Бүген, 23 нче ноябрь көнне, башлангыч сыйныфларда ачык дәресләр узды. 1, 3, 4 нче сыйныфларда, төрле фәннәрдән, укытучылар дәрес бирү осталыкларын күрсәттеләр.
1 нче Б сыйныфы укытучысы, Азалия Рависовна, әдәби уку дәресендә “Л авазы һәм хәрефләре” турында сөйләде. 1 нче В сыйныфы укытучысы Тамара Иркеновна, әйләнә-тирә дөнья дәресе үткәрде. Ә 3 нче сыйныфларда Гөлчәчәк Фазыловна класстан тыш чара эшләгән иде. Ул “Көнчелек” темасын яктыртты. 4 нче сыйныфларда Ольга Федоровна, әдәби уку дәресендә, В.М. Гаршинның “Сказка о жабе и розе” әсәрен төрле алымнар кулланып өйрәтте.
Әлеге дәресләр барысыда бик яхшы әзерләнгән иде. Укытучылар төрле-төрле эш алымнары, төрле методикалар кулландылар, дәресне кызыклы итү өчен төрле чаралар белән эшләделәр.
Дәресләр укытучыларга да, укучыларга да бик ошады. Алар методистлар тарафыннан югары бәя алды. 

Бүген, 21 нче ноябрь көнне, 10 нчы сыйныф укучылары “Без бергә!” исемле укучылар үзидарәсе форумында булып кайтты. Әлеге чара укучыларны берләштерү, аларда лидерлык сыйфатлары булдыру, активлаштыру һәм үзидарә эшчәнлегендә булган кайбер проблемалы хәлләрне чишәргә ярдәм итү өчен оештырылган иде.
Форум үзең белән таныштыру өлеше һәм секция өлешләреннән торды. Һәр мәктәптән укучылар үзләре белән таныштыруга үзенчә якын килгән иде. Без исә бию аша үзидарәнең бербөтен механизм булуын күрсәтергә тырыштык. Укучылар бик теләп “Мин – лидер”, “Массакүләм мәгълүмат чаралары яклы яки аңа каршы”, “Командага берләшү”, “Иҗадилык” кебек секцияләрдә актив катнаштылар. Чара резолюция кабул итү һәм флешмоб белән тәмамланды.
Форум укучыларга яхшы кәеф, яңа белемнәр, күнекмәләр һәм бик озакка җитәрлек кичерешләр бүләк итте. 

Бүген, 20 нче ноябрь көнне, гимназиядә сулы объектларда куркынычсызлык булдыру айлыгы тәмамланды. Ул 21 нче октябрьдән 20 нче ноябрьгә кадәр дәвам итте. Сыйныф сәгатьләрендә укытучылар профилактик аңлату эшләре алып барды. Ата-аналар җыелышларында балалар артыннан тикшерүне көчәйтү турында лекцияләр сөйләнде.
Әлеге айлык кысыларында, 31 нче октябрьдән 20 нче ноябрьгә кадәр, 1-4 нче сыйныфлар арасында “Боз өстендә сак бул!” исемле рәсем бәйгесе оештырылган иде. Бүген әлеге бәйгегә түбәндәгечә йомгак ясалды:
1 нче урынга 1 нче сыйныф укучысы Шихалиев С. лаек булды.
2 нче урынга 1 нче сыйныф укучысы Сибгатуллин И. лаек дип табылды.
3 нче урын 4 нче сыйныф укучысы Идиятуллин Р. га бирелде.

17 нче ноябрь көнне, 8 нче сыйныф укучылары, укытучылары Эльмира Рөстәмовна җитәкчелегендә, Кол Шәриф мәчетендәге Ислам мәдәнияте музеенда экскурсиядә булып кайттылар. Укучылар сүзләренә караганда, аларны Идел буенда татар халкы арасында дин таралу тарихын чагылдырган экспонатлар шактый тәэсирләндергән. Ә өч телдә укып була торган электрон Корьән укучыларны гаҗәпкә калдырган.
Мондый сәяхәт укучыларга белем генә өстәп калмый, ә рухи яктан да баета. Халкыбыз тарихына, дингә хөрмәт хисләре уята. Әлеге кызыклы, мәгълүмати сәяхәт укучылар күңелендә мәңгегә сакланыр дигән теләктә калабыз. 

