Яшь буынны, җәмгыятнең киләчәген тәрбияләүдә музейлар белән элемтәдә тору бик урынлы дип уйлыйм. Үзеңнең үткән тарихыңны, гореф-гадәтләреңне, күренекле шәхесләре турында бай материалны бары тик музейда күреп-белеп була. Безнең Кушлавыч авылында Тукаевлар гаиләсенең музей-йорты бар. Мәктәбебез музей белән бик тыгыз элемтәдә тора.
    Быел мәктәбебездә дә “Туган якны өйрәнү музее” дип аталган почмак булдырдык. Аны “Шушы яктан, шушы туфрактан без” дип атадык. Әлеге почмакта авылыбызның күренекле шәхесләре урын алган. Г.Тукай, Ә. Галиев авылыбыз горурлыгы. Алар турында материаллар туплый башладык.
    Шулай ук авылыбыздан чыккан, анда эшләп хезмәт куйган уңган халыкыбыз (Республиканың атказанган хезмәткәрләре) турында да мәгълүматлар туплый башладык. Киләчәктә әлеге почмак музей булып үсеп җитәр дип максат куябыз.

    Татарстанда "Китапка икенче сулыш бир" республикакүләм хәйрия акциясе уза. Акция 30 октябрьгә кадәр дәвам итәчәк. Әлеге хәйрия акциясе мәктәп китапханәләре фондын укыту-методик, фәнни-популяр, белешмә һәм матур әдәбият белән баету максатыннан үткәрелә. Акциядә мәктәп укучылары, аларның әти-әниләре катнаша ала.
Безнең мәктәп укучылары да әлеге акциядә актив катнашты. Алар эти-әниләр , укытучылар ярдәмендә тузган, ертылган, иске китапларны төзекләделәр, матур итеп яңа тышлыклар ясадылар.

    Элек күз табибына баргач, бер күзеңне томалыйсың да, ерактан стенадагы хәрефләрне танып әйтергә кушалар иде. Өстә – зур шрифтлы хәрефләр, аста текст азагындагылары бик вак язылган була. Укый алган юл саннарыннан чыгып, күзеңнең ни дәрәҗәдә күрүен билгелиләр. Бүген бу ысулдан тыш, күз авыруларын вакытында ачыкларга заманча диагностика җайланмалары ярдәм итә.

    Кеше әйберенә рөхсәтсез кагылу – начар гамәл. Моны баланың теле ачылганчы ук сеңдерә башлыйбыз, югыйсә. Тамак тук, өсте бөтен, бакча һәм мәктәп өчен кирәк-яраклары да бар. Тик нигә әйберләре арасында чит уенчыклар, ят каләмнәр очрый? Чыннан да, бүләкме ул, әллә рөхсәтсез генә алганмы?
    Бүген мәктәбебездә “Караклык-начар гадәт” исемле тәрбия сәгате үтте. Әлеге дәрестә караклык, аны булдырмый калдыру чаралары турында сөйләштек. Кече яшьтән үк кеше әйберенә тимәскә кирәклеге аңлатылды. Һәр бала караклыкның начар юлга алып кереп китүен белергә тиеш.

    Октябрь ае иң җылы һәм иң матур бәйрәмнәрнең берсе булган "Өлкәннәр көне"ннән башланып китә. Өлкәннәр!.. Олы кешеләр!.. Күпме мәгънә табып була бу сүзләрдән. Элек-электән үк олы кешеләр тормышның, яшәешнең нигезен тәшкил иткәннәр: намуслы балалар үстерү, аларның бәхете өчен көрәшү, туган илне дошманнардан азат итү. Киләчәгебез якты һәм тыныч булсын өчен, табыннарыбыз мул, көннәребез уң булсын өчен башкарган барлык эшләр дә алар кулы аша үткән.
    Мәктәбебездә бу уңайдан матур кичә оештырылды. Авылыбыз клубына әби-бабайлар җыелды. Өлкәннәрне мул итеп әзерләнгән табын каршы алды. Алар өчен концерт программасы әзерләнгән иде. Мәктәп укучылары әби-бабайларын җырлап, сәнгатьле итеп шигырьләр сөйләп шатландырдылар.

