Бүген, 13 нче февраль көнне, гимназиядә “Татар теле һәм әдәбияты дәресләрендә педагогик технологияләр” исемле семинар узды. Әлеге семинар “ФДББС шатларында заманча татар теле һәм әдәбияты дәресе” исемле өстәмә һөнәри квалификация күтәрү программасы кысаларында узды. Әлеге стажировканың кураторы – педагогика фәннәре докторы, Г. Тукай исемендәге татаристика һәм тюркология югары мәктәбе профессоры Ч.М. Харисова иде.
Укытучылар гимназиябез турында видео карадылар һәм директорыбыз Шамсиева Гөлфия Гаязовнаның чыгышын тыңладылар. Кытай теле укытучысы А.А Идрисова “Һава торышы. Ел фасыллары” темасына дәрес күрсәтте. Шулай ук инглиз теле укытучысы Л.Р. Сазгиева да 3 нче А сыйныфында “Киемнәр” темасына дәрес үрнәге тәкъдим итте. Татар теле һәм әдәбияты фәннәреннән дә ачык дәресләр күрсәтелде. Башлангыч сыйныф укытучысы Земфира Нурисламовна, татар теле һәм әдәбияты укытучылары Гөлүзә Азатовна һәм Лилия Мәгъфүровна әлеге педагогик технологияләрне уңышлы куллану үрнәкләрен күрсәттеләр. Һәр укытучы үз эшчәнлегендә заманча технологияләр кулланырга тырышкан иде. Татар теле һәм әдәбияты укытучысы Эльмира Рөстәмовна проект эшчәнлеге буенча мастер-класс күрсәтте. Кунакларны гимназия белән якыннанрак таныштыру, укучылар иҗатын күрсәтү өчен матур концерт номерлары да тәкъдим ителде.
Әлеге семинар укытучылар өчен файдалы булгандыр дигән теләктә калабыз! Ә укытучыларга, гимназия исеменнән, яхшы, кызыклы дәресләр, мастер-класслар күрсәткәннәре өчен рәхмәт белдерәбез!

11 нче февраль көнне без барлык гимназия укучылары белән К. Тинчурин исемендәге драма һәм комедия театрында хәйрия концерты күрсәттек. Әлеге чара гимназия үсешенә юнәлдерелгән хәйрия фонды белән берлектә эшләнде.
Шушы зур концертта укучылар да, укытучылар да, әти-әниләр дә актив катнаштылар. Биюләр белән үрелеп барган номерлар, лирик һәм дәртле җырлар, төрле милләт биюләре, рус һәм татар телләрендә нәфис сүз, спектакльдән өзекләр, спорт биюе һ.б. барлык тамашачыларның күңеленә хуш килгәндер дип уйлыйбыз.
Әлеге чара гимназия тарихын, аның үсешен, укучыларның талантын, укытучыларның зур хезмәтен күрсәтте. Директорыбыз Шәмсиева Гөлфия Гаязовна әйткәнчә, гимназиядә балалар үсеше өчен барлык шартлар тудырылган. Татар, рус, инглиз, кытай телләренә өйрәтү, хореография дәресләре, каратэ түгәрәкләре, көчле материаль база, компьютер технологияләре белән җиһазландырылган сыйныф бүлмәләре, интрактив такта һ.б. – болар барысы да 1 нче гимназия тудырган шартлар.
Концерт аша гимназиябез белән якыннан танышу тамашачылар күңеленә хуш килгәндер дигән теләктә калабыз.
Чарага үзеннән өлеш керткән һәркемгә, гимназия исеменнән, зур рәхмәтебезне белдерәбез! 

Россия Федерациясенең мәгариф һәм фән министрлыгы 9-11 нче сыйныфлар өчен “РФның фәнни-технологик үсеше стратегиясе” һәм “Цифровая экономика” темаларына ачык дәресләр циклы оештырды.
Ачык дәрес интрактив формада үтте. Укучылар “Син ризык турында нәрсә беләсең?” темасына дәрес карадылар, үзләрен кызыксындырган сораулар бирделәр. Онлайн-трансляция вакытында дискуссиягә дә кушылып китәргә мөмкин иде. Шундый үзенчәлекле, кызыклы дәрес югары сыйныф укучылары күңеленә хуш килде.
Мондый дәресләр соңгысы булмас дигән теләктә калабыз.

Гимназиядә гел ниндидер кызыклы чаралар, бәйгеләр, концертлар уза. 11 нче февраль көнне К. Тинчурин исемендәге драма һәм комедия театрында гимназия укучылары көче белән әзерләнгән хәйрия концерты узачак.
Күптән түгел генә гимназиянең 100 еллык юбилеен зурлап уздырсак, ә бүген бөтен мәктәп белән хәйрия концертына әзерләнәбез. Буш вакытларында укучылар актлар залында репетицияләр ясыйлар, концерт уңышлы үтсен өчен бар көчләрен куялар.
Матур, дәртле биюләр, күңел кылларын тибрәтерлек җырлар, төрле чорларга караган чыгышлар тамашачы күңеленә хуш килер дип уйлыйбыз. 

