Мәктәптә барлык классларда да һәр фәннән арадаш аттестация эшләре башланды. Укучыларга уңышлар телибез.

        "Язның бер көне ел туйдыра"-ди халык мәкале. Шушы мәкальгә тугры калып, мәктәп яны тәҗрибә участогында язгы эшләр башланды. Җирне көзге чүп-чардан чистарту, ашлау, казу, тырмалау эшләре  бара.

            Май ае ул яшелчә рассадаларын бакчага чыгарып утырту гына түгел,  бүлмәдәге гөлләрне дә күчереп утырту вакыты. Бина эчендәге яшелләр «армиясе» дә, яз җиткәч, тизрәк «яшәү урынын» алыштырырга хыяллана. Шушы максаттан биология укытучысы Гайнетдинова Д.Х. 8 сыйныф укучылары белән, гөлләр утырту өчен, туфрак алып кайттылар.

          Бүген иртәдән ук көн ямьле: кояш чыкты, җил тынды. Җиңү көне дә булгач, үзеннән-үзе күңел җилкенсенә. Сугыш афәте Олы Яке төбәген дә читләтеп узмый. Бөек Ватан сугышыннан 247 авылдашыбыз кире әйләнеп кайта алмый. Алар бүгенге матур тормыш барәбәренә чит җирләрдә башларын салганнар.

          Без һәр ел саен, сугыш батырларын искә алу өчен, авылыбыз уртасында урнашкан обелиск янына җыелабыз. Мәктәбебез укучылары, Россия күләмендә узучы "Үлемсез полк" акциясенә кушылып, бабайларының портретларын күтәреп авыл урамы аша уздылар. Һәйкәл янында митинг уздырылды. Биредә мәктәп коллективы, авыл халкы һәм тыл батырлары катнашты. Обелискка веноклар салдылар, батырларны 1 минут тынлык белән искә алдылар. Укучылар бәйрәмдә катнашучыларга әдәби-музыкаль монтаж тәкъдим иттеләр, авыл халкына үзләренең котлауларын җиткерделәр.  

           Хәзерге буын яшьләре, балалар сугыш китергән авырлыкларны кинолардан карап кына белә, язучыларыбызның әсәрләрендә дә сугыш темасы тирәнтен яктыртылган. Утлы көннәрнең кайтавазы күңелләрдә саклансын өчен, бүген Бөек Җиңүнең 73 еллыгы уңаеннан мәктәп диварына “Без Җиңү көнен ясыйбыз” дип аталган рәсемнәр күргәзмәсе куелды. Күргәзмәне Миндубаева Р.Х. оештырды.

             Бөек Җиңүнең 73 еллыгын каршылауга әзерлек уңаеннан мәктәбебездә бүген  хәрби-патриотик җырлар фестивале үтте. Укучылар Бөек Ватан сугышы һәм сугыштан соңгы елларда популяр булган  җырларны башкардылар. Аларның чыгышы презентацияләр белән үрелеп барды. Бәйрәм азагында "Җиңү көне!" җыры яңгырады.  Чараны Назырова Э.А., Зиннатуллина И.Р. әзерләде.

              Мәктәбебездә 23 нче апрельдән 28 нче апрельгә кадәр бөек шагыйрь Г.Тукайның тууына 132 ел тулу уңаеннан туган тел атналыгы булды. Атнлык зур җанлылык белəн узды.  1-9 нчы сыйныф укучылары барлык чараларда теләп катнаштылар. Атналыкның планында билгеләнгән барлык эшләр дә төгәл үтәлде. Бүген туган тел атналыгына нәтиҗә ясалды, актив катнашкан укучылар төрле номинацияләрдә грамоталар белән бүләкләнде.

        Мәктәбебездә “Үлемсез полк” (“Бессмертный полк”) акциясенә әзерлек эшләре бара. Узган уку елында әлеге акциядә укучыларыбызның барысы да катнашты. Быел исә аларга 1 нче сыйныфка килгән 5 бала кушылачак. Сугышның эчендә кайнап, яу кырында ятып алган кайбер авылдашларыбызның гаилә архивында фотолары да юк. Бу очракта укучыларыбыз әлеге акциядә, әбиләре - тыл ветераннарының фотолары белән катнашалар.

           Бу көннәрдә мәктәбебез тирәсе кырмыска оясын хәтерләтә: бар да хәрәкәттә, һәркем чистарту эше белән мәшгуль. Бүген дә экологик икеайлык кысаларында укучылар һәм укытучылар, мәктәп хезмәткәрләре Антуан Экзюпериның «Иртән торып юын, үзеңне тәртипкә китер дә үз планетаңда тәртип урнаштыр» дигән сүзләренә нигезләнеп, өмәгә чыкты. Алар мәктәп яны участогын һәм билгеләнгән территорияне тәртипкә китерделәр. Ел саен уздырыла торган бу чара быел да оешкан төстә узды. Тырыш хезмәтнең нәтиҗәсен күрү һәркем өчен дә күңелле шул.