Яңгыра, көмеш кыңгырау,

                    Безне каршыла, -

                    Кушыл әйдә һәм куәт бир

                    Белем маршына!

      Кадерле укучылар һәм укытучылар! Хөрмәтле сайт кунаклары!

      Сезне чын күңелдән  Белем көне  һәм яңа уку елы башлануы белән котлыйм. Яңа уку елы яңа казанышлар, иҗади ачышлар алып килсен. Барыгызга да ныклы сәламәтлек, иминлек, бәхет телим.

         Август – белем бирү хезмәткәрләре өчен үзенчәлекле ай. Ул яңа уку елы башлану, белем бирү системасының агымдагы торышы анализлану, проблемалар күтәрелү, яңа уку елына бурычлар билгеләнү белән кабул ителә. Мәктәбебез укытучылары бүген уздырылган  педагогик киңәшмәдә узган уку елына нәтиҗәләр ясадылар, алга бурычлар куйдылар.

               Яңа уку елы башланырга санаулы көннәр калып бара. Махсус комиссия район мәктәпләренең яңа уку елына әзерлеген тикшереп, яхшы бәя куйды.

           Җәйдән дә матуррак вакыт бар микән! Бөтен җир яшеллеккә күмелгән, төрле төстәге чәчәкләр күзне иркәли, аларның хуш исләреннән башлар әйләнә. Кояш җиргә туры карый, нурларын кызганмый сибә. Елгалардагы су яңа сауган сөт кебек җылы, һава саф һәм чиста. Нәкъ менә шушы матур вакытта мәктәпләрдә уку елы тәмамлана. Чыгарылыш класслар имтиханнар бирергә керешсәләр, башкаларның җәйге каникуллары башланды. Балалар җәйге ялларын хәвеф-хәтәрсез, истә калырлык күнелле мизгелләрдә үткәрүен теләп калабыз. Балалар безнең киләчәгебез икәнен онытмыйк!

          Сабантуй бәйрәме - татар халкының иң олы бәйрәмнәренең берсе. Ул -хезмәт һәм дуслык бәйрәме. Сабан туе - ул һәркемнең көтеп алган изге бәйрәме. 

          Традиция буенча, безнең мәктәптә дә бу бәйрәм үтте. Башка еллардан аермалы буларак,  балалар мәктәптән ерак булмаган болынга бардылар. Милли бәйрәмдә нинди чаралар үткәрелә, программага барысы да кертелгән иде. Чүлмәк тә ваттылар, капчык киеп тә йөгерделәр, башка уен һәм ярышларда да катнаштылар балалар. Ә аннары үзләре алып килгән сый-нигъмәтләр белән сыйландылар. Укуның соңгы көнендә балалар рәхәтләнеп ял иттеләр. Шулай ук сабантуй бәйрәменә әзерлек һәм үткәрү тәртибен үз күзләре белән күреп, аны оештырып йөрделәр. Бу инде аларның хәтерләрендә озак сакланачак.

         Олы Яке мәктәбенең 4 нче сыйныф укучылары бер баскычны узып, башлангыч мәктәп, беренче укытучы белән саубуллаштылар. Мәктәптә, зурлап, шигырь, җыр-биюләрне, күңелле мизгел-хатирәләрне үз эченә алган чыгарылыш бәйрәме узды. 4 нче сыйныфның 6 укучысы башлангыч мәктәп һәм беренче укытучы белән саубуллашты. Гомерен яшь буынга белем һәм тәрбия бирүгә багышлаган, тырыш, тынгысыз җанлы, таләпчән, олы йөрәкле мөгаллимә – сыйныф житәкчеләре Рәзинә Хәмитовнага барлык әти-әниләр, укучылар чиксез рәхмәтләрен, олы хөрмәтләрен белдерде. Бу чыгарылыш кичәсе куңелле дә моңсу да истәлекле дә булып күңелләргә кереп калды.

         Бүген 9 нчы сыйныф укучылары туган телдән төп дәүләт имтиханы бирәләр. Мәктәбебезнең 5 чыгарылыш сыйныф укучысы әлеге фәннән белемнәрен тикшерәләр.

Җырлап торган моңлы кыңгырау ул-

Киләчәкнең кайнар сәламе,

Ак хыяллар сынмас канат булсын,

Бәхет язсын тормыш каләме.

            Кояшлы, җылы 25 май иртәсе. Ишетәсезме, соңгы кыңгырау чыңын? Ул 9 нчы сыйныф укучыларын 9 ел буена озата килде. Беренче Белем көне дә аларның хәтерләрендә нык саклана әле. Балачакның иң кадерле, якты һәм мөкатдәс бәйрәме – тәүге кат мәктәп бусагасын атлап кергән һәм соңгы кыңгырау авазы астында соңгы дәрескә керү көнедер.

            Олы Яке мәктәбен быел ундүрт 9 нчы сыйныф укучысы тәмамлый. Олы тормышка аяк баскан бу тантанада һәркем укучыларыга матур теләкләрен җиткерде.  

          Яшел Үзән шәһәре ЗАГСының 100 еллыгы уңаеннан мәктәп укучылары арасында “Минем гаиләм” темасына игълан ителгән рәсемнәр конкурсында катнашкан өчен, грамоталар белән бүләкләнде. Җитәкче  Зарипова Р.Ә.

         Бөек Җиңүнең 73 еллыгы уңаеннан “Зеленый Дол” газетасы “Ветеранга чәчәк бәйләме” бәйгесе уздырган иде. Аның нәтиҗәләре билгеле булды: мәктәбебез укучылары   грамоталар белән бүләкләнде. Укучыларны Яруллина А.А. әзерләде.