Яңа яуган кар шыгырдый,

Өстенә баскан саен,

Курыкмыйча каршылыйбыз

Салкын кыш аен.

Урамга чыктык шаулашып,

Йортлардан чана тартып; 

Уйныйбыз учта йомарлап,

Юеш кар тубы атып.

Һава саф – рәхәт суларга,

Яп-якты бөтен урын.

Кыш бабай килде кунакка,

Җир киде йомшак тунын. 

Уртанчылар төркеме балалары  физкультура эшчәнлегендә тизлек, җитезлекне үстерү буенча туплар, кыршаулар, гимнастик таяклар ярдәмендә төрле күнегүләр ясыйлар. Эшчәнлек барышында балалар үзләренең сәламәтлекләрен саклый белергә өйрәнәләр.

Уртанчылар төркемендә иң гади математик күзаллаулар буенча шөгыль. Эшчәнлек  барышында балалар геометрик фигураларны аерырга, рәттән санарга, предметларны чагыштырырга, ел фасылларын һ.б. өйрәнәләр.

Бүген зурлар төркемендә тәрбияләнүче балалар йорт куяны белән таныштылар. Танып белү өлкәсе буенча әлеге кызыклы вакыйга вакытында балалар куян турында булган белемнәрен ныгыттылар, шигырьләр сөйләделәр, җыр җырладылар. Ак куянга үзләренең яратуларын бүләк иттеләр

Иң кечкенәләребез бүген музыка залына менделәр. Алар бүген шалтыравык белән таныштылар. Җырның, шалтыравыкның тавышын тыңларга өйрәнделәр. Музыка астында хәрәкәтләр ясадылар.

Мәктәпкә әзерлек төркеме балалары белән 4 ноябрь - халыклар бердәмлеге көне икәнлеген ачыкладык. Шул турыда әңгәмә кордык. 2004 ел ахырында РФнең Дәүләт Думасы 4 ноябьрне Халыкларның бердәмлеге көне итеп кабул итә. 2005 елдан Россиядә официаль рәвештә үткәрелә.Бердәмлек элек-электән безнең татар халкына хас сыйфат. Нәкъ менә бердәмлек, татулык күп кенә авырлыкларны җиңеп чыгарга, дошманнарны җиңәргә мөмкинлек биргән. Нәкъ менә шушы бердәмлек безнең илебезнең тынычлыгына, мөстәкыйльлегенә китергән.

"Серле иҗат чишмәсенә сәяхәт" проекты кысаларында мәктәпкә әзерлек төркеме балалары белән Тукай скверына экскурсия ясадык. Анда балаларны Тукай премиясе лауреатлары белән таныштырдык.

Икенче кечкенәләр төркемендә иң гади математик күзаллаулар формалаштыру буенча шөгыль. Предметларны озынлык, киңлек һәм калынлыкларына карап чагыштыру күнегүләрен үтәү; логик фикерләү сәләтен, хәтерләрен, игътибарлылыкны, мөстәкыйльлекне үстерү буенча эш.

Көзге салкын көннәр башлануга карамастан бакчабызның һәр группа балалары көн саен ачык һавага чыгалар. Ачык һавада йөрү мәктәпкәчә яшьтәге балаларның физик үсеше өчен зур әһәмияткә ия. Прогулка - балалар организмын ныгыту өчен иң кулай чара. Ул балаларның чыдамлыгын һәм тышкы мөһитнең тискәре йогынтысына, аеруча салкын тию авыруларына каршы торуны арттыра. Балалар урамда вакытта уйныйлар, күп хәрәкәт итәләр. Хәрәкәт матдәләр алмашын, кан әйләнешен, аппетитны яхшырта. Балалар төрле каршылыкларны җиңәргә өйрәнәләр, хәрәкәтчән, җитез, кыю, чыдамлы булалар. Моннан тыш ачык һавада йөрү акыл үсешенә ярдәм итә, чөнки балалар әйләнә-тирә дөнья турында бик күп яңа тәҗрибә һәм белем алалар.

Бакчабыз тәрбиячеләре балаларга төрле уеннар уйнаталар.Уеннар, тәрбия чарасы буларак, баланың шәхес булып формалашуына зур йогынты ясый, психик үсешенә ярдәм итә. Алай гына да түгел, алар нәниләрдә дуслык, иптәшлек, гаделлек, зирәклек кебек сыйфатлар да тәрбияли. Ә кер кыстыргычлар ярдәмендә оештырылган уеннар ярдәмендә вак моториканы гына түгел,  фантазияне дә үстерергә, балаларны санарга да өйрәтергә була.