    Россиядә телевидениене «цифрлаштыру» бара. 14 октябрь көнне илнең 21 регионында, шул исәптән Татарстанда да федераль телеканалларның аналоглы вариантын күрсәтү туктатылачак. Ләкин куркырга кирәкми. Цифрлы телевидениегә күчү, телевизорны әлеге дулкынга көйләү артык катлаулы түгел. Цифрлы телевидение сигналның югары сыйфатлы булуы белән аерылып тора. Спутник тәлинкәсе кулланучы яки кабельле телевидение караучыларга бу яңалык бөтенләй дә кагылмый. Сигналларны аналог ысулы белән кабул итүчеләр исә яраткан каналларын югалтмас өчен чарасын күрергә тиеш булалар.
    Бүгенге тәрбия сәгатендә без дә, укучылар белән, кеше тормышында телевизорның тоткан урыны, телевизор төрләре, цифрлы телевидение, аңа ничек күчәргә икәнлеге турында сөйләштек, фикер алыштык.

    Һәрберебезгә мәгълүм булганча безне алда олы бәйрәм көтә. 1991 елдан бирле 5 октябрь укытучылар көне дип игълан ителде. Укытучы – дөньяны танып – белергә омтылучы, балаларның керсез пакь күңелләренә гыйлем орлыклары чәчүче һәм аларның тигез матур шытымнар бирүен сабыр гына көтүче Остаз, газизләрдән – газиз әниләр белән берүк дәрәҗәгә куярлык изге зат. Шулай ук балаларның нечкә саф күңеленә саклык белән генә кагылучы, аларга хаклык энҗеләрен тезүче оста киңәшче психолог та, уку барышында юл күрсәтүче маяк ул!
    Әлеге бәйрәм һәр мәктәптә дә зурлап үткәрелә. Безнең мәктәп тә бу чарага алдан ук әзерләнә башлады. Бүген ”Классные встречи” акциясе кысаларында укытучылар белән укучылар арасында түгәрәк өстәл янында җанлы әңгәмә узды.Балалар укытучыларга үзләрен кызыксындырган сорауларын бирделәр.Укытучыларыбыз Әюпова Рания Фирдүс кызы, Мингазов Алмаз Әнәс улы, Бикчәнтәев Рәдис Әсфәндияр улы балаларга тулы җаваплар бирделәр.

    Бүген Кушлавыч авыл китапханәсендә “Бердәм мәдәният дәрес”е узды. Бу дәрестә мәктәбебез укучылары да катнашты. Китапханәче Р.Фәттахова мәдәният, Арча районыннан чыккан күренекле шәхесләр, аларның әсәрләре, туган якның гүзәллеге, байлыгы турында мәгълүмат бирде. Әлеге дәрестә башлангыч сыйныф укучыларына “Укучының мәдәни көндәлеге” дә бүләк ителде.
    “Укучының мәдәни көндәлеге”нең максаты-үсеп килүче яшь буынны Татарстан Республикасының мәдәни мирасы белән таныштыру. Укучыларга никадәр күбрәк мәдәни чарада катнашса, тарихи-истәлекле урыннарга йөрсә, көндәлеген никадәр пөхтә алып барса-аның уку елы дәвамында республика күләмендә үткәрелә торган мәдәни конкурста җиңү ихтималы күбрәк булуы турында аңлатылды.

    30 сентябрь Рәссәйдә интернет көне. Интернет бик күпләребезнең тормышына үтеп керде, бик күп мәшәкатьләребезне җиңеләйтте, кайвакыт аннан башка дөньяны күз алдына да китереп булмый.
    Бүген сыйныф сәгатендә укучылар белән интернетның тарихын, интернеттан кирәкле мәгълүматны ничек табарга, компьютерга интернеттан ничек вируслар кертмәү турында сөйләштек. Укучылар өчен интернет-викторина үткәрелде. Компьютерда утырганда сәламәтлекне дә онытмаска кирәклеге искәртелде.

    Синдәдер ул йөрәкләрнең иң олысы,
    Синдәдер ул кулларның иң җылысы,
    Һәр көн сиңа ничә сабый карап тора,
    Алар сине әниседәй якын
    Еласалар - син аларны юатасың,
    Боексалар - син аларны уйнатасың,
    Сөйләшәсең күңелләрен аңлап кына,
    Орышасың кайчагында җайлап кына.
    Бүген Россиядә Тәрбиячеләр һәм мәктәпкәчә белем бирү оешмалары хезмәткәрләре көне билгеләп үтелә. Ул 2004 елдан бирле үткәрелеп килә. Бәйрәмнең төп максаты - җәмгыятьнең игътибарын балалар бакчасы тормышына юнәлтү...