16 апрель көнне башлангыч сыйныфлар укытучысы Анжелика Евгеньевна һәм татар теле укытучысы Эльвира Илгисовна туган телләр һәм халыклар бердәмлеге елы уңаеннан “Татар халкының милли орнаменты”, дигән темага ачык дәрес үткәрделәр. 1 “В” сыйныфы укучылары татар халкының сәнгате, мәдәнияте, милли татар орнаменты, аның үзенчәлеге, төрләре белән таныштылар. Укучыларда патриотизм хисе тәрбияләү  – дәрес алдына куелган төп максатларның берсе. Бу максат тормышка ашты. Туган  ягыңны яратырга, аның гореф-гадәтләрен белергә кирәклеге ассызыкланды. 

Бүген бөек татар шагыйре Габдулла Тукайның вафаты көнне бер төркем гимназия укучылары һәм укытучылары традиция буенча Казанның Яңа татар бистәсе зиратында булып кайтты. Алар Тукай һәм татар зыялылары каберләрен зыярәт кылдылар.

Исеме һәм иҗаты белән татар әдәбияты тарихында иң олы урын алган, әдәбият күгендә иң якты йолдыз булып янган Габдулла Тукайның мирасы, әдәби әсәрләренең рухи байлыгы милләтебезнең горурлыгы булып тора. Шуңа да бүген нәкъ тә аның иҗатына багышланган шигырьләр конкурсы үтте.

Бүген 4 “Б” сыйныфында “Татар халык киемнәре” дип аталган чара үткәрелде.  Биредә сыйыф җитәкчеләре укучылар белән татар халкының милли киемнәре, бизәкләре, орнаментлары турында сөйләште. Дәреснең иң кызыклы мизгелләре булып балаларның әзер “киемнәр”не буяп караулары, соңыннан аларны үзләре ясавы булды.

12 нче апрель – Космонавтика көне. Быел бу вакыйгага 60 ел тулды. 1961нче елның 12 нче апрелендә бөтен Җир шары Советлар Союзының орбитага Галәм корабы очыруына шаһит булды, аның бортында кеше булуын да ишетеп, "аһ" итте. Кораб җиһанга күтәрелеп, ул вакытта күз алдына да китереп булмаслык тизлектә (сәгатенә 25 мең чакрым) Җирне урап чыкты.

Боларның барысы турында бүген 9 “Б” сыйныфы укучылары мәктәп радиосы аша сөйләделәр. Алар космоска кагылышлы кызыклы фактларны санап үтте, барлык гимназиягә 1961 нче елның 12 нче мартындагы кайбер аудиоязмаларын да тыңлатты.

Галәмгә беренче мәртәбә юл ачкан тарихи вакыйганы һәм легендар Юрий Гагаринны искә алмаган кеше юктыр. Без дә бу истәлекле көнгә багышлап космонавтикага кагылышлы рәсем һәм кул эшләре конкурсы оештырдык. Эшләр бик күп кабул ителде, алардан гимназиядә бик матур  күргәзмә ясалды.

Бу атнада 4 нче сыйныфлар өчен китапханә дәресләре үтте. Китапханәчебез укучыларга Бөек Ватан сугышы турында сөйләде, бу темага кагылышлы әсәрләр белән кыскача таныштырып үтте, фронтта булган язучылар, шагыйрьләр, әдипләр турында мәгълүмат бирде. Шулай ук балалар Бөек Ватан сугышы турындагы китаплар, газета-журналлар белән дә таныштылар.

7 нче апрель көнне Бөтендөнья сәламәтлек көнен билгеләп үттек. Сәламәтлек турында сөйләшү бу көн белән генә бетмәде, атна дәвамында һәр сыйныфта да бу темага караган кызыклы сыйныф сәгатьләре үтте.

Халыкара кошлар көне - ел саен үткәрелә торган интернациональ экологик бәйрәм.  Мондый бәйрәм яз көне билгеләп үтелә, чөнки нәкъ менә шушы вакытта канатлы кошлар туган якларына карата бөек мәхәббәт хисләрен уяталар. Яз көне бөтен табигать җанлана, яңадан туа. Кояш яктырак һәм күңеллерәк карый башлый, йомшак җил иркәли, өлгереп җитмәгән чирәм өлгерә, агачларның бөреләре бүртә. Күчмә кошлар туган якларына әйләнеп кайталар.

Нәкъ тә әлеге матур мизгелдә укучыларыбыз сыйныфлары белән берләшеп, кошлар көненә видеолар төшерде, кул эшләре ясады, коллектив эш башкарды. Иң активлары булып 1 “Б”, 1 “В”, 4 “А”, 4 “Б”, 8 “А” сыйныфлары булды.

10 «А» сыйныфы укучылары бүген "Казан ярминкәсе" күргәзмәләр үзәгендә булып кайттылар. Биредә алар “XX век: От великих потрясений к Великой Победе” күргәзмәсе белән таныштылар. Экспозицияне аңлауда гомуми озынлыгы йөз метрдан артык булган мультимедиа инсталляциясе төп роль уйный. Контент белән контактсыз идарә итү системаларын гамәлгә кертү бу чорның иң масштаблы проектлары турында экспонатлар булдырырга мөмкинлек биргән. Совет чоры фәне һәм сәнгате коры архив мәгълүматларын җанландыручы ачык һәм күрсәтмә мультимедиа китапларында аерым игътибарга лаек. Хәзер фотоларда сакланмаган әйберләрне гәүдәләндерергә яки уйлап чыгарырга кирәкми - ул 3Dда яңадан төзелгән. Биредәге инновацион технологияләр аша укучылар бик күп яңа мәгълүмат алдылар, информациянең болай бирелеше аларда зур кызыксыну уятты, шуның белән бергә бу теманы аңлау да җиңелрәк булды.