өчен каралган административ җаваплылык, ялган чакыру очракларының ничек начар тәмамлануы хакында «Электротехниклар» полиция бүлеге өлкән инспекторы майор Милюкова Галина Ивановна гимназия укучылары белән эчтәлекле әңгәмә уздырды. Татар халык мәкалендә: «Караклыкның башы энә урлаудан башлана»,- диелгән кебек, жинаятьнең башы да гадәти тәртип бозудан башланырга мөмкин. Тәртипсезлек, начар гадәткә әйләнмәсен өчен, вакытында кисәтелергә тиеш. Моның өчен мәктәп-гаилә-хокук саклау органнарының үзара аңлашып, максатчан эшләве кирәк.

Ашагыз, кошкайларым! Кыш көне барлык тереклек ияләре ярдәмгә мохтаҗ, аеруча кошлар. Шуны истә тотып, гимназиябезнең 6а сыйныфы укучыларыннан торган тимурчылык хәрәкәте (сыйныф җитәкчесе Старовайтова Светлана Владимировна) һәм Укучылар Советы активистлары (җитәкчесе -Билалова Гөлсинә Хөснулловна) һәрдаим кошкайларның җимлекләрен чистарталар, аларга җим сибәләр. Кошлар көнбагыш, ак икмәк валчыклары, чистартылган арахис, урман чикләвеге төшләрен, бик вак итеп тарттырылган солы, эремчекләрне аеруча ярата, ди укучылар. Табигатьнең бер бизәге булган кошлар турында кайгыртып бик дөрес эшлисез, афәрин укучылар. Изге эшләрегез дәвамлы булсын!

Гимназия ,бик күп конкурс- бәйгеләрдә катнашып , дәрәҗәле урыннар алып килә. Чираттагы "Минем гаиләм татарча сөйләшә" конкурсында Хәбибуллиннар гаиләсенең "Иң шаян гаилә"номинациясендә җиңү яулавы- моның ачык мисалы. 2024 нче ел Рәсәй күләмендә Гаилә елы дип игълан ителде. Әлеге тату гаилә, ел башында ук Яр Чаллы мәгариф идарәсе җитәкчесе Рөстәм Нияз улы Хуҗин имзалаган "Рәхмәт хаты" алып , безне куандырды. 8А сыйныфында укучы Хәбибуллин Әмир һәм аның әти-әнисенә, сыйныф җитәкчесе Шайхаттарова Сәвия Өлфәт кызына : «Афәрин, сез булдырасыз» , - дибез. Киләчәктә тагын да зуррак уңышларга ирешергә насыйп булсын!

Каникуллар башланды!

Укучылар мастер-классларда, шәhәрдәге балалар өчен иҗат йортларындагы чараларда, музейларда вакытларын файдалы hәм кызыклы итеп уздыралар.

Бу көннәрдә гимназиядә укучылар өчен Яңа ел тамашалары уза. Әлеге бәйрәм чарасында укучыларның сәләтләре ачыла, алар үзләренең чыгышлары белән сыйныфташларын , дусларын шаккаттырып кына калмыйлар, ә матур сәнгать төрләрен популяштыралар, үзләренең тырышлыклары белән ирешкән уңышларын күрсәтәләр. Әлеге бәйрәмдә яңгыраган җырлар, заманча биюләр, саксофон көйләре укучыларга бик ошады. Бәйрәм программасы дөньяның төрле илләрендә Яңа ел бәйрәме ничек уздырылу тарихына корылган иде. Чараны алып баручы Ишалина Адилә белән Гайнетдинов Айзатның гаять дәрәҗәдә зәвыклы булулары, сөйләм телләренең камиллеге бәйрәмнең тамашачы күңеленә барып ирешүенә юл ачты. Ә Кар кызы - Ганиева Таңсылу- әлеге бәйрәм тамашасы өчен әнисе белән махсус күлмәк теккән. Күз явын алырлык Кар кызы балалар тарафыннан әкият дөньясыннан килгән образ буларак кабул ителде. Кыш бабай, Хоттабыч рольләрен башкаручы Малихов Арслан белән Фатхуллин Азамат , сәхнәгә беренче тапкыр чыксалар да, үзләрен артистларча иркен тоттылар. Яңа ел чарасының сценарий авторы - Нурисламова Энҗе Әзhәм кызы, музыкаль бизәлеш остасы -Валиев Марат Минсабир улы, актлар залын бәйрәмчә бизәүче - Билалова Голсинэ Хөснулла кызы җитәкчелегендә үзидарә командасы, матур чыгышлар белән чыгыш ясаучы гимназия укучылары булды. Бердәм тырышлык белән гаҗәеп матур чара узды. Киләсе еллар имин, матур мизгелләргә бай булсын!