Бүген, 30 нчы ноябрь көнне, мөмкинлекләре чикләнгән кешеләргә багышланган декада кысаларында, 2 нче сыйныф укучылары театральләштерелгән сценкалар күрсәтте. Беренчесе - татар халкының барыбызга да таныш булган “Өч кыз” әкияте иде. Икенчесен башлангыч сыйныф укытучысы Фәридә Фәимовна үзе язган һәм аны “Без казан егетләре” дип атаган иде. Әлеге оригиналь чыгышлар һәр тамашачының күңеленә хуш килде. Һәр укучы үз роленә кереп, күңелен биреп уйнады. Әлеге матур чыгышлар бер тамашачыны да битараф калдырмады. 

Бүген, 30 нчы ноябрь көнне, 1 нче сыйныфлар көзне озату бәйрәме оештырдылар. Нәни укучылар көз турында, ул алып килгән нигъмәтләр турында шигырьләр сөйләделәр, җырлар җырладылар, табышмакларга җавап эзләделәр. “Көзге уңыш” турында үзләре ясаган матур рәсемнәр белән таныштырдылар. Гмназиянең иң кечкенә укучылары булсалар да, зурлардан да уздырып күңелле концерт куйдылар. Афәрин, укучылар! “Алтын көз” бәйрәме бик матур, кызыклы үтте. Укучыларның да, укытучыларның да әлеге чара күңелләренә хуш килде. Нәни укучыларга иҗади уңышлар теләп калабыз!

Коррупциягә тискәре караш тәрбияләү максатыннан, гимназия китапханәсендә “Намуслы булып яшәргә кирәк!” темасына күргәзмә оештырылды. Кече яшьтән үк без балаларны намуслы, кешелекле, гадел булырга ялганламаска, көчсезләрне рәнҗетмәскә, өлкәннәрне хөрмәт итәргә өйрәтәбез. Киләчәктә әлеге сыйфатлар балаларга илнең тәртипле гражданины булырга ярдәм итәчәкләр. Тәрбия процессында китаплар иң төп урынны алып торалар. Матур әдәбият укып үскән бала киләчәктә үзендә дә шул яхшы сыйфатларны булдырырга тырыша. 

Бүген, 30 нчы ноябрь көнне, 10 нчы сыйныфта, ришвәткә каршы көрәш көненә багышланган, класстан тыш чара узды. Укучылар 3 төркемгә бүленеп, үзара ярыштылар. Ришвәт темасына караган күнегүләр, биремнәр эшләделәр, ребус чиштеләр, сорауларга җавап бирделәр. Шулай ук, биремнәр арасында коррупция эшчәнлеге белән бәйле ситуацияләрне барлау һәм аның һәр төренә тиешле җәзасын билгеләү кебек биремнәр дә бар иде. Ә укучылар өчен иң кызыгы ришвәткә каршы реклама постеры ясау булды.
Укучыларга әлеге чара бик ошады, чөнки ул бик файдалы, мәгълүмати булды. Биремнәрдә очраган төрле ситуацияләр тормышта да очрарга мөмкин иде. Шуңа күрә, әлеге биремнәрне укучылар бик кызыксынып башкардылар. Чара ахрында һәр укучы ришвәтнең начар әйбер булуын аңлады һәм әлеге мәкерле чиргә “Юк!” дип әйтергә кирәк дигән нәтиҗәгә килде. 

Бүген, 29 нчы ноябрь көнне, әдәби кунакханәдә балалар язучысы, Ш. Маннур һәм А. Алиш премияләре иясе, Рафис Корбан кунак булды. Гимназия укучылары Р. Корбанның шигырьләрен сөйләделәр, әсәрләрен сәхнәләштерделәр. Тамашачыларга “Патша кызы һәм җырчы”, “Бәрәнне кем урлаган?”, “Керпе малае дуслар эзли” спектакьләреннән өзекләр аеруча ошады.
Әлеге номерлардан соң язучы үзе белән таныштырды, шигырьләрен укыды, яңа чыккан китапларын мәктәп китапханәсенә бүләк итте. Ә табышмакларга дөрес җавап бирүчеләргә, Рафис Корбан автограф куеп китаплар бүләк итте. Кичә укытучыларга да, укучыларга да бик ошады.
Әдәби кунакханә эшчәнлеге дәвам итә. Киләсе кичәнең кунагы кем икәнен белергә теләсәгез, яңалыкларны күзәтеп барыгыз. 