Бүген, 17 нче ноябрь көнне, 3 нче сыйныфларда ачык дәресләр узды. Сыйныф җитәкчесе Гөлчәчәк Фазыйловна кызыклы, нәтиҗәле туган тел һәм әйләнә-тирә дөнья дәресләре күрсәтте. Туган тел дәресендә укучылар исемнәрнең берлек һәм күплек саннары турында өйрәнделәр. Ә әйләнә-тирә дөнья дәресендә хайваннарның үсеше һәм үрчүе турында белделәр. Укучылар төркемнәрдә эшләделәр, уеннар уйнадылар, үзләрен тәрҗемәче, чын зоолог итеп хис иттеләр. Дәресләр укучыларга да, дәресне карарга кергән методистларга, укытучыларга да бик ошады һәм югары бәяләнде.

Бүген, 16 нчы ноябрь көнне, гимназиядә бик матур чара узды. Г. Ибраһимов исемендәге тел, әдәбият һәм сәнгать институты директоры, филология фәннәре докторы, профессор, ТР Фәннәр академиясенең мөхбир әгъзасы Миңнуллин Ким Мөгаллим улы, институтның фәнни хезмәткәре, филология фәннәре докторы, Казан федераль университеты профессоры, әдәбият галиме, тәнкыйтьче һәм педагог Закирҗанов Әлфәт Мәгъсүмҗан улы, лексикография бүлегең өлкән фәнни хезмәткәре, филология фәннәре кандидаты Сәфәров Ринат Таһир улы безгә очрашуга килгәннәр иде. Әдәби кунакханәнең исемен, Хәсән Туфанның сүзләре белән, “Талантлы син, кеше туганым” дип атадык. Әлеге чарада укучылар галимнәргә үзләрен кызыксындырган сораулар бирделәр. Тел, әдәбият өлкәсенә караган кызыклы сорауларга җавапны күренекле галимнәр белән бергәләп эзләү укучыларның да, укытучыларның да һәм килгән кунакларның да күңелләренә хуш килде. Мондый чаралар соңгысы булмас дигән теләктә калабыз. 

Ноябрьнең бу атнасы башлангыч сыйныфлар атналыгы дип игълан ителде. Укытучылар башлангыч сыйныфта кызыклы чаралар, ачык дәресләр үткәрделәр.
Бүген шундый ачык дәресләрнең берсен 2 нче сыйныфта карадык. Укытучылары Анжелика Евгеньевна әйләнә-тирә дөнья дәресендә “Бүлмә үсемлекләре” темасына бик эчтәлекле, кызыклы дәрес күрсәтте. Дәрес үз эченә рәсем, технология, информатика дәресләрен берләштергән (интегрированный) иде. Анда кызыклы биремнәр, төркемнәрдә эшләү, парлап эшләү, табышмаклар чишү, микроскоп белән мамыкны тикшерү һ.б. шундый алымнар кулланылды. Дәресне карарга укытучылар һәм әти-әниләр килгән иде. Ачык дәрес бик уңышлы үтте һәм методистлар, укытучылар тарафыннан югары бәяләнде. 

Бүген, 15 нче ноябрь көнне, гимназиядә тырышып хезмәт куючы укытучыларга мактулы грамоталар тапшырылды. Тормышын мәктәпкә, укучыларга багышлаган, бөтен күңелен биреп укучыларны тәрбияләгән, актив укытучыларны, гимназия директоры, Гөлфия Гаязовна тәбрикләде. Әлеге укытучылар арасында башлангыч сыйныф укытучылары Анжелика Евгеньевна, Эльвира Дамировна, куркынычсызлык нигезләре фәне укытучысы Ринат Хәмзович, рус теле һәм әдәбияты укытучысы Ольга Владимировна, тәрбия эшләре буенча директор урынбасары Айгөл Эрнстовна да бар иде.
Хөрмәтле укытучылар! Алдагы тормышыгызда иҗади һәм фәнни уңышлар, гаилә бәхете, эшегездә яңа үрләр яулавыгызны теләп калабыз!

Бүген, 13 нче ноябрь көнне, гимназиянең 100 еллык юбилей кичәсендә актив катнашкан укучыларга рәхмәт хатлары тапшырылды.
Концертта берсеннән-берсе матур җырлар, биюләр башкарган, ике-өч, хәтта дүрт номерда катнашкан актив укучылар бүген макту кәгазьләренә ия булдылар. Сезнең мәктәп тормышында актив катнашуыгыз безгә яңа үрләр яуларга ярдәм итә. Уңышлы белем алу белән беррәттән иҗат белән шөгыльләнүегез, сезнең актив, тырыш, заман белән бергә атлаучы укучылар икәнлегегезне исбатлый.
Алга таба да шундый ук актив, тәрбияле, тырыш булып калыгыз! Сезгә укуыгызда уңышлар телибез!