9нчы, чыгарылыш сыйныф укучыларыбыз бүген ахыргы имтиханнарын тапшырып кайттылар. Агымдагы елны һәр укучыбыз дүрт фәннән имтихан тотты: рус теле һәм математика фәннәре мәҗбүри, сайлап алу фәннәре физика (2 укучы), информатика (3 укучы) һәм география фәннәре булды. Апрель азагында ук алар татар теленнән Бердәм Республика тестын уңышлы үткәннәр иде инде. Хәзер менә барлык имтиханнарны тапшырдылар һәм тын да алмыйча эшләр тикшерелеп билгеләр куелганны көтәбез. Яхшы билгеләр алып, мәктәпне уңышлы тәмамлавыгызны телибез кадерле чыгарылышларыбыз!..

    Әйләнә-тирә мохитне саклау, экология торышын яхшырту һәркайсыбызның көндәлек тормышта үз-үзен тотышына бәйләнгән. Җәй – урманнарда, елга һәм күлләр тирәсендә күңел ачу чоры. Яраткан урыннарыбызга килгәч, безнең күпләребез еш кына күңелсез күренешләргә тап була: ваемсыз кешеләр ташлап калдырган буш шешәләр, банкалар, пакетлар һәм башка төрле чүп-чар аунап ята. Безгә, өлкәннәргә, балаларга чүпне космостан килүчеләр түгел, ә безнең кебек үк өлкәннәр һәм балалар калдыруын аңлатырга кирәктер. Бүген без дә укучыларыбыз белән каникул әле дип тормыйча, берничә төркемгә бүленеп авыл тирәсен чүп-чардан арындырдык. Табигатьне чистарту укучыларыбызга бик ошый, алар бу эшнең үзебез өчен икәнен яхшы аңлыйлар. Мондый эшләр һәр кешенең күңелендә булып даими үткәрелеп торса, Җир-Анабыз бик рәхмәтле булыр иде!

    Җәйнең беренче көне – балачак иленең иң матур бәйрәме. Әлеге бәйрәм безгә, өлкәннәргә, һәр баланың яклауга, кайгыртуга мохтаҗ икәнен искәртеп тора. Чөнки үсеп килүче буын – ул безнең киләчәгебез, илебезнең киләчәге. Балаларыбызны мәрхәмәтле һәм кешелекле булырга өйрәтү – изге бурычыбыз. Балаларыбыз сау-сәламәт булсын, сыйфатлы белем алсын, спорт, иҗат белән шөгыльләнсен, рухи үсеш кичерсен өчен шартлар тудыру безнең төп максатыбыз...

    Әлеге матур бәйрәм көне уңаеннан Кушлавыч төп гомуми белем мәктәбе базасында төрле кызыклы чаралар оештырылды. Укучыларыбыз күп төрле спорт ярышлары, интеллектуаль бәйгеләрдә катнашып ял иттеләр, үз осталыкларын күрсәттеләр. Бәйрәм флешмоб-күмәк бию белән төгәлләнде...

    Каникуллар башланып китәргә дә санаулы көннәр калды. Әлбәттә инде ял күңелле, файдалы һәм әлбәттә куркынычсыз да булырга тиеш! Боларны истә тотып укучыларыбызны җәйге каникул чорында үз-үзеңне тоту кагыйдәләре белән таныштыру, инструктажлар үтү эшләре башланып китте. Иң беренче чаралардан "СМС-балалар" хәрәкәте яман гадәтләргә профилактика йөзеннән "Россия - без табака" дигән акция уздырдылар. Тәмәке, алкоголь бәйлелеге һәм башка начар гадәтләрнең зур зыяны турында әңгәмәләр, мультимедиа күрсәтмәләр укучыларыбыз күңелендә тиешле карашларны формалаштыруда үз ролен керткәндер дигән ышанычта калабыз...

    Арча муниципаль районы буенча "Әдәби марафон" булып узды. Әлеге үзенчәлекле чарага  каләм әһелләре Данил Салихов, Камил Кәримов, Рифат Җамал, Хәнәфи Бәдигый, Вакыйф Нуриев, Рифә Рахман, Фирдәүс Зариф, Альберт Гаделшин кайттылар. Район буенча барган әдәбият очрашуы Арча шәһәре 9 балалар бакчасында башланып Арча шәһәре буенча дәвам итте. Унберенче, икенче, бишенче балалар бакчаларында да шулай ук күңелле чаралар узды. Төшке аштан соң кунакларыбыз ике төркемгә бүленеп Наласа, Түбән-Аты, Утар-Аты, Кушлавыч мәктәпләрендә укучылар белән очраштылар...

    "Соңгы кыңгырау"... Әлеге моңсу да, шатлыклы да мизгелләрне һәркем үз күңелендә саклыйдыр мөгаен. Кайчак бик ашкынып көткән кебек тоелса да, чыгарылыш вакыты җитүгә ничектер моңсу да булып китә, сыйныфташлар белән узган мизгелләр күз алдыннан үтә... Шулай да алда яңа үрләр, әле имтиханнарны да үтәсе бар. Үзенә күрә тормышның яңа баскычына күчеш старты булып яңгырый бит "Соңгы кыңгырау" чыңнары...

Баш очыннан ак болытлар ага
Ак болытлар – безнең балачак.
Балачакка кире кайтып булмый
Алар шулай ап-ак калачак
Ак болытлар безнең балачак...

   Узган шимбәдә мәктәбебез укучылары Арча муниципаль районы күләмендә үткәрелгән спорт чараларында катнаштылар. Татар-башкорт көрәше буенча ООО "Арча" җитәкчесе Закиров А.Г. призына ярышларда катнашып 6 нчы сыйныф укучыбыз Шерматов Рәйхан 32 кг.га кадәрге авырлыкта 3 нче урын яулап бәйгенең призына лаек булды. Аңа киләсе ярышларда да уңышлар телибез!..

    19 май пионер оешмасының туган көне. Ул СССРда 1922 нче елда оеша. Пионерлар хәрәкәте ил тарихында зур бер чорны биләп тора. Ләкин безнең илдә хәзер пионер оешмасы юк инде, ә күптән түгел генә ул бик популяр иде. Олылардан пионер оешмасы турында сорасаң, аларның йөзләре яктырып китә, күзләре нурлана. Алар үзләренең пионер бала чагы турында озак һәм бик күп сөйләргә әзер: пионер җырлары, үзләренең вожатыйлары һ.б. турында. Бу тема әле хәзер дә күпләрне кызыксындыра,чөнки сәясәтләндерелгән булса да, пионер оешмасы берничә буын үз иленең лаеклы гражданнарын тәрбияләде. Чынлыкта бу нәрсә булган? Ничек булган?..

    Кичә мәктәбебезгә Казан шәһәре "Халыклар дуслык йорты" хезмәткәре, җырчы һәм төрле уен-коралларында уйнаучы оста Солтан Шигапов килде. Ул укучыларга музыка һәм музыка уен кораллары турында сөйләде. Г.Тукайның иҗатын иске төшерде һәм татар халык көйләрен, Г.Тукайның шигырьләренә язылган җырларны башкарды, төрле халык бию элементларын да күрсәтте. Музыкант Солтан ага Шигапов белән укучылар да кушылып җырладылар, биеделәр...