Гимназиядә башлангыч сыйныфлар айлыгы кысаларында оешырылган чаралар дәвам итә. 24 нче ноябрь көнне, 2 нче сыйныфларда , “Бездә гайрәт, бездә көч! “ исемле спорт бәйгесе узды. Әлеге чара гаиләне берләштерү максатыннан оештырылган иде. Әти-әниләр балалар белән бергәләп физик күнегүләр ясадылар, гаилә темасына әңгәмә кордылар, төрле ярышларда катнаштылар. Чара әти-әниләрне балалар белән тагын да якынайтты, алар үзләренең зурлар икәнлекләрен беразга гына булса да онытып тордылар. Әлеге чара укытучыларны да, әти-әниләрне дә, балаларны да битараф калдырмады.
Мондый чаралар күбрәк булсып, әти-әниләр мәктәп тормышында актив катнашырлар дигән теләктә калыбыз. 

Гимназиядә Әниләр көне уңаеннан “Әни турында иң матур рәсем” бәйгесе игълан ителде. Укучылар берсеннән-берсе матур рәемнәр ясап алып килделәр. Барлык рәсемнәр дә искиткеч матур, һәрбер укучы әлеге темага үзенчә якын килгән иде. Әлеге рәсемнәр арасыннан иң матурларын күргәзмәгә куйдык. Бүген әлеге бәйгегә нәтиҗәләр ясалды:
“Иң матур әни рәсеме” номинациясе 2 нче сыйныфтан Юнысова А.га;
“Иң оригиналь идеяләр” номинациясе 5 нче сыйныфтан Шәймәрдәнов К.га һәм 3 нче сыйныфтан Сәлимова З.га;
“Иң нәфис эш” номинациясе 3 нче сыйныфтан Загрутдинов Д. һәм 5 нче сыйныфтан Бикчәнтәева Д.га;
“Иң эчтәлекле эш” номинациясе 2 нче сыйныфтан Шәрипова З.га бирелде.
Шундый матур, “җылы” бәйрәмнәрнең берсе, Әниләр бәйрәмен бизәгәннәре өчен, барлык катнашкан укучыларга рәхмәт белдерәбез! 

27 нче ноябрь көнне гимназиядә «Табигать язмышы – безнеӊ язмыш» исемле экологик кичә үтеп китте. Бу чара бик кызыклы һәм үзенчәлекле булды, чөнки аны укытучылар түгел, ә 4 нче сыйныф укучылары үзләре алып барды.
Әлеге театральләштерелгән кызыклы чара 4 нче сыйныф укучыларына бик ошады. Әлеге дәрестә һәр укучы үзен оештыручы, мөһим кеше итеп хис итте. Һәр укучы табигать, аны саклау турында үз фикерен җиткерде. 

Гимназиядә “Талантлы син, кеше туганым” исемле әдәби кунакханә эшчәнлеге тулы көченә эшләп килә. Үткән чарага без Г. Ибраһимов исемендәге тел, әдәбият һәм сәнгать институты хезмәткәрләрен чакырган идек. Ә бу юлы балаларга якынрак булан шәхесне, балалар шагыйре, Ш. Маннур һәм А. Алиш исемендәге бүләкләр иясе Рафис Корбанны чакырдык. Әлеге чара уңаеннан, сыйныфларда, Р. Корбанның шигырьләрен матур башкару бәйгесе игълан ителде. Укытучылар сыйныфларда иң матур шигырь сөйләүчеләрне билгеләделәр. Бүгенге көндә дә әлеге чарага әзерлек эшләре дәвам итә.
Иртәгә, 28 нче ноябрь көнне, Рафис Корбан белән очрашуда аның шигырьләрен сөйләргә теләүчеләрне 12:25 сәг. тә 25 нче кабинетта көтеп калабыз! 

Башлангыч сыйныфларда ачык дәресләр һәм чаралар дәвам итә. Бүген ачык дәресләр 1,2,4 нче сыйныфларда узды.
1 нче А сыйныфы укытучысы Альбина Фатиховна “2 санын кушу һәм алу” темасына математика дәресе үткәрде. 2 нче А сыйныфында Фәридә Фәимовна, рус теле дәресендә, тамырында басымсыз сузыклар булган сүзләрне дөрес язу турында дәрес бирде. Гүзәлия Хәбибуловна, 4 нче В сыйныфында, математика дәресе үткәрде. Дәрес саннарны 9 га бүлүгә багышланган иде. Ә Анжелика Евгеньевна 2 нче сыйныфларда әти-әниләр катнашында “Бездә гайрәт, бездә көч!” исемле спорт чарасы уздырды.
Барлык укытучыларга да яхшы дәресләр һәм чаралар өчен рәхмәт белдерәбез. Белем бирү процессында уңышлар теләп калабыз!