Кем куллары өйне, җирне ямьли,
    Игелеге үлчәү тапкысыз?
    Ул, әлбәттә, яшәү чыганагы,
    Тормыш яме - Әнкәй, хатын – кыз!
    Язның беренче көннәре безгә матур бәйрәмне – хатын – кызлар көне – 8 мартны алып килде. Безнең бу бәйрәмне карлар эри башлаганда, табигать уянган чорда билгеләп үтүебез очраклы хәл түгелдер, мөгаен. Чөнки хатын – кыз борын – борыннан безнең өчен дөньядагы иң гүзәл нәрсәләрне – чиксез мәхәббәтне, күңел җылылыгын, тормышчан тирән акылны гәүдәләндерә. Һәм яз көне табигатьтә була торган барлык үзгәрешләр безнең хатын – кызга булган хисләребезгә аваздаш. Нәкъ менә хатын – кызлар җир йөзенә яңа тормыш алып килә.
    Мәктәбебездә шаулап-гөрләп “Яз бәйрәме” булып узды. Кичә, клуб мөдире Фәния апа җитәкчелегендәге, фольклор төркеменең “Бәби карау” дип исемләнгән театраль күренеш белән башланып китте. Килгән кунакларга укучыларыбыз, шулай ук клуб, китапханә, музей мөдирләре катнашында, матур шигырьләрдән, җырлардан, үзенчәлекле биюләрдән, берсеннән берсе матур теләкләрдән торган әдәби-музыкаль кичә күрсәттеләр. Ахырдан үз куллары белән ясалган чәчәкләрен, открыткаларын әниләренә, әбиләренә бүләк иттеләр.

    Тиздән Халыкара хатын-кызлар көне якынлаша. 8 Март! Балачактан ук ул Әни бәйрәме буларак дөньядагы иң зур, иң мөһим бәйрәм булып истә калган. Кояшлы язны алып килүе белән ул күңелгә тагын да җылылык өсти, йокыга талган өметләрне уята. Бигрәк матур яңгырый бу 8 Март дигән сүз! Җир йөзендә һәр хатын-кызны бәхетле иткән көн бит бу. 
    Мәктәбебез бу көннәрдә шау-гөр килеп тора. Бәйрәмгә әзерлек эшләре бара: кемдер җырын кабатлый, кайберәүләр биюләрен өйрәнә, ә кайберәүләр залны бизәү өчен чәчәкләр ясый. Барлык укучылар да бик тырышып үз куллары белән әниләренә бүләк әзерли. Бу кулдан ясалган эшләнмәләрдә балаларның күпме йөрәк җылысы салынган бит!

    3нче март көнне мәктәбебездә Бөтенрәсәй кышкы фестивале кысаларында "Гаилә белән ГТО" уеннары уздырылды. Һәр гаилә уеннарга зур әзерлек белән килгән иде. ГТО нормаларын гаилә әгъзалары үз яшенә туры килгәнчә тапшырды. "Зур гаилә уеннары" күтәренке рухта үтте.

    2 нче март көнне ут күршеләребез булган Әтнә районы Күнгәр урта мәктәбендә инглиз теле укытучылары өчен районара практик-ориентлашу семинары үткәрелде. Семинар "Инглиз теле дәресләрендә коммуникатив УУДларны формалаштыру" дигән темага алып барылды. Укытучылар үзләренең чын мәгънәсендә көчле булуларын, укыту алымнарын яхшы белүләрен күрсәттеләр, төрле методларга таянып үткәрелгән дәрес элементлары да тәкъдим ителде.

    Мәктәбебездән әлеге семинарда инглиз теле укытучысы Гузәл Зөфәр кызы, директорыбыз Ильфар Ильдар улы, Утар Аты мәктәбеннән Ләйсән Фәргать кызы катнашып тәҗрибә уртаклаштылар. Бу чараны оештырып, безне чакырган укытучыларга зур рәхмәт белдерәбез. Мондый аралашу бик мөһим, киләчәктә дә элемтә югалмасын иде дигән теләктә калабыз...

    1март – наркоманиягә һәм наркобизнеска каршы Халыкара көрәш көне.
    Кайбер яшүсмерләрнең үз-үзен тотышы бүген күпләрне борчый. Җәмгыятебездә киң тамыр җәйгән наркомания кешедә булган кимчелекләр, фикерли, уйлый белмәү нәтиҗәсендә яшәп килә. Наркотик татарчага тәрҗемә иткәндә “йокы китерүче” мәгънәсен аңлата. Аның кешелеккә китергән зыянына тиңнәр юк, чөнки ул берьюлы өч буынны юк итә. Наркотик кулланучының гомер озынлыгы бик кыска, шуңа да ул гаилә корып яшәргә өлгерә алмый кала. Аларның әти-әнисе балаларының тайгак юлга кереп китүләрен авыр кичерә. Бу кайгыдан аларның да гомере вакытыннан алда өзелә. Наркотиклар белән дуслашуның төп сәбәбе тормышта очраган авырлыкны җиңә белмәү, җиңел яшәргә тырышу, мөстәкыйльлек булмау яки ниндидер матур сүзләргә ышанып яңа дуслар табу, аларга ышану...