Бүген, 5 нче февраль көнне, гимназиядә төрле фәннәр буенча, шәһәр олимпиадасының мәктәп этабы узды. Ул - география, биология, физика, җәмгыять фәннәреннән үткәрелде. Әлеге олимпиадаларның үзенчәлеге шунда: биремнәр барысыда татар телендә бирелде.
Олимпиадаларда катнашучы укучыларга һәм аларны әзерләүче укучыларга уңышлар телибез!

Бүген, 5 нче февраль көнне, “Батарейка тапшыр һәм Керпене коткар” акциясенә йомгак ясалды. Нәтиҗәләр түбәндәгечә:
1 нче урын – 4 нче В сыйныфы (206 батарейка)
2 нче урын – 4 нче Б сыйныфы (137 батарейка)
3 нче урын – 8 нче Б сыйныфы (108 батарейка)
Шулай ук акциядә 1 нче А, 1 нче Б, 2 нче А, 2 нче Б, 2 нче В, 5 нче Б, 5 нче В, 7 нче А, 7 нче Б сыйныфлары актив катнаштылар.
Барлык катнашучыларны котлыйбыз һәм гимназия исеменнән рәхмәт белдерәбез!

Безнең укучылар иҗади өлкәдә дә, фәнни өлкәдә дә бик яратып, актив катнашалар. Гыйнвар ае төрле конференцияләргә, бәйгеләргә бик бай.
Менә 27 нче гыйнвар көнне дә республика күләм “Раштуа укулары” конференциясе узды. Әлеге чарада безнең гимназиянең 10 нчы сыйныф укучысы Фаекова Дилә катнашып, 3 нче дәрәҗәдәге дипломга лаек булды.
Диләне һәм аның җитәкчесе Эльмира Рөстәмованы әлеге җиңүләре белән тәбрик итәбез, фәнни уңышлар телибез.

Бүген, 2 нче гыйнвар көнне, табигать фәннәре айлыгы кысаларында, география фәне буенча “Параллельләр һәм меридианнар” исемле ачык дәрес үтте. Аны 5 нче Б сыйныфы өчен география фәне укытучысы Земфира Әхтәмовна үткәрде. Дәрестә укучылар төркемнәрдә эшләделәр, глобуслардан, контурлы карталардан меридианнар һәм параллельләрне таптылар, төрле күнегүләр эшләделәр. Земфира Әхтәмовна апельсин һәм мандариннар мисалында, күрсәтмәлелек методын кулланып, меридианнар һәм параллельләрне күрсәтте. Әлеге кызыклы ачыш укучыларга да, ачык дәресне бәяләгән методистларга да бик ошады.
Шундый кызыклы, мәгълүматларга бай дәрес күрсәткәне өчен, Земфира Әхтәмовнага рәхмәт белдерәбез һәм алдагы педагогик эшчәнлегендә уңышлар телибез. 

Укучыларыбыз район, шәһәр күләмендә оештырыла торган бәйгеләрдә актив катнашып урыннар яулыйлар. Гыйнвар аенда уздырылган шәһәр күләм “Казан сандугачы - 2018” бәйгесендә безнең гимназия укучылары да катнашты.
“Халык җыры – СОЛО” номинациясендә 10 нчы сыйныф укучысы Фаекова Д. беренче дәрәҗәдәге дипломга лаек булды. Шулай ук, Мустафина Ф.Ш. җитәкчелегендәге “Чишмә” ансамбле дә икенче дәрәҗәдәге дипломга лаек дип табылды. Шундый талантлы укучыларыбыз булу белән без бик горурланабыз.
Җиңүчеләр һәм аларның җитәкчеләрен уңышлары белән котлыйбыз! Алдагы тормышларында да уңышлар телибез!

22-25 нче гыйнвар көннәрендә, Мәскәү районы 122 нче гимназия базасында, “Ел укытучысы – 2018” бәйгесенең шәһәр этабы узды. Укытучылар “Предмет укытучысы” номинациясендә көч сынаштылар. Бәйгедә безнең гимназиянең физика укытучысы Хабиров Р.Р. да уңышлы чыгыш ясады. Белем бирүдә осталыкларын уңышлы күрсәтеп Радик Рифович республика этабына үтте.
Хөрмәтле, Радик Рифович! Сезне җиңүегез белән тәбрик итәбез, яңа уңышлар, үрләр яулавыгызны теләп калабыз!