9 нчы декабрь көнне 4 нче сыйныф укучылары “Гаилә бәйрәме” уздырдылар. Укучылар иң якын кешеләренә багышлап җырлар җырладылар, биюләр биеделәр, матур шигырьләр сөйләделәр. Ә бәйрәм ахырында әти-әниләренә үз куллары белән ясаган магнитлы йөрәкләр бүләк иттеләр. Әлеге матур бәйрәм әти-әниләргә дә, укучыларга да бик ошады.
Гаилә кыйммәтләрен саклау һәм мәктәп белән әти-әниләр арасын якынайткан өчен Эльвира Дамировнага рәхмәт белдерәбез!

8 нче декабрь көнне, 5 нче сыйныф укучылары, Хөснетдинова Э.Р. җитәкчелегендә, “Әбиемнең сандыгы” исемле бәйгедә булып кайттылар. Әлеге чара гореф-гадәтләрне саклау һәм халык авыз иҗатына хөрмәт хисе тәрбияләү максатыннан оештырыла. Бәйгенең кагыйдәләре буенча татар телендә берәр әкият яки мәсәл сәхнәләштерелергә тиеш.
Безнең укучыларыбыз “Зөһрә” әкиятен хөкемдарлар игътибарына тәкъдим иттеләр. Һәр укучы үз ролен аңлап, күңелен биреп уйнарга тырышты.
Гимназия данын яклап шундый матур сәхнә әсәре тәкъдим иткәннәре өчен, 5 нче сыйныф укучыларына һәм җитәкчеләренә рәхмәт белдерәбез!

7 нче декабрь көнне, математика һәм информатика кысаларында, беренче сыйныфлар арасында шахмат турниры узды. Күп нәни укучылар өчен әлеге турнир беренчесе булды. Шахмат уенынын үз итүче малайлар һәм кызлар бик яратып, кызыксынып, мавыгып шахмат уйнадылар. Уен балаларның логик фикерләвен дә, акыл үсешен дә, игътибарлылыгын да үстерә. Әлеге турнирда катнашырга теләк белдерүчеләрнең күп булуы безне аеруча сөендерде.
Җиңүчеләргә килгәндә финал ярышларына Абдрахманов А. Һәм Малышев А. чыктылар. Укучыларны җиңүләре белән котлыйбыз! Алдагы уеннарда уңышлар телибез. 

1 нче Б сыйныфында “Кыш бабайга хат” акциясе башланып китте. Балалар бик тырышып, иң ихлас теләкләрен Кыш бабайга язалар. Декабрь ахырына кадәр укучылар якынлашып килүче Яңа ел белән дусларын, сыйныфташларын укытучыларны котлый алачак.
Укучылар тырышып открыткалар, матур бизәкле хатлар язалар. Ә хатны язарга аларны укыучылары Азалия Рависовна әйләнә-тирә дөнья дәресендә өйрәтә икән.
Шундый кызыклы акцияләр, чаралар оештырганы өчен Азалия Рависовнага һәм аларда актив катнашканнары өчен 1 нче сыйныф укучыларына рәхмәт белерәбез! 

1 нче декабрь көнне, гимназиябез егетләре баскетбол ярышларында булып кайтты. Егетләребез бик яхшы уен күрсәттеләр. Җитезлек, кыюлык, уен кагыйдәләрен яхшы белү һәм хәйләкәрлек күрсәтеп җиңү яуладылар.
Вахитов һәм Идел буе гомум белем бирү оешмалары арасында гимназия данын яклаганнары өчен егетләргә зур рәхмәтебезне белдерәбез. Алга таба да зур җиңүләр нысыйп булсын!

Гимназиядә 7-22 нче декабрь көннәрендә шахмат турнирлары узачак. Ярыш безнең гимназиянең 29 нчы кабинетында уза. Ярышлар турында төгәл мәгълүматны бирелгән рәсемнән күрә аласыз. Җиңүчеләрне бүләкләү һәм турнирның ябылышы 22 нче декабрьгә билгеләнгән.
Турнирда катнашырга теләк белдерүче барлык укучыларны бәйгедә көтеп калабыз!

