Җиһанга Яз килде. Яз ул - җанында сөю гөлләре үстергән, назлы, иркә сүзләр йөрткән асыл хатын-кызлар бәйрәменнән башлана.

        Хатын-кыз - ул газиз әнкәй дә, апа-сеңел, якын дус та, бик кадерле гүзәл зат та ... Сабыр һәм батыр йөрәкле, милләте, дине, газиз баласы өчен җанын да кызганмаучы изге зат ул - хатын-кыз.  

          М әктәбебез егетләре бүген кызларыбызны, укытучы, хезмәткәрләрне котлап, бәйрәм оештырдылар. Чараны алып баручы егетләр - 10 нчы класс укучылары Лотфуллин Самат, Вәлиәхмәтов Фәрит. 5-11 нче класстан берәр кыз төрле уеннар аркылы үз осталыкларын күрсәтте. Финалда 9 нчы класс укучысы Фәсхетдинова Әнисә җиңүче булды. 

     " Көннең яктылыгы-кояшта,

      Күкнең матурлыгы-йолдызларда,

      Җирнең гүзәллеге-безнең мәктәпнең кызларында",- дигән шигырь юллары белән тәмамланды бәйрәм кичәсе.

   Башлангыч класслар методик берләшмәсенең  планы буенча бүген ата-аналар каршында Җиңүнең 70 еллыгы уңаеннан “Җиңү  килде, җирне нурга күмеп ”исемле әдәби –музыкаль кичә куелды. Укучылар маршировка ясадылар, “Журавли” музыкасына музыкаль композиция күрсәттеләр, 3 нче класс укучысы Нәбиуллина Әдилә бабасына багышлап төзегән проект эше  белән уңышлы чыгыш ясады. Укучылар бу чарадан хәрби һөнәрләр турында башлангыч белемнәр дә алдылар.

    Физкультура укытучысы Җәләлиев И.И. балаларга өйрәткән күнекмәләр  бәйрәм барышында  уңышлы тормышка ашырылды. Арча сәнгать мәктәбе филиалы укытучылары Чулпан һәм Рәдис Харисовлар, мәктәпнең музыка укытучысы  Хәбибуллин Р.Р. укучыларның музыкаль сәләтләрен үстерүгә үзләреннән зур өлеш керттеләр.

   Мәктәп коллективы ата-аналар белән тыгыз элемтәдә тора.  Балаларны әлеге бәйрәмгә хәзерләп, алар да үз алларында торган бурычларны үтәделәр, класс җитәкчеләренә зур рәхмәтләрен җиткерделәр.

    Мәктәптә укучыларыбызга профессиональ белем бирү буенча айлык башланып китте. Айлык кысаларында төрле чаралар тормышка ашырыла. Башкарган хезмәте аркылы танылган кешеләр белән очрашулар, уку йортларында ачык ишекләр көнендә булу укучыларда сайлаган һөнәр буенча кызыксынуларны тагын да арттыра, җаваплылык хисе тәрбияли. Бүген 9-11 нче класс укучылары класс җитәкчеләре Мәннанова Л.Р., Фазылҗанова Н.М. белән район мәгариф бүлеге аркылы оештырылган Казан аграр университеты һәм Казан ветеринария академиясеннән килгән белгечләр белән очрашуда булдылар. Бүген - укучы, күпмедер вакыттан соң югары уку йорты студенты булырга әзер торган укучыларыбыз, яшьтәшләре белән ирекле аралашу вакытында, үзләрен борчыган сорауларга җавап та таптылар. Мондый очрашуларны оештыручыларга зур рәхмәтебезне җиткерәбез. 

2  нче март  көнне Түбән Мәтәскә урта  мәктәбе профсоюз оешмасы һәм администрациясе арасындагы килешүнең үтәлеше буенча профсоюз җыелышы булып  узды. Җыелышта Иске Кырлай төп гомуми белем  мәктәбенең башлангыч  профсоюз оешмасы җитәкчесе  Фазлиева И.В. катнашты. Коллектив договорның  үтәлеше турында  мәктәп директоры Сагдеев Т.И. һәм профсоюз рәисе  Маннанова Л.Р. чыгышлары тыңланды.

Мәктәптә укучыларны  фәнни-тикшеренү эшләренә тарту буенча аерым комиссия эшли , алдынгы педагогик тәҗрибә таратыла. Укучылар берничә ел рәттән КНИТУ тарафыннан оештырылган "Вперед в прошлое", “Нобелевские надежды” иҗади эшләр конкурсында катнашалар.

Бу уку елында да11 нче сыйныф укучысы Вәлиева Чулпан (җитәкчесе- Муллагалиева Г.Н.), 9 нчы сыйныф укучылары  Рәхимҗанова Рәзилә (җитәкчесе - Маннанова Л.Р.), Шиһабиева Энҗе (җитәкчесе - Гаффарова Д.В.),  8 нче сыйныф укучылары Гаффарова Әнисә, Лутфуллина Сиринә (җитәкчеләре - Гаффарова Д.В.) "Вперед в прошлое” конкурсының  финал этабында катнаштылар.

    8 нче Март бәйрәме алдыннан традициягә кергән чаралар үтә. Башлангыч сыйныф укучылары укытучылар,  әти-әниләр белән берлектә гаилә бәйрәме үткәрүне планлаштыралар. Методик берләшмә җитәкчесе Хәйретдинова Венера Рөстәмовнаның укучылар белән  оештырган кул эшләре күргәзмәсенә берәү дә битараф кала алмады.

     5-11 нче классның егетләре бәйрәм уңаеннан  концерт куярга хәзерләнәләр. Бу көнне кызларыбыз тапкырлыкта, өлгерлектә көч сынашачак.

10 нчы класс укучылары Лотфуллин Самат һәм Вәлиәхмәтов Фәрит мәктәптә   өстәл теннисы буенча ярышта җиңүче  булдылар. Физкультура укытучысы Җәләлиев И.И. җитәкчелегендә бу укучылар район буенча  көч сынашырга киттеләр.

Укытучы Фазылҗанов Г.Г. "Патриотик тәрбия" айлыгында укучылар белән төрле чаралар үткәрде. Бүген 8 нче класс укучылары Аҗаган уенында катнаштылар. Айлык буенча нәтиҗәләр һәр атнаның оештыру линейкасында хәбәр ителә.