    Советлар Союзы Герое исеменә лаек булган каһарманнар – чын мәгънәсендә халкыбызның зур горурлыгы, рухи ныклыгы һәм мактанычы. Еллар үтү белән аларның һәркайсының шәхси батырлыгы белән кызыксыну көчәя бара. Сугыш елларында ук инде республикабызның танылган язучылары, журналистлары һәм галимнәре батырлар турында материаллар туплый башлыйлар, алар турында “Кызыл Татарстан”, “Красная Татария” газеталарында, “Совет әдәбияты” журналында әдәби–публицистик язмалар бастыралар. Татарстан китап нәшриятында аерым җыентыклар булып та чыга аларның ул әсәрләре. Төрле фронтларда татар телендә нәшер ителүче газеталарның хәбәрчеләре дә бу өлкәдә үзләреннән лаеклы өлеш кертәләр - каһарманнарыбыз турында йөзләгән очерк-зарисовкалар иҗат итәләр.
    Бүген тәрбия сәгатьләрендә "Минем якташларым - Советлар Союзы Геройлары" исемле темага сөйләштек. Укучыларга Арча районыннан чыккан Советлар Союзы Геройларының автобиографиясе, сугышчан юлы, бүләкләү кәгазьләре, сугышчан характеристикалары турында мәгълүмат бирелде.
    Исәннәрнең кадерен, үлгәннәрнең каберен бел, дигән мәкальне онытырга ярамый. 

    Бер бәйрәм бар февральдә

    Кадерле ул һәркемгә.

    Аны иң зур бәйрәм дип

    Мөмкин хәтта әйтергә.

Ул тынычлык бәйрәме

Аны һәр кеше белә.

Ватанны саклаучылар

Бәйрәме дип йөртелә.   

    24 нче февраль көнне Ватанны саклаучылар көне уңаеннан оештырылган бәйрәм әнә шундый шигырь юллары белән башланып китте. Программа буенча укучылар “Аҗаган” хәрби-патриотик уенын йомгаклау этабына җыелдылар. Атна буе барган спорт ярышларының иң кызыгы “Күңелле стартлар” булды. Мәктәпкә кунак итеп хәрбиләр, әтиләр чакырулы иде. Авылыбызның отставкадагы өлкән прапорщигы Габделфәт абый, Чечняда һәм Әфганстанда хезмәт иткән солдатларыбызның әниләре килде. Бәйрәмнең концерт өлеше авыл клубында дәвам итте. Укучылар көче белән, шулай ук клуб, китапханә, музей мөдирләре катнашында бик эчтәлекле кичә әзерләнгән иде. Килгән кунаклар балаларга туган ил кадерен, Ватан алдындагы бурыч турында бик мавыктыргач итеп сөйләделәр.

    Бүген -21 нче февраль. Һәр милләт, һәр халык өчен бәйрәм көн – Халыкара туган тел көне. Бу көн 2000 нче елда ЮНЕСКО карары нигезендә билгеләп үтелә башлады. Бүген дөнья халыклары 6 мең телдә сөйләшә. Һәркем өчен дөньядагы иң кадерлесе – беренче сөйләшә башлаган ана теле. Халыкара туган тел көнендә барлык телләр дә, тигез дип таныла, чөнки аларның һәркайсы кеше язмышы өчен җавап бирә һәм без аны сакларга тиешбез.
    Шул уңайдан мәктәбебездә туган тел кичәсе уздырылды. Бу кичәдә укучылар татарча һәм русча шигырьләр сөйләделәр. Бикчәнтәева Ч. "Туган ягым" җырын бик матур итеп башкарды. Тел турында мәкальләрне искә төшерделәр, табышмаклар чиштеләр, тирән эчтәлекле презентация карадылар, күргәзмә белән таныштылар.

    Батырлык. Бу купшы сүз түгел,
    Хәтерләрдән тиз җуела торган.
    Мәгънә - асылында, мәңгелеккә
    Күңелләргә, җанга уела торган.
    Кайсы тауның ташларыннан икән
    Батырлыкка һәйкәл куясы?
    Чорлар җиле ташларны да уя,
    Тик мәңгелек хәтер кыясы!
    Батырлык дип күпме сөйләп йөрмик,
    Күпме аны күккә күтәрмик,
    Ише бармы бөеклекнең солдат
    Кылган батырлыкка тиңләрлек?
    Нәрсә соң ул батырлык? Аның төп мәгънәсен һәркем үзенең тормышка карашыннан чыгып, үзенчә аңлый. Ә шулай да, батырлык ул, мөгаен, гадәти күзлектән караганда һич кенә дә кеше башкара алмастай эшне башкарудыр. Ул кешедән чиксез ихтыяр көче, тәвәккәллек, үз-үзеңне аямауны таләп итә.
    Хәрби-патриотик тәрбия бирү айлыгы кысаларында мәктәбебездә "Офицеры" дигән нәфис фильм күрсәтелде. Вакыйгалар 1920-1960 нчы елларда бара. Чын ирләрчә дуслык, намус, Ватанга мәхәббәт...Болар барысы да-ике дус офицер өчен буш сүзләр генә түгел. Укучыларга шушы ике дус үрнәгендә батырлык төшенчәсе аңлатылды. Егетләрнең батырлыгы, максатка нык омтылышы безгә һәрчак үрнәк булсын!..

    Бүген мәктәбебездә Арча муниципаль районы башкарма комитеты аппаратының әйдәп баручы белгече Нигъмәтуллин Нил Камбил улы укучыларыбыз белән очрашу уздырды. Әлеге очрашу барышында укучыларга интернет челтәренең уңайлы яклары һәм бигрәк тә анда яшеренеп йөргән зыяны, куркыныч мәгълүмат турында сөйләде. Әлеге информациядән саклану юлларын өйрәтте Бүгенге көндә яшүсмерләр арасында тәртип бозу очраклары турында мәгълүмат бирде. Укучылар сорауларына төгәл җаваплар алдылар.