Математика һәм информатика декадасы кысаларында, Резеда Рашатовна җитәкчелегендә, башлангыч сыйныф укучылары бик матур ребус ясаганнар иде. Әлеге ребус стена газетасы форматында икенче катта эленеп тора.
Кадерле укучылар! Актлар залы янында эленгән әлеге ребусларны чишәргә чакырабыз. Нәкъ менә сезгә иң авыр, кызыклы, катлаулы ребус авторын билгеләргә тәкъдим итәбез. 

Бүген, 6 нчы ноябрь көнне, гимназиядә “Татар теле һәм әдәбияты дәресләрендә педагогик технологияләр” исемле семинар оештырылды. Әлеге семинар “ФГОС ОО шатларында заманча татар теле һәм әдәбияты дәресе” исемле өстәмә һөнәри квалификация күтәрү программасы кысаларында узды.
Килгән кунакларга 1 нче Татар гимназиясе турында фильм күрсәтелде, музейга экскурсия оештырылды. Шулай ук, 4 сыйныфта татар теле һәм әдәбияты фәннәреннән ачык дәресләр күрсәтелде. Башлангыч сыйныф укытучылары Фәридә Фәимовна, Земфира Нурисламовна, татар теле һәм әдәбияты укытучылары Гөлүзә Азатовна һәм Лилия Мәгъфүровна әлеге педагогик технологияләрне уңышлы куллану үрнәкләрен күрсәттеләр. Һәр укытучы үз эшчәнлегендә заманча технологияләр кулланырга тырышкан иде. Татар теле һәм әдәбияты укытучысы Эльмира Рөстәмовна проект эшчәнлеге буенча мастер-класс күрсәтте.
Әлеге семинар укытучылар өчен файдалы булгандыр дигән теләктә калабыз! Ә гимназия укытучыларына, гимназия исеменнән, яхшы, кызыклы дәресләр, мастер-класслар күрсәткәннәре өчен рәхмәт белдерәбез!

Бүген, 5 нче декабрь көнне, педагог-оештыручылар, 5 нче сыйныфларны тимер юлларда үз-үзеңне тоту кагыйдәләре белән таныштырдылар. Педагог-оештыручылар нинди җирләрдән тимер юл аша чыгарга, нинди кагыйдәләрне үтәргә, наушниктан музыка тыңлау, күңелсез нәтиҗәләргә китерүче төрле хәлләр турында сөйләделәр, ә укучылар куелган сорауларга җавап бирергә тырыштылар.
Укучылар инструктаж ахырында түбәндәге нәтиҗәләргә килделәр: үзеңне тимер юл янында ничек тотуың, алдагы бөтен гомереңне билгели. Кеше үз гомерен, сәламәтлеген кайгыртырга һәм башкаларга да игътибарлы булырга тиеш.
Кадерле укучылар! Тагын бер кат искәртеп үтәбез: юлларда сак һәм игътибарлы булыгыз!

30 нчы ноябрь көнне, 6 нчы сыйныфлар Татарстан Республикасының Милли музеенда экскурсиядә булып кайттылар. Укучылар борынгы гасырлардан алып бүгенге көнгә кадәр, ерак бабаларыбыз тормышы һәм Татарстан тарихы белән таныштылар. Кызыклы, тарихи, чын экспонатлар аша борынгы кешеләрнең көндәлек тормышы белән таныштылар.
Укучылар кул эшләнмәләре, эш кораллары һәм ау өчен кирәк яраклар, борынгы кешеләрнең киемнәре һ.б. әйберләрне күреп тәэсирләнделәр. Укучылар сүзләренә караганда, аларга иң ошаган экспонатлар: хайваннар карачкылары, хәрби киемнәр, Екатерина II каретасы булган.
Әлеге сәяхәт укучыларны таң калдырган. Кызыклы экскурсиядән алган тәэсирләр укучылар күңелендә әле озак сакланыр.